ಸುಲಭದ ಮಾತಲ್ಲ

ಕಾವ್ಯ ಸಂಗಾತಿ

ಸುಲಭದ ಮಾತಲ್ಲ

ನಿನ್ನ ಮರೆಯುವುದು
ಕಷ್ಟವೆಂದು ಗೊತ್ತಿತ್ತು
ಆದರೆ ನೀನಿಲ್ಲದ ಕ್ಷಣಗಳಲ್ಲಿ
ಬದುಕಿ ಗೊತ್ತಿರಲಿಲ್ಲ

ಪ್ರತೀ ಹೆಜ್ಜೆಗಳಿಗೆ
ನೆರಳಾಗಿದ್ದ ನೀನು
ಮರೆಯಾದೆ ಹೇಗೆ
ಮರೆತು ನನ್ನ

ನನ್ನ ಕಾಲುಗಳಿಗಿಂದು
ಕೆಸರಿನಲ್ಲಿ ಹೂತುಹೋದ ಅನುಭವ
ಉಸಿರಿದ್ದೂ ಬಡಿಯದೆ ನಿಂತ
ಹೃದಯದ ಭಾವ

ಬಡಿವ ನನ್ನ ಕಣ್ರೆಪ್ಪೆಯನ್ನೂ
ಮಾತನಾಡಿಸುತ್ತಿದ್ದ ನಿನ್ನ ಕಣ್ಸನ್ನೆಗಳು
ಬದುಕಿನ ದಾರಿಯುದ್ದಕ್ಕೂ
ಬೆಂಗಾವಲಿಗಿದ್ದ ನಿನ್ನುಸಿರು

ಇಂದಿಗೂ ಅಂದಿನಂತೆಯೇ ಇವೆ
ನೀನಿಲ್ಲವೆಂಬ ನೋವ ಮರೆತು
ನಿನ್ನ ನೆನಪುಗಳ ಗುಂಗಲ್ಲಿ
ನಗುವಾಗು ಎನ್ನುತ್ತಿವೆ

ನಿನ್ನ ಮರೆಯುವುದು
ಸುಲಭದ ಮಾತಲ್ಲ
ನೀ ಬಿಟ್ಟು ಹೋದ
ನೆನಪುಗಳೊಡನೆ ಬದುಕಿದಷ್ಟು

---

ಒಲವು