ಕಾವ್ಯ ಸಂಗಾತಿ
ಡಾ ಶಶಿಕಾಂತ ಪಟ್ಟಣ ರಾಮದುರ್ಗ ಪುಣೆ
“ಕದಿಯಲಾರದ ಕನಸುಗಳು”
ಕಣ್ಣ ರೆಪ್ಪೆಯ ಮರೆಯಲ್ಲಿ,
ಬಚ್ಚಿಟ್ಟ ಆಸೆಗಳ ಮೆರವಣಿಗೆ;
ಜಗದ ಕಣ್ಣಿಗೆ ಕಾಣದಂತೆ,
ಮೌನವಾಗಿಹ ಪಯಣ.
ಸೂರ್ಯ ಸುಟ್ಟರೂ ಸರಿಯೇ,
ಚಳಿ ಗಾಳಿ ಬೀಸಲಿ ಬಿಡು;
ಮನದ ಮೂಲೆಯ ಗೂಡಿನಲ್ಲಿ,
ಬೆಚ್ಚಗಿನ ನನ್ನ ಲೋಕವೊಂದು.
ಕಾಲನ ಚಕ್ರ ಉರುಳಿದರೂ,
ವಿಧಿಯ ಆಟ ಮುಂದುವರಿದರೂ;
ಸಾವಿರ ಜನ ಬಂದು ಹೋದರೂ,
ಕದಿಯಲಾರದ ಕನಸುಗಳು.
ಬೆಳಕಿನ ಕಿರಣ ಮೂಡುವವರೆಗೆ,
ಹಾದಿಯ ಗುರಿ ಮುಟ್ಟುವವರೆಗೆ;
ನನ್ನ ಅಂತರಾತ್ಮದ ನಂಬಿಕೆ,
ಯಾರು ಅಳಿಸಲು ಸಾಧ್ಯ?
ಕನಸುಗಳು ಬಿಕರಿಗಲ್ಲ
ಮಾರುಕಟ್ಟೆಯ ಮೂಟೆಯಲ್ಲ
ಹೊತ್ತು ಹೊತ್ತಿಗೆ ಉಣ್ಣುವ ತುತ್ತಲ್ಲ
ಕನಸುಗಳು ನನ್ನ ಭಾವ ಅಸ್ಮಿತೆ
ಡಾ ಶಶಿಕಾಂತ ಪಟ್ಟಣ ರಾಮದುರ್ಗ ಪುಣೆ
About The Author
ಕನಸುಗಳು ನನ್ನ ಭಾವ ಅಸ್ಮಿತೆ… ಎಷ್ಟೊಂದು ಪ್ರಬುದ್ಧ ಸಾಲುಗಳು…
ಕವನವೆಂದರೆ ಹೀಗಿರಬೇಕು…. ಓದಿದಷ್ಟೂ ಇನ್ನೊಮ್ಮೆ… ಮತ್ತೊಮ್ಮೆ… ಮೊಗದೊಮ್ಮೆ ಓದಬೇಕು ಎನ್ನುವ ಹಂಬಲ ಮೂಡಬೇಕು… ಶೀರ್ಷಿಕೆಯೂ ಅಷ್ಟೇ ಅರ್ಥಗರ್ಭಿತ
ಕಣ್ಣ ರೆಪ್ಪೆಯಲ್ಲಿ ಬಚ್ಚಿಟ್ಟ ಆಸೆಗಳು, ಮೌನ ಪಯಣ, ಯಾರು ಬಂದರು ಕದಿಯಲಾರದ ಕನಸುಗಳು ನಿಮ್ಮ ಅಂತರಾತ್ಮದ ನಂಬಿಕೆ ಹಾಗೂ ಕನಸುಗಳ ಭಾವ ಅಸ್ಮಿತೆ ಎಷ್ಟು ಸುಂದರವಾಗಿ ಹೆಣೆದ ಕವನ ಇದಾಗಿದೆ. ಸೂಪರ್ ಸರ್… ತಮಗೆ ಅನಂತ ಧನ್ಯವಾದಗಳು.