ಕೂಸು ಕಾಡುತ್ತಿದೆ..

ವಾರದ ಕವಿತೆ

ಕೂಸು ಕಾಡುತ್ತಿದೆ..

ಡಾ‌.ಸುಜಾತ ಲಕ್ಷ್ಮೀಪುರ.

ಕೂಸು ಕಾಡುತ್ತಿದೆ ಕಾಸು ಬೇಡುತ್ತಿದೆ
ಅಂಗಡಿ ಮುಂಗಟ್ಟಿಗೆಲ್ಲಾ ಬೀಗ ಜಡಿದಿದೆ
ಚಾಕಲೇಟಿನ ಬಯಕೆ ಮೈ ಮೇಲೆ ಬಂದು
ಕೂಸು ನೆಲದ ಮೇಲೆಲ್ಲಾ ಬಿದ್ದು ಒದ್ದಾಡಿದೆ

ಹಾಲು ಒಡೆದಿದೆ ಹಸಿವು ಕಾಡಿದೆ
ಕೂಸು ಖಾಲಿ ಬಾಟಲಿ ಹಿಡಿದು
ಸೆರಗಿಡಿದು ಎಳೆದೆಳೆದು ಕಾಡಿ ಬೇಡಿದೆ
ಎದೆಗಪ್ಪಿ ಮುದ್ದಿಸಿದರೂ ಅಳು ನಿಲ್ಲಿಸದೆ

ಎಳೆದೆಳೆದು ಚಿಲಕ ಹಾಕಿದರೂ ಬೀದಿಗೋಡಿದೆ
ಆಟದ ಸಾಮಾನು ಕೊಟ್ಟರೂ ಅರಚಾಡಿದೆ
ತೂದು ಎಸೆದು ಆಟಿಕೆಗಳ, ಬಿದ್ದು ಹೊರಳಾಡಿದೆ
ಮತ್ತೆ ಮತ್ತೆ ಬಾಗಿಲು ಬಡಿದು ನರಳಾಡಿದೆ

ಕಿಟಕಿಯೊಳಗಿಂದ ಚಂದಿರನೂ ಪೂರ ಕಾಣದೆ
ಸೂರ್ಯನೂ ಮನೆಯೊಳಗೆ ಇಣುಕದೆ
ಗಾಳಿಯೂ ಹತ್ತಿರ ಸುಳಿದಾಡದೆ ಸ್ಥಿರವಾಗಿದೆ
ಮಲಗಿದಲ್ಲೇ ಕೂಸು ಒದ್ದೆಮುದ್ದೆಯಾಗಿದೆ

ಲಾಕ್ ಆಗಿ ನಗುವೆಲ್ಲಾ ಉತ್ಸಾಹ ಡೌನ್ ಆಗಿದೆ
ಭರ್ರನೆ ತಿರುಗುತ್ತಿದ್ದ ಕೂಸಿನ ಕೈಕಾಲು ಕಟ್ಟಿಹಾಕಿದೆ
ನಾಲ್ಕು ಗೋಡೆಯ ನಡುವೆ ಕಮಟು ನಾಥ
ಹೊಸಗಾಳಿ ಬೆಳಕಿಲ್ಲದೆ ಮಂಕು ಆವರಿಸಿದೆ.

………….

.