ಮಳೆ ಹನಿಗಳು
ವಿಶ್ವನಾಥ ಎನ್. ನೇರಳಕಟ್ಟೆ
ಮಳೆಯಿರದ ಇರುಳಿನಲಿ
ಗಡಿಯಾರದ ಮುಳ್ಳಿಗೂ
ವಿರಹ ವೇದನೆ
*
ನನಗೆ ಗೊತ್ತಿದೆ
ಮಳೆ ಪ್ರಿಯತಮೆಯಿದ್ದಂತೆ
ಪ್ರೀತಿಸುವವರನ್ನು ಹೆಚ್ಚು ಆಟವಾಡಿಸುತ್ತದೆ
*
ಅಬ್ಬ! ಮಳೆ ಬಂತು
ಇನ್ನು ನನ್ನ ಕಣ್ಣೀರು
ಯಾರಿಗೂ ತಿಳಿಯುವುದಿಲ್ಲ
*
ದೇವರೂ ಅಳುತ್ತಾನೆ ನನ್ನಂತೆ
ಎಂದು ತಿಳಿದು ಸಮಾಧಾನವಾಯಿತು
ಮಳೆ ಬಂದಾಗ
*
ಮಳೆಯ ಜೊತೆಗೆ ಬಂದ
ಅವಳ ಕನವರಿಕೆ, ಕನಸುಗಳಿಗೆ
ತೆರಿಗೆ ಕಟ್ಟಬೇಕಾಗಿಲ್ಲ
*
ಮಳೆ ಬಂದಾಗ
ಕೊಡೆ ಮರೆತುಬಂದವನು
‘ನೆನೆದ’
*
ಕಲ್ಲಿನಂಥ ಕಲ್ಲೂ
ಕರಗಿತು
‘ನೆನೆದಾಗ’
*
ಪ್ರಕೃತಿ ಸುರಿಸಿತು ಕಣ್ಣೀರು
ಮನುಷ್ಯ
ತೊಯ್ದುಹೋಗಿದ್ದಾನೆ
*
ಸುರಿಯುತ್ತಿದ್ದ ಮಳೆ
ನಿಂತಾಗ
ಮನಸ್ಸೆಲ್ಲ ಖಾಲಿ ಖಾಲಿ
*******************************
ಸುಂದರ ಹನಿಗಳು ಚೆನ್ನಾಗಿ ಬರೆದಿದ್ದೀರಿ ಅಭಿನಂದನೆಗಳು…