ಅನುರಾಧಾ ರಾಜೀವ್ ಅವರ ಕವಿತೆ "ಸ್ಪಂದನ" - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಅನುರಾಧಾ ರಾಜೀವ್

“ಸ್ಪಂದನ”

ಮುಂಜಾನೆಯ ಮಂಜಿನಲಿ ಪ್ರಕೃತಿ
ನಾಟ್ಯವಾಡುತ ಬಂದಳೇ
ಅಂಜುತ್ತಾ ಅಳುಕುತ್ತಾ ಇಳೆಯ
ಸೌಂದರ್ಯ ನೋಡಿ ನಿಂದಳೇ

ಜೀವನದ ಅನಿತ್ಯತೆ ಅರೆಕ್ಷಣ ಬಂದು
ಹೋಗುವ ಮಿಂಚಿನಂತೆ
ಕವಿಹೃದಯ ಮಿಡಿಯುತಿದೆ ಮೆಲ್ಲನೆ
ಎದೆಯ ಸಂವಹನದಂತೆ

ಕೊಳಲ ಕರೆಯಲಿ ಅದೆಂತಹ ಉತ್ಕೃಷ್ಟ
ಪ್ರೇಮದ ಉತ್ಕಟತೆ
ಕೇಳಿದಷ್ಟೂ ತಳಮಳ ಅಂತರಾಳದಲಿ
ಬೇಕಿದೆ ಕ್ಷಮತೆ

ಮಿಲನದ ಹೂರಣ ತುಂಬಿಟ್ಟೆ ಮನದಿ
ಸವಿಯುವ ಆಕಾಂಕ್ಷೆ
ಸಲಿಲದ ಬಿಂದುವಾಗಿ ಹರಿಯುತ
ಬೇಡುವೆ ಒಲವ ಬಿಕ್ಷೆ

ಬಚ್ಚಿಟ್ಟ ಭಾವದ ಪೆಟ್ಟಿಗೆಯ ಕಾಯುತ್ತಾ
ಕುಳಿತಿರುವೆ ತೆರೆಯಲು
ಮುಚ್ಚಿಟ್ಟ ಬೆಚ್ಚನೆಯ ಮಾತುಗಳ ನಿರೀಕ್ಷೆ
ಒಲುಮೆಯ ಎರೆಯಲು