ಕಾವ್ಯ ಸಂಗಾತಿ
ಗಂಗಾ ಚಕ್ರಸಾಲಿ
“ಒಲವ ಗೀತೆ”.
ಅವರ ನೆನಪ ಜೋಕಾಲಿಯಲ್ಲಿ
ಒಲವ ಗೀತೆ ಆಗಾಗ ಸರ್ರನೇ ಜೀಕುತ್ತದೆ|
ಒಮ್ಮೆಲೇ….
ಹೂ ತೋಟವ ಸುತ್ತಿ ಬಂದ
ಗಾಳಿಯ ಘಮದಿ ಮಿಂದ
ಪಲ್ಲವಿಯ ಸಾಲುಗಳು
ಮನವನು ಚಿಟ್ಟೆಯಾಗಿಸಿಬಿಡುತ್ತವೆ|
ಆದರೆ….
ಚರಣಗಳು ನೀರವ ಧ್ಯಾನದಿ ಬಂಧಿ
ಏಕೆ? ಹೇಗೆ? ಪ್ರಶ್ನೆಗಳು
ಉತ್ತರಕ್ಕಾಗಿ ಕಾಯ್ದರೂ
ಇಬ್ಬರ ಅಹಮ್ಮಿನ ಕೋಟೆಯನ್ನು
ಬೇಧಿಸಲಾರವು|
ಬದುಕಿನ ಎಲ್ಲ ಹಾಡುಗಳಲ್ಲಿ
ಚರಣಗಳಿರಬೇಕೆ?
ಆದಿ, ಅಂತ್ಯಾಕ್ಷರ, ಮುಕ್ತಾಯದ ಸಾಲೊಂದಿರಬೇಕೆ?
ಹೂಂ..ಗುಡುತ್ತದೆ ಕವಿಹೃದಯ|
ವಿಚಿತ್ರವೆಂದರೆ…
ಬಹುತೇಕ ಒಲವಿನ ಹಾಡು
ಪಲ್ಲವಿಗಷ್ಟೇ ಸೀಮಿತವಾದಾಗಲೂ
ಜೀವನದುದ್ದಕ್ಕೂ ಮನದಿ
ಜೀಕುತ್ತಲೇ ಇರುತ್ತದೆ
ಬೇಸರಿಕೆಯ ಪೋಷಾಕು ತೊಡದೇ…
ಗಂಗಾ ಚಕ್ರಸಾಲಿ
About The Author
ಅದ್ಭುತ ಸಾಲುಗಳು