ನಾಗರಾಜ ಬಿ. ನಾಯ್ಕ ಅವರ "ಕಥೆಗೆ ಒಂದು ಚಿತ್ರ......" - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ನಾಗರಾಜ ಬಿ. ನಾಯ್ಕ

“ಕಥೆಗೆ ಒಂದು ಚಿತ್ರ……”

ಚಿತ್ರ ಗೆರೆ ಬದುಕು
ಮೂರು ಒಂದು ಕಥೆಯ ದಾರಿ
ಯಾರೋ ನಡೆದು ಹೋದಂತೆ
ಇನ್ನಾರೋ ಹಿಂಬಾಲಿಸಿದಂತೆ
ಕೆಲವು ಚಿತ್ರಗಳು ಮುಂದೆ
ಓಡಿದಂತೆ ಕಾಲದ ಓಟಕ್ಕೆ
ತೆಗೆವ ತರತರದ ಚಿತ್ರಗಳು
ಬಣ್ಣದ ಎಳೆಗಳ ಹೊದಿಕೆ
ಕಾಣದ ಮುಖ ಪುಟ
ಅಂದುಕೊಳ್ಳುವ ಸಲಿಗೆ
ದೂರ ನಿಂತ ನಿಲುವು
ಹಸಿರಿನಿಂದ ಹುಟ್ಟಿದ
ಸಸಿಯೊಂದು ಹಸಿರು ಹರಡಿಹ
ಗೆರೆಗಳ ಚಿತ್ರ
ಮೋಡದ ಮೇಲೊಂದು ಕುಳಿತ
ಹನಿ ಮೋಡದ ಸನಿಹ
ಚಿಟ್ಟೆ ಹೆಜ್ಜೆಯ ಗುರುತು
ಹಕ್ಕಿ ಗೂಡಿನ ಹಾಡು
ಮುಳುಗುವ ದಿಗಂತದಿ
ಸಾಗುವ ಪುಟ್ಟ ದೋಣಿ
ಹುಲ್ಲು ಹೊರೆಯ ನಡುವೆ
ಮಗುವಿಗೆ ಕಟ್ಟಿಟ್ಟ
ಅಮ್ಮನ ಹಸಿವೆಯ ರೊಟ್ಟಿ
ಅಪ್ಪನ ಕಿಸೆಯಂಚಿನಲ್ಲಿ
ಕುಳಿತ ಸೊಪ್ಪು ಕಟ್ಟಿನ ಬಾಕಿ
ಯಾರಿಗೂ ಕಾಯದೇ
ಹೊರಡುವ ಬಸ್ಸಿನ ಪಯಣ
ದೂರ ದಾರಿಯ ನಡುವೆ
ಇಳಿವ ಗುರುತಿಗೆ
ಕಾಣುವ ಸಣ್ಣ ದಣಪೆಯ
ಕೇಳದ ಕಥೆಗಳು
ಎಲ್ಲವೂ ವಾಸ್ತವದ
ಚಿತ್ರದ ಕವಿತೆಗಳು