೧
ಮನವೆಂಬ ಮನೆಯಲ್ಲಿ
ಎದ್ದು ನಿಂತಿವೆ ಗೋಡೆಗಳು! ಹೃದಯದ ಹಜಾರದಲ್ಲಿ
ಆಗಾಗ ಎಲ್ಲ ಕೂತು
ಔತಣಕೂಟ ಮಾಡಿ
ನಕ್ಕು ನಲಿಯುತ್ತಿದ್ದ
ವಿಶಾಲ ಜಾಗವೀಗ ಪಾಲಾಗಿದೆ
ಅವರಿಗಿಷ್ಟು ಇವರಿಗಿಷ್ಟು

ಅತ್ತಕಡೆ ಇವರು
ಇತ್ತ ಕಡೆ ಅವರು
ಬಾರದಂತೆ ಎಲ್ಲರೂ ಸ್ವಯಂಕೃತವಾಗಿ
ಅಲಿಖಿತ ನಿಯಮ ಜಾರಿಗೊಳಿಸಿಕೊಂಡಿದ್ದಾರೆ!

ಮನದ ಗೋಡೆಯ ನಡುವೆ
ಬಿರುಕು ಬಿಟ್ಟಿವೆ!

೨
ಮತ್ತೆ
ಆ ಬಿರುಕಿನ ನಡುವೆ
ಪ್ರೀತಿ ಸ್ನೇಹಗಳ
ಬೀಜ ಬಿತ್ತಿ
ನಲುಮೆಯಿಂದ ನೀರೆರೆದು
ಹೂವು ಅರಳಿಸಬಹುದೇ?

ಮತ್ತೆ ಆ ಮನೆಯ
ಬೃಂದಾವನದ ತುಂಬಾ
ಸ್ನೇಹದ ಬಳ್ಳಿ ಹಬ್ಬಿ
ಹಸಿರಾಗಿ ನಳನಳಿಸಬಹುದೇ?

೩
ಬಿಟ್ಟರೆ ಆದೀತು!!
ವಾದ -ಪ್ರತಿವಾದಗಳ
ರಾಗ-ದ್ವೇಷಗಳ
ಅಸಹನೆ-ಅಸೂಹೆಗಳ
ಮದ-ಮತ್ಸರಗಳ
ಶುಚಿಗೊಳಿಸಿ
ಶುಭ್ರಗೊಳಿಸಿದರಾದೀತು!