ನಿತ್ಯ ಬಿರಿಯುವ ನಗೆ ಮಲ್ಲಿಗೆ ಮೊಗ್ಗುಗಳು ಮಾಯವಾಗಿವೆ ಇಂದು
 ಸದಾ ಹೊಳೆಯುವ ಕಂಗಳ ನಕ್ಷತ್ರಗಳು ಮಾಯವಾಗಿವೆ ಇಂದು

ಕಣ್ಣ ಕನ್ನಡಿಯಲಿ ನಿಸರ್ಗದ ಸೊಬಗು ಸೆರೆ ಹಿಡಿದು ನಲಿದಿದ್ದೆವು
ಒಲವ  ದರ್ಪಣದಲಿ  ಕಾಣುವ  ಬಿಂಬಗಳು ಮಾಯವಾಗಿವೆ ಇಂದು

ಒಲುಮೆಯಿಂದ ಉಸಿರಲಿ ಉಸಿರು ಬೆರೆಸಿ ನಾವು ಜಗವನು ಸುತ್ತಿದೆವು
ನದಿ ತಟದಲಿ ನಡೆದ ಹೆಜ್ಜೆಯ ಗುರುತುಗಳು ಮಾಯವಾಗಿವೆ ಇಂದು

ಪ್ರೇಮದ ಕುರುಹಾದ ತಾಜ್ ಮಹಲ್ ಕಟ್ಟಲು ಬಯಸಿದ್ದೆವು ನಾವು
ಯಮುನೆಯ ದಡದಲ್ಲಿ ಬಿತ್ತಿದ ಕನಸುಗಳು ಮಾಯವಾಗಿವೆ ಇಂದು

ಕದವಿಲ್ಲದ ಬಂಧೀಖಾನೆಯಲ್ಲಿ ಬಂಧಿಯಾಗಿ ಸುಖ ಪಡೆದೆವು
ಪ್ರಣಯದ ಅಮಲಿನಲ್ಲಿ ಕೊಟ್ಟ ಮಾತುಗಳು ಮಾಯವಾಗಿವೆ  ಇಂದು

ಅನುರಾಗದ ಬನದಲಿ ರಂಗಿನ ಚಿಟ್ಟೆ ಹಿಡಿಯಲು ಓಡಿ ದಣಿದೆವು
ಬಣ್ಣದ ಪತಂಗಗಳ ಹಿಡಿದ ನೆನಪುಗಳು ಮಾಯವಾಗಿವೆ ಇಂದು