ಕಾವ್ಯ ಸಂಗಾತಿ
ಮುಕ್ತಕ
ಜಯಲಕ್ಷ್ಮಿ ಎಂ ಬಿ
ಕೋಪವದು ಬಲುಕಠಿಣ ಮುರಿಯುವುದು ಸಂಬಂಧ
ಕೋಪವನು ತಾಳದಿರಿ ಬದುಕಿನಲ್ಲಿ
ಕೋಪದಲಿ ಕೈಗೊಂಡ ನಿರ್ಧಾರ ಸರಿಯಲ್ಲ
ಕೋಪಕ್ಕೆ ನೆಲೆಯಿಲ್ಲ ಬಸವೇಶ್ವರ
ಕರುಣೆಯಲಿ ನೋಡಿದೆಡೆ ಬಾಗುವುದು ಜಗದಜನ
ಮರುಕದಲಿ ತುಂಬಿರಲಿ ಮನದನುಡಿಯು
ಮುರಿಯದಿರಿ ಕೋಪದಲಿ ಹಸನಾದ ಬಾಳನ್ನು
ಮರೆಯದಿರಿ ನಗುವನ್ನು ಬಸವೇಶ್ವರ
ಮನದಲ್ಲಿ ಕಡುಕೋಪ ತಾಳದಿರಿ ನೀವೆಂದು
ವನದಲ್ಲಿ ಕಾಡ್ಗಿಚ್ಚು ಹಬ್ಬಿದಂತೆ
ಘನಗೋರ ಪಾಪವದು ಕಡುಗೋಪ ವೆಂದೆಂದು
ಮನನೊಂದು ಹಲುಬದಿರಿ ಬಸವೇಶ್ವರ
ಹುಸಿನಗುವ ತೋರುತ್ತ ಸುತ್ತೆಲ್ಲ ಪಸರಿಸಿರಿ
ಹಸನಾದ ಬದುಕಿನಲಿ ಹೂವಂತೆಯೆ
ಬುಸುಗುಡುವ ಹಾವಂತೆ ದುಡುಕದಿರಿ ನೀವೆಂದು
ನಸುನಗುವ ಚೆಲ್ಲುತಿರಿ ಬಸವೇಶ್ವರ
ಮೊಗದಲ್ಲಿ ಹೂನಗುವು ತಂತಾನೆ ತುಂಬಿರಲಿ
ಹಗೆತನವು ಸರಿಯಲ್ಲ ನಮಗೆಂದಿಗು
ಮಗುವಂತೆ ತುಂಬಿರಲಿ ಕಿರುನಗೆಯು ಕಣ್ಣಲ್ಲಿ
ಸೊಗವಿಹುದು ನಮಗದುವೆ ಬಸವೇಶ್ವರ
