ದೈನಂದಿನ ಸಂಗಾತಿ
ವೀಣಾ ವಾಣಿ
ವೀಣಾ ಹೇಮಂತ್ ಗೌಡ ಪಾಟೀಲ್
ಯಶಸ್ಸಿನ ಪಯಣ
ಸಾಧನೆ ಮಾಡಲು ಮಹಲುಗಳು ಬೇಕಿಲ್ಲ, ದುಡ್ಡು ದುಗ್ಗಾಣಿಗಳು ಅಷ್ಟೇನು ಮುಖ್ಯವಲ್ಲ… ಸಾಧಿಸುವ ಛಲವೊಂದಿದ್ದರೆ ಸಾಕು ಎಂಬುದಕ್ಕೆ ಸಾಕ್ಷಿಯಾಗಿ ನಿಂತಿದ್ದಾಳೆ ಪ್ರೇಮ ಜಯ್ ಕುಮಾರ್ ಎಂಬ ಯುವತಿ. ಮುಂಬೈ ನಗರದ ಚಾಳ್ ಒಂದರಲ್ಲಿ ವಾಸವಾಗಿರುವ ಆಟೋರಿಕ್ಷಾ ಚಾಲಕರ ಪುತ್ರಿಯಾಗಿರುವ ಪ್ರೇಮ ಬದುಕು ಒಡ್ಡಿದ ಎಲ್ಲಾ ಸವಾಲುಗಳನ್ನು ಎದುರಿಸಿ ಇದೀಗ ಅಖಿಲ ಭಾರತ ಚಾರ್ಟೆಡ್ ಅಕೌಂಟೆಂಟ್ ಪರೀಕ್ಷೆಯನ್ನು ಅತ್ಯುನ್ನತ ಅಂಕಗಳೊಂದಿಗೆ ಪೂರೈಸಿ ಆ ಕ್ಷೇತ್ರದಲ್ಲಿ ತನ್ನ ಹೆಸರನ್ನು ದಾಖಲಿಸಿ ಇತಿಹಾಸವಾಗಿದ್ದಾಳೆ.
ಮುಂಬೈಯ ಮಲಾಡ್ ಎಂಬ ಭಾಗದಲ್ಲಿ ಒಂದೇ ಕೋಣೆಯ ಮನೆಯಲ್ಲಿ ತನ್ನ ಪಾಲಕರು ಮತ್ತು ಸಹೋದರರೊಂದಿಗೆ ವಾಸಿಸುತ್ತಿರುವ ಪ್ರೇಮ ಅವರ ತಂದೆ ಜಯಕುಮಾರ್ ತಮಿಳುನಾಡು ಮೂಲದವರಾಗಿದ್ದು ಬದುಕಿನ ಬಂಡಿಯನ್ನು ಸಾಗಿಸಲು ಮಹಾರಾಷ್ಟ್ರದ ಮುಂಬೈಗೆ ವಲಸೆ ಬಂದಿದ್ದಾರೆ.ಚಿಕ್ಕಂದಿನಿಂದಲೂ ಪ್ರತಿಭಾವಂತ ವಿದ್ಯಾರ್ಥಿನಿಯಾಗಿದ್ದು ನಾನು ಓದುತ್ತಿರುವ ಶಾಲೆಯ ಎಲ್ಲ ಚಟುವಟಿಕೆಗಳಲ್ಲಿ ಮಂಚೂಣಿಯಲ್ಲಿ ಇರುತ್ತಿದ್ದಳು.
ಪ್ರೇಮ ತನ್ನ ಸಹೋದರ ಹೈಯರ್ ಸೆಕೆಂಡರಿಯಲ್ಲಿ ಓದುತ್ತಿರುವಾಗಲೇ ಸಿ ಎ ಪರೀಕ್ಷೆಗೆ ತಯಾರಾಗುತ್ತಿರುವುದನ್ನು ನೋಡುತ್ತಿದ್ದಳು… ತಾನು ಕೂಡ ಆ ಪರೀಕ್ಷೆಯನ್ನು ಪಾಸಾಗಬೇಕೆಂಬ ಮಹದಾಕಾಂಕ್ಷೆ ಆಕೆಯದಾಗಿತ್ತು.
2008ರಲ್ಲಿ ಮುಂಬೈಯ ನಾಗಿನ್ ದಾಸ್ ಕಂಡೇಲ್ ವಾಲ ಕಾಲೇಜಿನಲ್ಲಿ ಬಿಕಾಂ ಪದವಿಯನ್ನು 90 ಅಂಕಗಳೊಂದಿಗೆ ಪೂರೈಸಿದ ಪ್ರೇಮ ಮುಂದೆ 2010ರಲ್ಲಿ ಮುಂಬೈ ವಿಶ್ವವಿದ್ಯಾಲಯದ ಎಂಕಾಂ ಸ್ನಾತಕೋತ್ತರ ಪದವಿಯನ್ನು ಕೂಡ ಯಶಸ್ವಿಯಾಗಿ ಪೂರೈಸಿದಳು.
ಪ್ರೇಮಾಳ ಸಹೋದರ ಧನರಾಜ ಕೂಡ ತನ್ನ ಬಿಕಾಂ ಪದವಿಯ ನಂತರ ಕಾಲ್ ಸೆಂಟರ್ ಒಂದರಲ್ಲಿ ಕಾರ್ಯನಿರ್ವಹಿಸುತ್ತಲೇ ಪರೀಕ್ಷೆಗೆ ತಯಾರಿ ನಡೆಸಿದ. ಮೊದಲ ಬಾರಿ ಇಬ್ಬರು ಸಿಎ ಪರೀಕ್ಷೆಗೆ ಕಟ್ಟಿದರು.ಆತ ಕಲೆ ಹಾಕಿದ ಮಾಹಿತಿಗಳನ್ನು ಅವರಿಬ್ಬರೂ ಒಟ್ಟಾಗಿ ಓದಿ ಚರ್ಚೆ ಮಾಡಿ ಪರೀಕ್ಷೆಗೆ ತಯಾರಾದರು.
2008 ರಲ್ಲಿಯೇ ಸಿಪಿಟಿ (ಕಾಮನ್ ಪ್ರೊಫೆಶಿಯನ್ಸಿ ಟೆಸ್ಟ್) ಪ್ರವೇಶ ಪರೀಕ್ಷೆಯಲ್ಲಿ ಪಾಸಾದ ಆಕೆ ಇಂಟಿಗ್ರೇಟೆಡ್ ಪ್ರೊಫೆಶಿಯನ್ಸಿ ಟೆಸ್ಟ್ನಲ್ಲಿಯೂ ಕೂಡ ಪಾಸಾಗಿ ಆರ್ಟಿಕಲ್ ಶಿಪ್ ಮತ್ತು ಸಿಎ ಪರೀಕ್ಷೆಗೆ ಅರ್ಹತೆಯನ್ನು ಗಳಿಸಿದಳು.
ಬೆಳಗಿನ ಜಾವ 7:30 ರಿಂದ ಮಧ್ಯ ರಾತ್ರಿಯವರೆಗೆ ಸತತವಾಗಿ ಓದುತ್ತಿದ್ದ ಆಕೆ ರಾತ್ರಿ ಮಲಗುವ ಮುನ್ನ ಅರ್ಧ ಗಂಟೆ ಟಿವಿ ನೋಡುವ ಮೂಲಕ ತನ್ನ ಏಕತಾನತೆಯನ್ನು ದೂರ ಮಾಡಿಕೊಳ್ಳುತ್ತಿದ್ದಳು. ಚೆನ್ನಾಗಿ ಓದಿ ಒಳ್ಳೆಯ ರಾಂಕ್ ಗಳಿಸಬೇಕು ಎಂಬ ಆಸೆ ಇದ್ದರೆ ನಿದ್ರೆಯೂ ಅಷ್ಟೇ ಅವಶ್ಯಕತೆ ಎಂಬುದನ್ನು ಆಕೆ ಒತ್ತಿ ಹೇಳುತ್ತಾರೆ
ಮುಂದೆ 2012ರಲ್ಲಿ ನಡೆದ ಸಿಎ ಪರೀಕ್ಷೆಯಲ್ಲಿ ಮೊದಲ ಬಾರಿ ಪರೀಕ್ಷೆಯನ್ನು ಬರೆದ ಆಕೆ ಒಟ್ಟು 800 ಅಂಕಗಳಲ್ಲಿ 607 ಅಂಕಗಳನ್ನು ಪಡೆದು ದೇಶದ ಚಾರ್ಟೆಡ್ ಅಕೌಂಟೆನ್ಸಿ ಪರೀಕ್ಷೆಯ ಮೊತ್ತ ಮೊದಲ ಪ್ರಯತ್ನದಲ್ಲಿ ಗೆಲುವು ಸಾಧಿಸಿರುವ ಪ್ರೇಮಾ ಜಯಕುಮಾರ್ ಅವರು ಪ್ರಸ್ತುತ ಮುಂಬೈಯಲ್ಲಿ ಚಾರ್ಟೆಡ್ ಅಕೌಂಟೆಂಟ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.
ಪಾಲಕರ ಬೆಂಬಲ ಮತ್ತು ಪ್ರೋತ್ಸಾಹ ಗುರಿಯನ್ನು ಸಾಧಿಸುವ ಛಲ ಮತ್ತು ಹಂಬಲ, ಸತತ ಪರಿಶ್ರಮ ಪಟ್ಟ ಪರಿಣಾಮವಾಗಿ ಇಂದು ಒಳ್ಳೆಯ ಜೀವನ ತಮ್ಮದಾಗಿದೆ ಎಂದು ಆಕೆ ಹೇಳುತ್ತಾರೆ.
ನೋಡಿದಿರಾ ಸ್ನೇಹಿತರೆ, ಪ್ರತಿ ಸಾಧನೆಯು ಒಂದು ತಪಸ್ಸಿನಂತೆ. ಪ್ರತಿಯೊಬ್ಬ ಸಾಧಕನು ಯಶಸ್ಸನ್ನು ಪಡೆಯಲು ಸತತವಾಗಿ ಅಭ್ಯಾಸ ಮಾಡಲೇಬೇಕು,
“ಶ್ರದ್ಧಾ ವಾನ್ ಲಭತೇ ಜಯಂ” ಎಂಬ ಮಾತಿನಂತೆ
ಶ್ರದ್ಧೆಯಿಂದ ಕಾರ್ಯನಿರ್ವಹಿಸುವವರಿಗೆ ಖಂಡಿತವಾಗಿಯೂ ಜಯವಿದೆ ಅಲ್ಲವೇ.
ವೀಣಾ ಹೇಮಂತ್ ಗೌಡ ಪಾಟೀಲ್
ವೀಣಾ ಹೇಮಂತ್ ಗೌಡ ಪಾಟೀಲ್ ಅವರು ಗದಗ ಜಿಲ್ಲೆಯ ಮುಂಡರಗಿ ನಿವಾಸಿಯಾಗಿದ್ದು, ಮನಃಶಾಸ್ತ್ರ ಮತ್ತು ಮಾನವ ವಿಕಾಸ ಶಾಸ್ತ್ರಗಳಲ್ಲಿ ಪದವಿ ಪಡೆದಿದ್ದಾರೆ. ಚೈತನ್ಯ ಶಿಕ್ಷಣ ಸಂಸ್ಥೆಯನ್ನು 2009ರಲ್ಲಿ ಸ್ಥಾಪಿಸಿರುವ ಇವರು ಅಬಾಕಸ್ ಮತ್ತು ವೇದಗಣಿತಗಳನ್ನು ಮಕ್ಕಳಿಗೆ ಹೇಳಿಕೊಡುತ್ತಾರೆ. ಇದರ ಜೊತೆಗೆ ಚೈತನ್ಯ ಡ್ಯಾನ್ಸ್ ತರಗತಿಗಳನ್ನು ಕೂಡ ನಡೆಸುತ್ತಿರುವ ಇವರು ಭರತನಾಟ್ಯ, ಕಥಕ್ ಮತ್ತು ಪಾಶ್ಚಾತ್ಯ ನೃತ್ಯಗಳಲ್ಲಿ ಮಕ್ಕಳಿಗೆ ತರಬೇತಿ ನೀಡಲು ಶಿಕ್ಷಕರನ್ನು ನೇಮಕ ಮಾಡಿಕೊಂಡಿದ್ದಾರೆ. ಚೈತನ್ಯ ಸಂಗೀತ ಶಿಕ್ಷಣ ತರಗತಿಗಳು ಮತ್ತು ಚೈತನ್ಯ ನರ್ಸರಿ ತರಬೇತಿ ಸಂಸ್ಥೆಯನ್ನು ನಡೆಸುತ್ತಿರುವ ಇವರು ದೆಹಲಿ ಯೂನಿವರ್ಸಿಟಿಯ ನರ್ಸರಿ ತರಬೇತಿ ಸಂಸ್ಥೆಯ ದಕ್ಷಿಣ ಭಾರತ ವಿಭಾಗಕ್ಕೆ ಮೊದಲ ರ್ಯಾಂಕ್ ಗಳಿಸಿದ ವಿದ್ಯಾರ್ಥಿನಿಯಾಗಿದ್ದಾರೆ. ಚೈತನ್ಯ ಪ್ಲೇ ಹೋಮ್ ಆಪಿಸಿರುವ ಇವರು ಉದ್ಯೋಗಸ್ಥ ಪಾಲಕರ ಮಕ್ಕಳನ್ನು ಪಾಲಿಸುತ್ತಿರುವುದು ಗ್ರಾಮೀಣ ಪ್ರದೇಶದಲ್ಲಿ ಒಳ್ಳೆಯ ಅನುಕೂಲವನ್ನು ಕಲ್ಪಿಸಿದಂತಾಗಿದೆ. ಚಿಕ್ಕಂದಿನಿಂದಲೂ ಕಲೆ, ಸಾಹಿತ್ಯ, ಸಂಸ್ಕೃತಿ,ಕ್ರೀಡೆ, ನಾಟಕ ಮತ್ತು ರಂಗ ಚಟುವಟಿಕೆಗಳಲ್ಲಿ ಆಸಕ್ತಿ ಹೊಂದಿರುವ ಇವರು ಇತಿಹಾಸ ವಿಜ್ಞಾನ ಗಣಿತ ಶರಣ ಸಾಹಿತ್ಯ ಮತ್ತು ಜನಪದ ಸಾಹಿತ್ಯಗಳಲ್ಲಿ ವಿಶೇಷ ಆಸಕ್ತಿಯನ್ನು ಹೊಂದಿರುವ ಇವರು ವೈವಿಧ್ಯಮಯ ವಿಷಯಗಳು ಕುರಿತು ವ್ಯಕ್ತಿ ಚಿತ್ರಣ, ಮಹಿಳೆ ಮತ್ತು ಮಕ್ಕಳ ಮನೋ ದೈಹಿಕ ಬೆಳವಣಿಗೆ, ಐತಿಹಾಸಿಕ ಮತ್ತು ಸಾಮಾಜಿಕ ವಿಷಯಗಳ ಕುರಿತು ಸಾವಿರಕ್ಕೂ ಹೆಚ್ಚು ಲೇಖನಗಳನ್ನು ಬರೆದಿದ್ದಾರೆ. ಕಳೆದ ವರ್ಷ ಇವರದೇ ಲೇಖನಗಳ ವೀಣಾಂತರಂಗ ಎಂಬ ಪುಸ್ತಕ ಬಿಡುಗಡೆಯಾಗಿದ್ದು ಜನಮನ್ನಣೆ ಗಳಿಸಿದೆ. ಕಳೆದ 18 ವರ್ಷಗಳಿಂದ ಪ್ರತಿದಿನ ಯೋಗ ಅಭ್ಯಾಸ ಮಾಡುತ್ತಿರುವ ಇವರು ಚೈತನ್ಯ ಫಿಟ್ನೆಸ್ ಸೆಂಟರ್ ಎಂಬ ಸಂಸ್ಥೆಯನ್ನು ಕಳೆದ ಹತ್ತು ವರ್ಷಗಳಿಂದ ನಡೆಸುತ್ತಿದ್ದಾರೆ. ಬೇಸಿಗೆ ರಜೆಯಲ್ಲಿ ಮಕ್ಕಳಿಗೆ ಬೇಸಿಗೆ ಶಿಬಿರಗಳನ್ನು ನಡೆಸುವ ಇವರು ಹಲವಾರು ಕ್ರಿಯಾತ್ಮಕ ಚಟುವಟಿಕೆಗಳನ್ನು ಕೈಗೊಳ್ಳುತ್ತಾರೆ. 2015, 2016 ಮತ್ತು 2018ರಲ್ಲಿ ಅಖಿಲ ಭಾರತೀಯ ಸಾಂಸ್ಕೃತಿಕ ಸಂಘ, ಪುಣೆಯಲ್ಲಿ ನಡೆಸುವ ದೇಶದ ಎಲ್ಲ ರಾಜ್ಯಗಳ ಸಾವಿರಾರು ಜನ ಭಾಗವಹಿಸುವ ಸ್ಪರ್ಧೆಯಲ್ಲಿ ಜಾನಪದ ವಿಭಾಗದಲ್ಲಿ ತೃತೀಯ ಮತ್ತು ಸಮಾಧಾನಕರ ಬಹುಮಾನಗಳನ್ನು ಪಡೆದಿದ್ದಾರೆ.
ಬಹುಮುಖ ಪ್ರತಿಭೆಯ ಶ್ರೀಮತಿ ವೀಣಾ ಪಾಟೀಲ್ ಅವರು ಮುಂಡರಗಿ ತಾಲೂಕಿನ ಸಾಹಿತ್ಯ ಪರಿಷತ್ತಿನ ಗೌರವ ಕಾರ್ಯದರ್ಶಿಯು ಆಗಿದ್ದು ನೂರಾರು ಸಾಹಿತ್ಯ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುತ್ತಾರೆ.
ಉದ್ದಿಮೆದಾರರಾಗಿರುವ ಇವರ ಪತಿ ಹೇಮಂತ್ ಗೌಡ ಪಾಟೀಲ್, ತಂದೆಯ ಉದ್ಯಮ ಮತ್ತು ಕೃಷಿಯಲ್ಲಿ ಕೈ ಜೋಡಿಸಿರುವ ಮಗ ಅಂಕಿತ್ ಪಾಟೀಲ್ ಮತ್ತು ಸೊಸೆ ವರ್ಷ ಪಾಟೀಲ್ ಮೂವರು ಇಂಜಿನಿಯರ್ ಪದವೀಧರರಾಗಿದ್ದು, ಮಗಳು ಎಂಬಿಎ ಓದುತ್ತಿರುವ ಕುಮಾರಿ ನಿಶಾ ಪಾಟೀಲ್ ಹೀಗೆ ಕುಟುಂಬದ ಸದಸ್ಯರೆಲ್ಲರೂ ವೀಣಾ ಪಾಟೀಲ್ ಅವರ ಎಲ್ಲ ಕಾರ್ಯ ಚಟುವಟಿಕೆಗಳಿಗೆ ಬೆಂಬಲವಾಗಿ ನಿಂತಿದ್ದಾರೆ. ಹಲವಾರು ಪ್ರಶಸ್ತಿ ಪುರಸ್ಕಾರಗಳನ್ನು ತಮ್ಮ ಸಾಹಿತ್ಯಕ ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಪಡೆದಿರುವ ವೀಣಾ ಹೇಮಂತ್ ಗೌಡ ಪಾಟೀಲ್ ಅವರು ಒಳ್ಳೆಯ ಸದ್ಗೃಹಿಣಿಯಾಗಿದ್ದು ಕುಟುಂಬ ಮತ್ತು ಪ್ರವೃತ್ತಿಗಳೆರಡರಲ್ಲೂ ಸಮತೋಲನವನ್ನು ಕಾಯ್ದುಕೊಂಡಿದ್ದು ಮುಂಡರಗಿಯ ಸುಧಾ ಮೂರ್ತಿ ಎಂಬ ಹೆಸರಿನಿಂದ ಕರೆಯಲ್ಪಡುತ್ತಾರೆ.
