ಕಾವ್ಯ ಸಂಗಾತಿ
ಗಂಗಾ ಚಕ್ರಸಾಲಿ
“ಗೆಳೆತನವೂ..ಲೆಕ್ಕವೇ…”
ಅಮ್ಮನ ಮಡಿಲ ಅಗಲಿ
ಶಾಲೆಯಂಗಳದಿ ಕಾಲಿಟ್ಟಾಗ
ನನ್ನಂತೆ ಅಳುವ ಅವನ ನೋಡಿ
ಸಮಾನ ದುಃಖಿಗಳೆಂದು..
ಗೆಳೆಯರನ್ನು ಕೂಡಿಸುತ್ತಾ ಹೋದೆವು
ಗೆಳೆತನದ ಅರ್ಥ ತಿಳಿದೆವು…
ಶಾಲೆ.. ಕಾಲೇಜುಗಳಲ್ಲಿ
ಪಾಠಗಳಿಗಿಂತಲೂ…
ನಮ್ಮನ್ನು ಹಿಡಿದಿಟ್ಟಿದ್ದು
ಇದೇ ಬಾಂಧವ್ಯವಲ್ಲವೇ..
ಅದನ್ನು ಗುಣಿಸಿ ಗುಣಿಸಿ
ವಿಶಾಲಾರ್ಥವ ನೀಡಿದೆವು…
ಅದೇಕೋ.. ಜವಾಬ್ದಾರಿಯ
ಮೂಸೆಯೊಳಗೆ..
ಒತ್ತಡ,ಸಮಯದಭಾವ ಪದಗಳ ನೂಕಿ
ಸ್ನೇಹ ಬಂಧವನು ಕಳೆಯುತ್ತಾ..
ಅದರ ಸೊಗಸನು ಮನದ ಮೂಲೆಗೆ ತಳ್ಳಿಬಿಟ್ಟೆವು…
ಇಳಿವಯಸ್ಸಿನ ಸಂಜೆಯೊಳು
ಅದೇ ಬಾಲ್ಯಾವಸ್ಥೆಯ ಸ್ನೇಹದ ನೆನಪು
ಮನಸ್ಸಿಗೆ ರಂಗು ತುಂಬಲು ಹಾತೊರೆಯುತ್ತದೆ..
ಆದರೆ ಭಾಗಾಕಾರದ ಲೆಕ್ಕದಲಿ..ನಾವು ಶೇಷವಾಗಿರುತ್ತೇವೆ ಅಷ್ಟೇ…
ಸ್ನೇಹವೂ ಒಂದು ಲೆಕ್ಕ..ಅಲ್ಲವೇ…
ಗಂಗಾ ಚಕ್ರಸಾಲಿ
About The Author
