ಕಾವ್ಯ ಸಂಗಾತಿ
ಡಾ. ಸುಮಂಗಲ ಅತ್ತಿಗೇರಿ
“ಹೊನ್ನಬಿತ್ತಬೇಕಿದೆ ಹೊಲಕ್ಕೆಲ್ಲ


ಎಲ್ಲ ಇಲ್ಲಗಳ ನಡುವೆ ಕಟ್ಟಬೇಕಿದೆ ಮತ್ತೆ
ಒಡೆದ ಮನಸ್ಸುಗಳ ಹಿರಿಯರು ಕಂಡ ಕನಸುಗಳ
ಉಳಿಸಬೇಕಿದೆ ಬೆಳೆಸಬೇಕಿದೆ
ಜನಪದ ಸಿರಿ ಸಂಪದವ
ಪಸರಿಸಬೇಕಿದೆ
ನೆಲದ ನೆನಪುಗಳ
ನೊಂದ ಮನದ ನೋವುಗಳಿಗೆ
ಸಂತಸದ ಮುಲಾಮಿನ ಲೇಪವಾಗಿ
ನಿಂತ ನೀರಿನ ಕೊಳೆಗೆ
ಹರಿಯುವ ದಾರಿಯಾಗಿ
ಎಲ್ಲರನ್ನು ಸಮತೆಯಿಂದ ಜೊತೆ ಕರೆದು ಸಾಗಬೇಕಿದೆ ನಮ್ಮ ನೆಲದ ಸಾಂಸ್ಕೃತಿಕ ಸಿರಿಯ ತೇರನೆಳೆಯಬೇಕಿದೆ!
ಪಾಳು ಬಿದ್ದ ಹೊಲದಲ್ಲಿ
ಕಳೆಯನೆಲ್ಲ ಕಿತ್ತು
ಒಲವಿನ ಮಳೆಗರೆದು
ಹೊನ್ನ ಬಿತ್ತಬೇಕಿದೆ!
ಮತ್ತೆ ಹೊನ್ನ ಬೆಳೆಯಬೇಕಿದೆ!
ಅದಕ್ಕೆ ನಾವೆಲ್ಲ ಕೈಜೋಡಿಸಬೇಕಿದೆ ದುಡಿಯಬೇಕಿದೆ ದಣಿಯಬೇಕಿದೆ ಹೊಲಕ್ಕೆಲ್ಲ ಹೊನ್ನ ಬಿತ್ತಲು
ಡಾ. ಸುಮಂಗಲ ಅತ್ತಿಗೇರಿ



