ಕಾವ್ಯ ಸಂಗಾತಿ
ನೀನಿರಲು
ಅನಿತಾ
ನಸುಕಿನಲಿ ಹಸಿರೆಲೆಯ ಮೇಲೆ
ಬಿದ್ದ ಇಬ್ಬನಿ ಬೇಡಿದೆ ಭಗವಂತನ
ಜಗವ ಬೆಳಗುವ ದಿನಕರನ ಕಿರಣ
ಸ್ಪರ್ಶಿಸಲು
ಮೊಗ್ಗಾಗಿ ಅರಳಿದ ಸುಂದರ ಸುಮ
ಹಾತೊರೆಯುತಿದೆ, ಏಳು ಬೆಟ್ಟಗಳ
ಮೇಲೇರಿ ನಿಂತ ಆ ದೇವರ
ಕಾಲ ಬಳಿ ಸೇರಲು!
ಗುಡಿಯ ಘಂಟೆ ಧ್ಯಾನಿಸುತಿದೆ
ಸುಶ್ರಾವ್ಯವಾಗಿ ತನ್ನ ಸದ್ದು
ಜಗನ್ನಿಯಮಕನ ತಲುಪಲು!
ಗರ್ಭಗುಡಿಯ ಪ್ರಣತಿ
ಕಾಯುತಿದೆ ಕರುಣಮಯ ಪರಮಾತ್ಮನ
ಮುಖಾರವಿಂದವ ಉಜ್ವಲಿಸಲು!
ಜಗದ ಪ್ರತಿ ಚಲನೆಯೂ ನೀನಾಗಿರಲು
ಧ್ಯಾನಿಸದೆ ಇರಲಾರದು
ಈ ಮನವು, ಅನುಕ್ಷಣವೂ
ನನ್ನೊಳಗೆ ನೀನಿರಲು!