ಅಬಲೆಯೆಂದು ನಿಟ್ಟುಸಿರು
ಬಿಡದಿರು ಓ ನನ್ನ ಗೆಳತಿ…
ಭವಿಷ್ಯದ ಬೇರಿನ ಗಿಡಗಳಿಗೆ
ನೀರೇರೆದು ಬೆಳೆಸುವ ಭೂಮಿಕೆಯೇ
ನೀನು…..

ಮೌನದ ಎಲೆಗಳ ಮೇಲೆ
ಮಾತನ್ನು ಉಣಬಡಿಸಿದವಳು ನೀನು……
ಯಾರಿಗೂ ಭಾರವಲ್ಲ ಹೆಣ್ಣು
ಜೀವರಾಶಿಯ ಕನಸುಗಳ ಹೊತ್ತು
ಬೆಳೆಸುವ ಆ ದೇಗುಲದ
ಹೊನ್ನ ಕಳಸವೇ ನೀನು…..

ಅಳುವ ಸಾಗರದಲ್ಲೂ
ನಗುವ ಬೀರಿದವಳು ನೀನು…
ಪ್ರತಿಫಲ ಬಯಸದ
ಓ ಹೆಣ್ಣು ಜೀವವೇ…
ಗರ್ಭ ಗುಡಿಯಲ್ಲಿ ಕುಳಿತು
ಭಾನೆತ್ತರದ ತೇರಾದವಳು ನೀನು…..

ಮಮತೆಗೆ ಬರವಿಲ್ಲ
ನಿಷ್ಕಲ್ಮಶ ಪ್ರೀತಿಗೆ ಬೆಲೆ ಕಟ್ಟುವವರಿಲ್ಲ…
ಮಾತೃತ್ವದ ಒಡಲಿಗೆ ಸರಿಸಮಾನರಾರಿಲ್ಲ….
ನಿನ್ನಂತರಾಳದ ಕಡಲ ತಲುಪಿದವರಾರಿಲ್ಲ……