ಕ್ಲಿಯೋ ಪಾತ್ರ..

ಕಾವ್ಯಯಾನ

ಕ್ಲಿಯೋ ಪಾತ್ರ..

ಮಾಸ್ಕೇರಿ .ನಾಯಕ

ಕಣ್ಣ ಕಂದಕದಲ್ಲಿ ಜುಗಳಿ ಜಾರಿದರೆಷ್ಟೊ
ಎದ್ದು ಬಂದುದು ಸುಳ್ಳು ಹದ್ದು ಮೀರಿ |
ತೆವಲು ಪಿತ್ತಕೆ ಪತರಗುಟ್ಟ ನೃಪಕುಲವೆಷ್ಟೊ
ಕಾಮಾಗ್ನಿ ಕುಂಡಲ ಪಿಂಡ ಕ್ಲಿಯೋಪಾತ್ರ ನಾರಿ ?

ಹುಟ್ಟಾ ಕೆಟ್ಟ ಬಳಿಕ ಕಟ್ಟುಕಟ್ಟಳೆ ಗೌಣ
ಹುಟ್ಟು ಗುಣ ಸುಟ್ಟರದು ಹೊಗದದು ನಿಜವೇ |
ವೀಕ್ಷೆಯಲೆ ವಿಷಕಾರು ವಿಶ್ವ ವಿಶೇಷ ತಳಿ
ಕ್ರಿಸ್ತಪೂರ್ವದ ಸಾಕ್ಷಿ ವರ್ತಮಾನಕು ಸಜವೆ ?

ಶಯನ-ಕಾರಾಗೃಹಕೆ ಅಂತರೊಂದೆ ಮಂಚ
ಬೇಟದಾಟಕೆ ಒಡಹುಟ್ಟಿಹರು ಬಲಿಯೆ |
ಸರ್ಪದರ್ಪದ ರಾಪು ಕುಲದವಾರಸುಗಾರ್ತಿ
ಸ್ವೇಚ್ಛಾಚಾರಕೆ ಉಚ್ಛ ಸ್ವಾತಂತ್ರ್ಯ ಹೊಣೆಯೆ ?

ಸೌಂದರ್ಯವೆನ್ನುವರೆ ಕಾಮತುಂಬಿದ ಚರ್ಯೆ
ಸತ್ಯ ಶಿವ ಸುಂದರತೆ ಸರ್ವರ್ತುಕ ಮಾತು |
ಶೀಲವಿಲ್ಲದ ಚೆಲುವು ಜೀವವಿಲ್ಲದ ದೇಹ
ಇದ್ದು ಇಲ್ಲದ ತರವೆ ಸರ್ವತ್ರ ನಾತು ||

***