ಕಾವ್ಯ ಸಂಗಾತಿ
ಗಜಲ್
ನಯನ ಭಟ್. ಜಿ. ಎಸ್.
ಒಸರುತಿಹ ಶಾಹಿಯಲಿ ಕ್ಲೇಶಗಳ ಗಾಢ ಅಟ್ಟಹಾಸ ವ್ಯಥೆಯನು ಅಡಗಿಸುವುದು ಎಂತು
ತಿರುಗುವ ಕಾಲಚಕ್ರದಿ ಆವರಿಸಿದೆ ಭೀತಿಯ ಛಾಯೆ ಆಸೆಯನು ಚಿಗುರಿಸುವುದು ಎಂತು
ನೋವುಗಳ ತಣಿಸಿದ ಗೆಲುವುಗಳನು ನಡುಗಿಸುತಿದೆ ತಲ್ಲಣಗಳ ನಖ ಹಿಂಜರಿಕೆಗೆ ದೂಡಿ
ಮಳೆಬಿಲ್ಲ ವನಪಿನಂತಾಗಿದೆ ಭರವಸೆಯ ಭವ್ಯತೆ ಗಾಢ ಕಂಬನಿಗಳ ಒರೆಸುವುದು ಎಂತು
ಚಿತ್ತ ಬಿತ್ತಿಗೆ ಮಡಿಲ ತುಂಬಿಸುವ ಕಾತುರ ನಾಳೆಗಳ ಹೆಜ್ಜೆಗಳನು ನಗುವಿವ ಸಖ್ಯದಿ ಕ್ರಮಿಸಿ
ಕುಹಕತೆಯ ತಿವಿತದಿ ಬೆಂದ ಮನಸ್ಸಿನ ಗಮ್ಯಕೆ ಒಗ್ಗದ ಹಟಗಳ ಕಮರಿಸುವುದು ಎಂತು
ಬೆಟ್ಟು ಮಾಡಿ ಬೊಟ್ಟಿಡುತಿದೆ ಭಾವಗಳ ಬಣ್ಣ ಬೇಲಿಹೂ ನೀನೆನುತ ಜರೆದು ಮನವೊಡೆದು
ಸುಖ್ಯಗೊಳ್ಳದ ಅನುಭಾವದಿ ಗೊಣಗುತಿಹ ಅಬ್ಬೇಪಾರಿ ಕನಸುಗಳ ಚಿವುಟುವುದು ಎಂತು
ಭಾವಗಡಲಲಿ ಮಿಂದೇಳುತ ನವ್ಯ ನಾಳೆಗಳ ಅರಸಿ ನಡೆಯುತಿದೆ ‘ನಯನಾ’ ಳ ಅವಗಾಹನೆ
ಬಾಳ ಚಕ್ರಕೆ ತಿರುವುಗಳು ಅಗಣಿತ ಸದ್ಭಾವ ಹಾರೈಕೆಗಳ ನಿರ್ಲಕ್ಷಿಸುವುದು ಎಂತು.
