ದೈನಂದಿನ ಸಂಗಾತಿ

ವೀಣಾ ಹೇಮಂತ್ ಗೌಡ ಪಾಟೀಲ್

ವೀಣಾ ವಾಣಿ

ಸಾಧನೆಗೆ ವಯಸ್ಸಿನ ಹಂಗೇಕೆ?

500ಕ್ಕೂ ಹೆಚ್ಚು ಮೆಡಲುಗಳನ್ನು ಮತ್ತು ಟ್ರೋಫಿಗಳನ್ನು ತನ್ನ 80ರ ಹರೆಯದಲ್ಲಿ ಗಳಿಸಿರುವ ಸೂರತ್ ನ ಬಕುಳ ಬೆನ್ ಪಟೇಲ್ ಎಂಬ ವಯೋವೃದ್ದ  ಹೆಣ್ಣು ಮಗಳು ಕಲಿಕೆಗೆ ಮತ್ತು ಸಾಧನೆಗೆ ವಯಸ್ಸಿನ ಹಂಗಿಲ್ಲ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಭರತನಾಟ್ಯದಲ್ಲಿ ಎಂಎ ಪದವಿಯನ್ನು ಪಡೆದಿರುವ ಆಕೆ ಲಿಮ್ಕಾ ಬುಕ್ ರೆಕಾರ್ಡ್ ನಲ್ಲಿ ಅತಿಹೆಚ್ಚಿನ ವಯಸ್ಸಿನ ಸಾಧಕಿ ಎಂದು ತಮ್ಮ ಹೆಸರನ್ನು ದಾಖಲಿಸಿದ್ದಾರೆ ತನ್ನ 58 ರ ಹರೆಯದವರೆಗೂ ಸಾಮಾನ್ಯ ಗೃಹಿಣಿಯಾಗಿ ಜೀವನವನ್ನು ಸಾಗಿಸಿರುವ ಬಕುಳ ಬೆನ್ ಅಸಾಮಾನ್ಯ ಸಾಧನೆಯನ್ನು ಮಾಡಿ ಕೋಟ್ಯಂತರ ಮಹಿಳೆಯರಿಗೆ ಸ್ಪೂರ್ತಿಯಾಗಿದ್ದಾರೆ.

 ಗುಜರಾತ್ ರಾಜ್ಯದ ಸೂರತ್ ನಗರದಲ್ಲಿ ವಾಸಿಸುತ್ತಿರುವ ಬಕುಳ ಬೆನ್ ಅತ್ಯಂತ ಚಿಕ್ಕ ವಯಸ್ಸಿನಲ್ಲಿಯೇ ಪಾಲಕರನ್ನು ಕಳೆದುಕೊಂಡ ಕಾರಣ ಆಕೆಯ ವಿದ್ಯಾಭ್ಯಾಸ ಮೊಟಕುಗೊಂಡಿತು. ಸಂಬಂಧಿಕರ ಆಶ್ರಯದಲ್ಲಿ ಬೆಳೆದ ಬಕುಳ ಬೆನ್  ಕನಸುಗಳು ನನಸಾಗುವುದು ಸಾಧ್ಯವೇ ಇರಲಿಲ್ಲ. ಚಿಕ್ಕಂದಿನಿಂದಲೂ ಆಟೋಟಗಳಲ್ಲಿ ಆಸಕ್ತಿಯನ್ನು ಹೊಂದಿದ್ದ  ಬಕುಳ ಅವರ ವಿವಾಹ ಆಕೆ 9ನೇ ತರಗತಿಯಲ್ಲಿ ಇದ್ದಾಗಲೇ ನೆರವೇರಿತು. 50 ರ ಹರೆ ಯದವರೆಗೆ ಆಕೆ ಓರ್ವ ಸಾಮಾನ್ಯ ಗುಜರಾತಿ ಗೃಹಿಣಿಯಂತೆ ಗಂಡ, ಮನೆ, ಮಕ್ಕಳು, ಸಂಸಾರ ಮತ್ತು ಅಡುಗೆ ಕೆಲಸಗಳಲ್ಲಿ ತನ್ನನ್ನು ತಾನು ತೊಡಗಿಸಿಕೊಂಡು ಜೀವನ ಸಾಗಿಸಿದಳು.

 ಪತಿಯ ಮರಣ ನಂತರ ಒಂಟಿಯಾದ ಆಕೆ ತನ್ನ 59ರ ಹರೆಯದಲ್ಲಿ ಈಜು ಕ್ರೀಡೆಯೆಡೆ ಆಸಕ್ತಿ ತೋರಿದಳು.ಬಕುಳ ಬೆನ್ ಗೆ ಈ ವಯಸ್ಸಿನಲ್ಲಿ ಈಜುವುದು ಸಾಮಾನ್ಯ ಸಾಧನೆ ಆಗಿರಲಿಲ್ಲ. ಆದರೆ ಆಕೆ ಈಜು ಕಲಿಯಲು ಹೋಗುತ್ತಿದ್ದ ಅಕಾಡೆಮಿಯಲ್ಲಿ ವಯಸ್ಸಿನ ಪರಿಮಿತಿ ಇರಲಿಲ್ಲವಾಗಿ ಬಕುಳ ಬೆನ್ ಈಜನ್ನು ನಿರಾಯಾಸವಾಗಿ  ಕಲಿತರು.

 ಮುಂದೆ ನಡೆದದ್ದು ಯಶಸ್ಸಿನ ನಾಗಾಲೋಟದ ಪಯಣ. 80ರ ಹರೆಯಕ್ಕೆ 16 ದೇಶಗಳ ಸುಮಾರು 500ಕ್ಕೂ ಹೆಚ್ಚು ಮೆಡಲುಗಳನ್ನು ಮತ್ತು ಟ್ರೋಫಿಗಳನ್ನು ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಟ್ಟಗಳಲ್ಲಿ ಪಡೆದಿರುವ ಬಕುಳ ಬೆನ್ ಅಟ್ಲಾಂಟಿಕ್ ಸಾಗರ, ಪೆಸಿಫಿಕ್ ಸಾಗರ ಮತ್ತು ಬಂಗಾಳಕೊಲ್ಲಿಗಳಲ್ಲಿ ಕೂಡ ಈಜಿದ್ದಾರೆ. ಬಂಗಾಳಕೊಲ್ಲಿಯ ಸಮುದ್ರದಲ್ಲಿ 19 km ದೂರದವರೆಗೆ ಈಜಿ ದಾಖಲೆ ಸ್ಥಾಪಿಸಿದ್ದಾರೆ.

 ಶಾಸ್ತ್ರೀಯ ನೃತ್ಯ ಭರತನಾಟ್ಯದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿರುವ ಬಕುಳ ಬೆನ್ ತಮ್ಮ ಎಪ್ಪತೈದನೇ ವಯಸ್ಸಿನಲ್ಲಿ ಸುಮಾರು ಎರಡೂವರೆ ಗಂಟೆಗಳ ಕಾಲ ವೇದಿಕೆಯ ಮೇಲೆ ಮೇಲೆ ನೃತ್ಯ ಮಾಡಿ ಲಿಮ್ಕಾ ಬುಕ್ ಆಫ್ ರೆಕಾರ್ಡ್ ನಲ್ಲಿ ದಾಖಲೆ ಸ್ಥಾಪಿಸಿದ್ದಾರೆ.

 ತನ್ನ ಆರೋಗ್ಯವನ್ನು ಕಾಯ್ದುಕೊಳ್ಳಲು ನಸುಕಿನ ನಾಲ್ಕು ಗಂಟೆಗೆ ಏಳುವ ಬಕುಳ  ಬೆನ್ 5 ಕಿ.ಮೀ ವಾಕಿಂಗ್ ಮಾಡುತ್ತಾರೆ. ಯೋಗ ಮತ್ತು ಸೈಕ್ಲಿಂಗ್ ನಲ್ಲಿಯೂ ಆಕೆ ಸಿದ್ದಹಸ್ತಳು, ಪ್ರತಿದಿನ ಈಜುವ ಆಕೆ ಮ್ಯಾರಥಾನ್ಗಳಲ್ಲಿ ಕೂಡ ಪಾಲ್ಗೊಂಡಿದ್ದಾರೆ.

 ಇಂದಿಗೂ ಕೂಡ ತನ್ನ ಮನೆಯ ಎಲ್ಲಾ ಕೆಲಸ ಕಾರ್ಯಗಳನ್ನು ಮಾಡಿಕೊಳ್ಳುವ ಆಕೆ ತನ್ನ ದಿನಚರಿಗಳಲ್ಲಿ ವ್ಯಸ್ತಳಾಗಿದ್ದು ಒಂಟಿತನ ಆಕೆಯನ್ನು ಬಾಧಿಸುವುದಿಲ್ಲ. ಇದೀಗ ಈಜು ತರಬೇತುದಾರಳಾಗಿಯೂ ಕಾರ್ಯನಿರ್ವಹಿಸುತ್ತಿರುವ ಆಕೆ ಎಲ್ಲರಿಗೂ ಸ್ಪೂರ್ತಿಯಾಗಿದ್ದಾಳೆ.

 ಮದುವೆಯಾಗಿ ಎರಡು ಮಕ್ಕಳಾದ ಕೂಡಲೇ ಜೀವನವೇ ಮುಗಿದು ಹೋಯಿತು ಎಂದು ಭಾವಿಸುವ ಸಾಕಷ್ಟು ಮಹಿಳೆಯರು ನಮ್ಮ ನಡುವೆ ಇದ್ದು ಅವರು ಬಕುಳ ಬೆನ್ ಅವರ ಜೀವನದಿಂದ ಸಾಕಷ್ಟು ಕಲಿಯಬಹುದು.
 ಬದುಕಿನ ಮುಕ್ಕಾಲು ಭಾಗವನ್ನು ಕಳೆದ ಬಕುಳ ಬೆನ್ ಪತಿಯ ಮರಣದ ನಂತರ ಕ್ರೀಡೆಯಲ್ಲಿ ಆಸಕ್ತಿಯನ್ನು ವಹಿಸಿ ತನ್ನ ಜೀವನಕ್ಕೆ ಒಂದು  ಉದ್ದೇಶ ಮತ್ತು ಗುರಿಯನ್ನು ಹೊಂದಿದ್ದು ಈಗಿನ ಯುವ ಜನಾಂಗಕ್ಕೆ ಮತ್ತು ಮಹಿಳಾ ಸಂಕುಲಕ್ಕೆ ಮಾದರಿಯಾಗಿದ್ದಾಳೆ.

 ತ್ರೆತಾಯುಗದಲ್ಲಿ ಪ್ರಭು ಶ್ರೀ ರಾಮನನ್ನು ಕಾಣಬೇಕೆಂಬ ಏಕೈಕ ಉದ್ದೇಶದಿಂದ, ಆತ ಬಂದೇ ಬರುವನೆಂಬ ನಂಬಿಕೆಯಿಂದ  ವರ್ಷಾನುಗಟ್ಟಲೆ ಕಾಯ್ದ ಶಬರಿಯ ಭಕ್ತಿ ಮತ್ತು ಶ್ರದ್ಧೆಯ ಕಥೆ ನಾವೆಲ್ಲ ಕೇಳಿದ್ದೀವಷ್ಟೇ. ಆಕೆಯ ಭಕ್ತಿಯನ್ನು ಪುರಾಣ ಕಾವ್ಯಗಳಲ್ಲಿ ವರ್ಣಿಸಿರುವ ಕವಿಗಳು ಅದೆಷ್ಟೋ. ಸಾಕ್ಷಾತ್ ಪ್ರಭು ಶ್ರೀರಾಮಚಂದ್ರನು ಆಕೆ ವಾಸಿಸುತ್ತಿದ್ದ ಬೆಟ್ಟವನ್ನು ಶಬರಿಮಲೆ ಎಂದು ಕರೆದು ಆಕೆಯನ್ನು ಗೌರವಿಸಿದನಲ್ಲವೇ?

 ಆಗದು ಎಂದು ಕೈಕಟ್ಟಿ ಕುಳಿತರೆ ಸಾಗದು ಕೆಲಸವು ಮುಂದೆ…. ಮನಸೊಂದಿದ್ದರೆ ಮಾರ್ಗವು ಉಂಟು
 ಎಂದು ಕನ್ನಡದ ಕಣ್ಮಣಿ, ಕನ್ನಡಿಗರ ಪಾಲಿನ ಅಭಿಮಾನದ ದೇವರು ವರನಟ ಡಾಕ್ಟರ್ ರಾಜ್ ತಮ್ಮ ಚಲನಚಿತ್ರ ಬಂಗಾರದ ಮನುಷ್ಯ ಚಿತ್ರದಲ್ಲಿ ಹಾಡಿದಾಗ ಅದರಿಂದ ಸ್ಪೂರ್ತಿಗೊಂಡ ಸಾಕಷ್ಟು ಜನ ಒಕ್ಕಲುತನದತ್ತ ಮುಖ ಮಾಡಿದ್ದು ಐತಿಹಾಸಿಕ ಸಾಧನೆಯಾಗಿ ಕನ್ನಡಿಗರ ಮನದಲ್ಲಿ ಉಳಿದು ಹೋಗಿದೆ.

 ಐದು ವರ್ಷದ ಪುಟ್ಟ ಬಾಲಕ ದ್ರುವ ತನ್ನ ಅಚಲ ಶ್ರದ್ಧೆ ಮತ್ತು ಭಕ್ತಿಯಿಂದ ಮಹಾವಿಷ್ಣುವನ್ನು ಉಳಿಸಿಕೊಂಡರೆ, ಸೂರ್ಯವಂಶದ ರಾಜ ಪ್ರಭು ಶ್ರೀರಾಮಚಂದ್ರನ ಪಿತಾಮಹರಾದ ಭಗೀರಥ ಮಹಾರಾಜನು ತನ್ನ ಪಿತೃಗಳ ಆತ್ಮ ಶಾಂತಿಗಾಗಿ ಕಠಿಣ ತಪಗೈದು ದೇವಲೋಕದಿಂದ ಗಂಗೆಯನ್ನು  ಭೂಮಿಗೆ ಹರಿಯುವಂತೆ ಮಾಡಿ ಶ್ರದ್ಧೆ, ನಿಷ್ಠೆ ಮತ್ತು ಬದ್ಧತೆಯುಳ್ಳ ಪ್ರಯತ್ನಕ್ಕೆ ಮತ್ತೊಂದು ಹೆಸರೇ ‘ಭಗೀರಥ ಪ್ರಯತ್ನ’ ಎಂಬಂತೆ ಇಂದಿಗೂ ನಮ್ಮ ಜನರ ಆಡು ಮಾತಿನಲ್ಲಿ ಸಾವಿರಾರು ವರ್ಷಗಳು ಸಂದರೂ ಅಜರಾಮರನಾಗಿದ್ದಾನೆ.

 ಮತ್ತೆ ಕೆ ತಡ ಸ್ನೇಹಿತರೆ? ಸಾಧನೆಗೆ ವಯಸ್ಸಿನ ಹಂಗಿಲ್ಲ. ಏನನ್ನಾದರೂ ಸಾಧಿಸುವ ಮನಸಿದ್ದರೆ ಇಂದೇ ಈಗಲೇ ನಿಮ್ಮ ಮನಸ್ಸನ್ನು ಸಾಧನೆಯ ಶಿಖರವನ್ನೇರಲು ಸಜ್ಜುಗೊಳಿಸಿ… ನಿರಂತರ ಪ್ರಯತ್ನ ಯಾವತ್ತೂ ಕೈ ಬಿಡುವುದಿಲ್ಲ. ಎಂಬುದನ್ನು ಸಾಧಿಸಿ ತೋರಿಸಿ.

---

 ವೀಣಾ ಹೇಮಂತ್ ಗೌಡ ಪಾಟೀಲ್ 

ವೀಣಾ ಹೇಮಂತ್ ಗೌಡ ಪಾಟೀಲ್ ಅವರು ಗದಗ ಜಿಲ್ಲೆಯ ಮುಂಡರಗಿ ನಿವಾಸಿಯಾಗಿದ್ದು, ಮನಃಶಾಸ್ತ್ರ ಮತ್ತು ಮಾನವ ವಿಕಾಸ ಶಾಸ್ತ್ರಗಳಲ್ಲಿ ಪದವಿ ಪಡೆದಿದ್ದಾರೆ. ಚೈತನ್ಯ ಶಿಕ್ಷಣ ಸಂಸ್ಥೆಯನ್ನು 2009ರಲ್ಲಿ ಸ್ಥಾಪಿಸಿರುವ ಇವರು ಅಬಾಕಸ್ ಮತ್ತು ವೇದಗಣಿತಗಳನ್ನು ಮಕ್ಕಳಿಗೆ ಹೇಳಿಕೊಡುತ್ತಾರೆ. ಇದರ ಜೊತೆಗೆ ಚೈತನ್ಯ ಡ್ಯಾನ್ಸ್ ತರಗತಿಗಳನ್ನು ಕೂಡ ನಡೆಸುತ್ತಿರುವ ಇವರು ಭರತನಾಟ್ಯ, ಕಥಕ್ ಮತ್ತು ಪಾಶ್ಚಾತ್ಯ ನೃತ್ಯಗಳಲ್ಲಿ ಮಕ್ಕಳಿಗೆ ತರಬೇತಿ ನೀಡಲು ಶಿಕ್ಷಕರನ್ನು ನೇಮಕ ಮಾಡಿಕೊಂಡಿದ್ದಾರೆ. ಚೈತನ್ಯ ಸಂಗೀತ ಶಿಕ್ಷಣ ತರಗತಿಗಳು ಮತ್ತು ಚೈತನ್ಯ ನರ್ಸರಿ ತರಬೇತಿ ಸಂಸ್ಥೆಯನ್ನು ನಡೆಸುತ್ತಿರುವ ಇವರು ದೆಹಲಿ ಯೂನಿವರ್ಸಿಟಿಯ ನರ್ಸರಿ ತರಬೇತಿ ಸಂಸ್ಥೆಯ ದಕ್ಷಿಣ ಭಾರತ ವಿಭಾಗಕ್ಕೆ ಮೊದಲ ರ್ಯಾಂಕ್ ಗಳಿಸಿದ ವಿದ್ಯಾರ್ಥಿನಿಯಾಗಿದ್ದಾರೆ. ಚೈತನ್ಯ ಪ್ಲೇ ಹೋಮ್ ಆಪಿಸಿರುವ ಇವರು ಉದ್ಯೋಗಸ್ಥ ಪಾಲಕರ ಮಕ್ಕಳನ್ನು ಪಾಲಿಸುತ್ತಿರುವುದು ಗ್ರಾಮೀಣ ಪ್ರದೇಶದಲ್ಲಿ ಒಳ್ಳೆಯ ಅನುಕೂಲವನ್ನು ಕಲ್ಪಿಸಿದಂತಾಗಿದೆ. ಚಿಕ್ಕಂದಿನಿಂದಲೂ ಕಲೆ, ಸಾಹಿತ್ಯ, ಸಂಸ್ಕೃತಿ,ಕ್ರೀಡೆ, ನಾಟಕ ಮತ್ತು ರಂಗ ಚಟುವಟಿಕೆಗಳಲ್ಲಿ ಆಸಕ್ತಿ ಹೊಂದಿರುವ ಇವರು ಇತಿಹಾಸ ವಿಜ್ಞಾನ ಗಣಿತ ಶರಣ ಸಾಹಿತ್ಯ ಮತ್ತು ಜನಪದ ಸಾಹಿತ್ಯಗಳಲ್ಲಿ ವಿಶೇಷ ಆಸಕ್ತಿಯನ್ನು ಹೊಂದಿರುವ ಇವರು ವೈವಿಧ್ಯಮಯ ವಿಷಯಗಳು ಕುರಿತು ವ್ಯಕ್ತಿ ಚಿತ್ರಣ, ಮಹಿಳೆ ಮತ್ತು ಮಕ್ಕಳ ಮನೋ ದೈಹಿಕ ಬೆಳವಣಿಗೆ, ಐತಿಹಾಸಿಕ ಮತ್ತು ಸಾಮಾಜಿಕ ವಿಷಯಗಳ ಕುರಿತು ಸಾವಿರಕ್ಕೂ ಹೆಚ್ಚು ಲೇಖನಗಳನ್ನು ಬರೆದಿದ್ದಾರೆ. ಕಳೆದ ವರ್ಷ ಇವರದೇ ಲೇಖನಗಳ ವೀಣಾಂತರಂಗ ಎಂಬ ಪುಸ್ತಕ ಬಿಡುಗಡೆಯಾಗಿದ್ದು ಜನಮನ್ನಣೆ ಗಳಿಸಿದೆ. ಕಳೆದ 18 ವರ್ಷಗಳಿಂದ ಪ್ರತಿದಿನ ಯೋಗ ಅಭ್ಯಾಸ ಮಾಡುತ್ತಿರುವ ಇವರು ಚೈತನ್ಯ ಫಿಟ್ನೆಸ್ ಸೆಂಟರ್ ಎಂಬ ಸಂಸ್ಥೆಯನ್ನು ಕಳೆದ ಹತ್ತು ವರ್ಷಗಳಿಂದ ನಡೆಸುತ್ತಿದ್ದಾರೆ. ಬೇಸಿಗೆ ರಜೆಯಲ್ಲಿ ಮಕ್ಕಳಿಗೆ ಬೇಸಿಗೆ ಶಿಬಿರಗಳನ್ನು ನಡೆಸುವ ಇವರು ಹಲವಾರು ಕ್ರಿಯಾತ್ಮಕ ಚಟುವಟಿಕೆಗಳನ್ನು ಕೈಗೊಳ್ಳುತ್ತಾರೆ. 2015, 2016 ಮತ್ತು 2018ರಲ್ಲಿ ಅಖಿಲ ಭಾರತೀಯ ಸಾಂಸ್ಕೃತಿಕ ಸಂಘ, ಪುಣೆಯಲ್ಲಿ ನಡೆಸುವ ದೇಶದ ಎಲ್ಲ ರಾಜ್ಯಗಳ ಸಾವಿರಾರು ಜನ ಭಾಗವಹಿಸುವ ಸ್ಪರ್ಧೆಯಲ್ಲಿ ಜಾನಪದ ವಿಭಾಗದಲ್ಲಿ ತೃತೀಯ ಮತ್ತು ಸಮಾಧಾನಕರ ಬಹುಮಾನಗಳನ್ನು ಪಡೆದಿದ್ದಾರೆ.
ಬಹುಮುಖ ಪ್ರತಿಭೆಯ ಶ್ರೀಮತಿ ವೀಣಾ ಪಾಟೀಲ್ ಅವರು ಮುಂಡರಗಿ ತಾಲೂಕಿನ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿಯು ಆಗಿದ್ದು ನೂರಾರು ಸಾಹಿತ್ಯ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುತ್ತಾರೆ.
ಉದ್ದಿಮೆದಾರರಾಗಿರುವ ಇವರ ಪತಿ ಹೇಮಂತ್ ಗೌಡ ಪಾಟೀಲ್, ತಂದೆಯ ಉದ್ಯಮ ಮತ್ತು ಕೃಷಿಯಲ್ಲಿ ಕೈ ಜೋಡಿಸಿರುವ ಮಗ ಅಂಕಿತ್ ಪಾಟೀಲ್ ಮತ್ತು ಸೊಸೆ ವರ್ಷ ಪಾಟೀಲ್ ಮೂವರು ಇಂಜಿನಿಯರ್ ಪದವೀಧರರಾಗಿದ್ದು, ಮಗಳು ಎಂಬಿಎ ಓದುತ್ತಿರುವ ಕುಮಾರಿ ನಿಶಾ ಪಾಟೀಲ್ ಹೀಗೆ ಕುಟುಂಬದ ಸದಸ್ಯರೆಲ್ಲರೂ ವೀಣಾ ಪಾಟೀಲ್ ಅವರ ಎಲ್ಲ ಕಾರ್ಯ ಚಟುವಟಿಕೆಗಳಿಗೆ ಬೆಂಬಲವಾಗಿ ನಿಂತಿದ್ದಾರೆ. ಹಲವಾರು ಪ್ರಶಸ್ತಿ ಪುರಸ್ಕಾರಗಳನ್ನು ತಮ್ಮ ಸಾಹಿತ್ಯಕ ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಪಡೆದಿರುವ ವೀಣಾ ಹೇಮಂತ್ ಗೌಡ ಪಾಟೀಲ್ ಅವರು ಒಳ್ಳೆಯ ಸದ್ಗೃಹಿಣಿಯಾಗಿದ್ದು ಕುಟುಂಬ ಮತ್ತು ಪ್ರವೃತ್ತಿಗಳೆರಡರಲ್ಲೂ ಸಮತೋಲನವನ್ನು ಕಾಯ್ದುಕೊಂಡಿದ್ದು ಮುಂಡರಗಿಯ ಸುಧಾ ಮೂರ್ತಿ ಎಂಬ ಹೆಸರಿನಿಂದ ಕರೆಯಲ್ಪಡುತ್ತಾರೆ.