ನಮ್ಮ ನೆತ್ತರಿನ ಬಣ್ಣ ಒಂದೇಯಾಗಿದ್ದರೂ
ಉತ್ತರ ಆಶೋತ್ತರಗಳು ಬೇರೆ ಬೇರೆ
ಅಡಿ ಇಡುವ ನೆಲವು ಒಂದೇಯಾಗಿದ್ದರೂ
ಗಮ್ಯ ತಾಣ ನಿಲ್ದಾಣಗಳು ಬೇರೆ ಬೇರೆ

ಬುದ್ಧಿಶಕ್ತಿಯ ಲವಲೇಶವಿರದ ಪ್ರಾಣಿಗಳು
ಸಹಬಾಳ್ವೆಗೆ ತಮ್ಮನ್ನು ಒಡ್ಡಿಕೊಂಡಿವೆ
ಸುತ್ತ ಸುಳಿವ ಗಾಳಿ ಒಂದೇಯಾಗಿದ್ದರೂ
ಒಳ ನೋಟ ಒಕ್ಕೂಟಗಳು ಬೇರೆ ಬೇರೆ

ಭಾಷಣ ಬರವಣಿಗೆಯಲ್ಲಷ್ಟೇ ಸಮತೆಯ
ಹೂರಣ ತೋರಣಗಳನ್ನು ಕಂಡಿದ್ದೇವೆ
ಕುಡಿಯುವ ಜಲವು ಒಂದೇಯಾಗಿದ್ದರೂ
ಯೋಚನೆ ಯೋಜನೆಗಳು ಬೇರೆ ಬೇರೆ

ಒಡಹುಟ್ಟಿದವರೇ ಬೆಳೆದೊಡನೆ ಕಾದಾಡಿ
ದಾಯಾದಿಗಳಾಗುವುದಿಲ್ಲಿ ಮಾಮೂಲಿ
ಭಾರತೀಯರೆಂದೂ ಒಂದೇಯಾಗಿದ್ದರೂ
ಇಲ್ಲಿ ಆಚಾರ ವಿಚಾರಗಳು ಬೇರೆ ಬೇರೆ