ಹೊಸ ದನಿ – ಹೊಸ ಬನಿ – ೮.
ತಲೆ ಬರಹ ಇಲ್ಲದೆಯೂ
ತಲೆದೂಗಿಸುವ
ನಾಗಶ್ರೀ ಎಸ್ ಅಜಯ್ ಕವಿತೆಗಳು.
ಬೆಂಗಳೂರಿನ ಗಾಂಧಿ ಬಜಾರಿಗೆ ಕಾಲ್ನಡಿಗೆಯ ಅಂತರದ ಬಿ.ಪಿ.ವಾಡಿಯಾ ಸಭಾಂಗಣ. ಕವಿ ವಾಸುದೇವ ನಾಡಿಗರ ಕವನ ಸಂಕಲನದ ಬಿಡುಗಡೆ ಸಮಾರಂಭ. ವೇದಿಕೆಯಲ್ಲಿ ಸರ್ವ ಶ್ರೀ ಮೂಡ್ನಾಕೂಡು ಚಿನ್ನಸ್ವಾಮಿ, ಜಿ.ಕೆ.ರವೀಂದ್ರ ಕುಮಾರ್, ಸುಬ್ರಾಯ ಚೊಕ್ಕಾಡಿಯಂಥ ಅತಿರಥ ಮಹಾರಥರು. ಪುಸ್ತಕ ಬಿಡುಗಡೆಯ ಆತಂಕದಲ್ಲಿ ಕವಿ ದಂಪತಿ. ತುಂಬಿದ ಸಭೆಯ ಗೌರವಾನ್ವಿತರಿಗೆಲ್ಲ ಕಲಾಪದ ಸೊಗಸು ಮತ್ತು ಸಂದರ್ಭಕ್ಕೆ ತಕ್ಕ ಕವಿ ನುಡಿಗಳನ್ನೂ ಹಿತದ ಮಾತುಗಳನ್ನೂ ಆಡುತ್ತ ಸಭೆಗೆ ಶೋಭೆ ತರುತ್ತಿದ್ದ ನಿರೂಪಕಿ.
ಇತ್ತೀಚೆಗೆ ಸಮಾರಂಭಗಳಲ್ಲಿ ನಿರೂಪಕರದೇ ಕಾರುಬಾರು. ಬರಿಯ ವಾಚಾಳಿತನ ಮತ್ತು ಹಗುರ ನಗೆ ಚಟಾಕಿ ಹಾರಿಸಿ ವೇದಿಕೆಯ ಗಣ್ಯರನ್ನು ನೋನುತ್ತ ಅಭಿನಂದಿಸಿದರೆ ಅವರ ಕೆಲಸ ಮುಕ್ತಾಯ. ಕಾರ್ಯಕ್ರಮ ಯಾವುದೇ ಇರಲಿ, ಈ ನಿರೂಪಕರ ಶೈಲಿ ಮಾತ್ರ ಬದಲಾಗದು. ಹಾಡಿದ್ದೇ ಹಾಡುವ ಹೇಳಿದ್ದೇ ಹೇಳುವ ಅವೇ ಅವೇ ಹಗುರ ಚಟಾಕಿಗಳು.
ಅಪರೂಪಕ್ಕೆ ಈ ಬರಹದ ಮೊದಲಲ್ಲಿ ಹೇಳಿದ ಸಭೆಯಲ್ಲಿ ಆ ಸಮಾರಂಭದ ನಿರೂಪಕಿಯ ಮಾತು, ಆಕೆ ನಡು ನಡುವೆ ಕೋಟ್ ಮಾಡುತ್ತಿದ್ದ ಕನ್ನಡದ ಮಹಾ ಕವಿಗಳ ಪದ್ಯದ ಸಾಲುಗಳು, ಹಿತ ಮಿತದ ಸಂಕ್ಷೇಪ…ಆಕೆ ಕನ್ನಡ ಸಾಹಿತ್ಯವನ್ನು ಓದಿಕೊಂಡಿದ್ದಾರೆಂದು ಮತ್ತು ಸಾಹಿತ್ಯದ ಮೇಲೆ ವಿಶೇಷ ಒಲವು ಇಟ್ಟುಕೊಂಡಿದ್ದಾರೆ ಎಂಬುದನ್ನೂ ಸ್ಪಷ್ಟವಾಗಿ ಹೇಳುತ್ತಿತ್ತು. ಆಕೆಯ ಹೆಸರು ನಾಗಶ್ರೀ ಅಜಯ್ ಎಂದು ಆಮೇಲೆ ಗೊತ್ತಾಯಿತು.
ಆಕಾಶವಾಣಿ ಎಫ್.ಎಂ ರೈನ್ಬೋದಲ್ಲಿ ರೇಡಿಯೋ ಜಾಕಿಯಾಗಿ ಕಳೆದ ೯ ವರ್ಷಗಳಿಂದ ಹಾಗೂ ದೂರದರ್ಶನ ಚಂದನ ವಾಹಿನಿಯಲ್ಲಿ ನಿರೂಪಕಿಯಾಗಿ ಕಳೆದ ೫ ವರ್ಷಗಳಿಂದ ಕಾರ್ಯನಿರ್ವಹಿಸುತ್ತಿರುವ ನಾಗಶ್ರೀ ಎಂ.ಕಾಂ ಹಾಗೂ ICWAI Intermediate ಪದವೀಧರೆ. ಕನ್ನಡ ಸಾಹಿತ್ಯದಲ್ಲಿ ಮತ್ತು ಕಾರ್ಯಕ್ರಮ ನಿರೂಪಣೆಯಲ್ಲಿ ಆಕೆ ಆಸಕ್ತರು ಎಂದೂ ಆಮೇಲೆ ತಿಳಿಯಿತು. ಸುರಹೊನ್ನೆ, ಅವಧಿ ಜಾಲತಾಣಗಳಲ್ಲಿ ಮತ್ತು ಫೇಸ್ಬುಕ್ಕಿನಲ್ಲೂ ಅವರ ಕವಿತೆಗಳನ್ನು ಗಮನಿಸುತ್ತ ಬಂದಂತೆ ನಿರೂಪಕರು ಎಂದ ಕೂಡಲೇ ಬಾಯಿಪಾಠ ಮಾಡಿದ ಮಾತನ್ನು ನಾಟಕೀಯವಾಗಿ ಒಪ್ಪಿಸುವವರು, ಸುಮ್ಮನೇ ನೋನುತ್ತ ಜೋಕ್ ಹೇಳುವವರು ಎಂದು ಅಂದುಕೊಂಡಿದ್ದ ನನ್ನ ಅರಿವನ್ನು ಬದಲಾಯಿಸಿಕೊಳ್ಳಬೇಕಾಯಿತು!!
ಬದುಕೆಂದರೇನೆಂದು ಹುಡುಕುವ
ಹೊತ್ತಿಗೆ
ಮುಕ್ಕಾಲು ಉರಿದ ಊದುಬತ್ತಿ
ಸುತ್ತ ಪರಿಮಳ
ಉಸಿರಿಗೂ ಚೌಕಾಸಿ.
ಇಂಥ ಅದ್ಭುತ ರೂಪಕಗಳ ಕವಿತೆಯ ಮೂಲಕವೇ ಬದುಕ ಅರ್ಥವನ್ನು ತೇದು ತೇದು ಅದರ ಘಮದಲ್ಲೇ ಉಳಿದು ಬಿಡುವ ತಹತಹಿಕೆ ಇವರ ಕವಿತೆಗಳ ಆಂತರ್ಯ.
ಹಚ್ಚಿಕೊಂಡರೆ ಹೇಗೆಂದು
ಒಮ್ಮೆ ನನ್ನ ಜತೆಗಿದ್ದು ನೋಡು
ಉಬ್ಬಸದ ಕಡೆ ಉಸಿರಿನಲೂ
ನಿನ್ನದೇ ಹೆಸರು ಉಸುರುವ
ಹುಚ್ಚುಚ್ಚು ಹುಡುಗಿ ನಾನು
ಪ್ರೀತಿ ಪ್ರೇಮ ಪ್ರಣಯಗಳನ್ನು ಕುರಿತು ಬರೆಯದೇ ‘ಕವಿ’ ಎನ್ನುವ ಅಭಿದಾನಕ್ಕೆ ಪಾತ್ರರಾಗುವುದಾದರೂ ಹೇಗೆ ಸಾಧ್ಯ ಎನ್ನುವ ಪುರಾತನ ಪ್ರಶ್ನೆಗೆ ನಾಗಶ್ರೀ ಪದ್ಯಗಳೂ ಹೊರತಲ್ಲ! ತಾನು ಕವಿಯೆಂದು ಘೋಷಿಸದೆಯೂ ಓದುಗನಲ್ಲಿ ಇದನ್ನು ಬರೆದವರು ಕವಿಯಲ್ಲದೇ ಮತ್ತಿನ್ನೇನು ಅನ್ನುವ ಪ್ರಶ್ನಿಸುವ ಸಾಲನ್ನೇ ಗಮನಿಸಿ; ಅಕ್ಷರ ಗೊತ್ತಿರುವವರೆಲ್ಲ ಅನ್ನಿಸಿದ್ದನ್ನು ಗೀಚಬಹುದು, ಆದರೆ ಆಂತರ್ಯದ ಸಾಲುಗಳು ಮಾತ್ರ ಕವಿತೆಯಾಗಿ ಅರಳಬಲ್ಲವು. ಉಬ್ಬಸವೇ ಮೂಲತಃ ಪ್ರಾಣಾಂತಿಕ ವ್ಯಾಧಿ. ಅಂಥ ವ್ಯಾಧಿಯಲ್ಲಿ ನರಳುತ್ತಿದ್ದರೂ ತನ್ನಿನಿಯನ ಧ್ಯಾನದಲ್ಲೇ ಅವನನ್ನು ಹಚ್ಚಿಕೊಳ್ಳುವ ಆ ಹುಡುಗಿಯನ್ನು ಮೆಚ್ಚಲಾರದೇ ಹೇಗೆ ಉಳಿಯಬಹುದು?
ಇದೇ ಪದ್ಯದ ಮುಂದಣ ಸಾಲುಗಳನ್ನು ಅಲ್ಲಲ್ಲಿಗೆ ತುಂಡು ಮಾಡದೇ ಗದ್ಯವಾಗಿಸಿ ಓದಿ ನೋಡಿದರೆ;
ಸಿಟ್ಟಿನ ಸಟ್ಟುಗದಲಿ ಒಂದೇಟು ಮುಟ್ಟಿಸಿ ಟೂ ಬಿಟ್ಟು ಮೂತಿಯುಬ್ಬಿಸಿ ಕೊನೆಯ ಸಂದೇಶ ಕೊನೆಯ ಮಾತು ಗಟ್ಟಿ ತೀರ್ಮಾನಗಳ ಮಾರಕಾಸ್ತ್ರ ಪ್ರಯೋಗಗಳು ಇನ್ನೂ ಹೊಸ್ತಿಲು ದಾಟುವಂತಿಲ್ಲ ಆಗಲೇ ಮೊದಮೊದಲ ಪ್ರೇಮ ಸಲ್ಲಾಪ ನೆನಪಾಗುವುದು ನಸುನಾಚಿಕೆಯಲಿ ತುಸು ಬಿರಿವುದು ತುಟಿ ಗದ್ದೆಯಂಚಿನ ಬದು ಒಡೆದಂತೆ ಕೊಚ್ಚಿ ಹೋಗುವುದು ಮುನಿಸು ಅಷ್ಟೇಕೆ ವಿವರಿಸಲಿ? ಹಚ್ಚಿಕೊಂಡವರಿಗಷ್ಟೇ ಗೊತ್ತು ಮೆಚ್ಚಿಕೊಂಡವರ ಸುಖ-ದುಃಖ, ಇಚ್ಚೆಯಿದ್ದವರ ಆಳು ಈ ಸ್ವರ್ಗ- ನರಕ
ಪ್ರಾಯಶಃ ಪ್ರಯೋಗ ಎಂದರೆ ಇದೇ ಇರಬೇಕು. ಪದ್ಯಗಂಧೀ ಗದ್ಯ ಎಂದೆಲ್ಲ ಕರೆದುಕೊಳ್ಳುವವರ ನಡುವೆ ಗದ್ಯ ಗಂಧೀ ಪದ್ಯ ಬರೆಯುವ ಈ ಕವಿ ಯಾಕೋ ತೀರ ಸಹಜವಾಗಿ ನಿತ್ಯವೂ ಘಟಿಸುವ ಘಟನಾವಳಿಗಳನ್ನೆಲ್ಲ ಒಟ್ಟಾಗಿಸಿ ಬದುಕಿನ ಪ್ರಭಾವಳಿಯನ್ನಾಗಿಸುತ್ತಾರಲ್ಲ ಈ ಕವಿ ಇವರನ್ನು ಪ್ರಭಾವಿಸುತ್ತಿರುವುದು ಕೆ ಎಸ್ ನ ಅಲ್ಲದೇ ಮತ್ತಿನ್ನಾರು ಎನ್ನುವುದೂ ಆತುರದ ನಿರ್ಧಾರವೇ ಆದೀತು!
ಜನಜಂಗುಳಿಯ ಮಧ್ಯೆಯೇ
ತೀರಾ ಒತ್ತರಿಸಿ ಬಂದ ಅಳು
ಕಡಿಮೆ ಬಿದ್ದ ಟಿಕೇಟು ಕಾಸು
ಎಡವಿದಾಗ ಹರಿದ ಅಂಗಿ
ಸದಾ ಮೇಲಾಟ ತೋರಿದವರ
ಅಣಕು ನೋಟ
ಕಿತ್ತ ಉಂಗುಷ್ಟದ ತೇಪೆ ಚಪ್ಪಲಿ
ಜಾತ್ರೆಯಂತಹ ಮದುವೆಗೆ
ತಪ್ಪು ಅಂದಾಜಿನಲಿ ತೊಟ್ಟ ಸಾದಾ ಅರಿವೆ
ಇಲ್ಲಿ ಕವಿ ಬದುಕಿನ ಸೂಕ್ಷ್ಮಗಳನ್ನು ಅವಲೋಕಿಸುವ ರೀತಿ ಸದ್ಯ ಅಬ್ಬರದಲ್ಲಿ ಬೊಬ್ಬಿರಿಯುವ, ಸಮಾನತೆಯ ಬೇಡಿಕೆ ಇಟ್ಟು ಇದ್ದವರಿಂದ ಕಿತ್ತು ತಮ್ಮದಾಗಿಸಿಕೊಳ್ಳುವ ಹಕ್ಕೊತ್ತಾಯದ ಗದರಿಲ್ಲ, ತಮ್ಮನ್ನು ಯಾರೋ ತುಳಿದರು ಎನ್ನುವ ದೂರು ಮೊದಲೇ ಇಲ್ಲ ಅಥವ ಹತಭಾಗ್ಯದ ಬಗ್ಗೆ ದುಃಖವೂ ಇಲ್ಲ; ಇರುವುದು ಬರಿಯ ವಾಸ್ತವದ ನಿಜ ಚಿತ್ರ.
ನಾಗಶ್ರೀ ಕವಿತೆಗಳಲ್ಲಿ ಹೆಚ್ಚಿನವು ಶೀರ್ಷಿಕೆಯೇ ಇಲ್ಲದೆ ಪ್ರಕಟವಾದವು. ಫೇಸ್ಬುಕ್ಕಿನಲ್ಲಿ ಶೀರ್ಷಿಕೆ ಇಲ್ಲದೆಯೂ ಪ್ರಕಟಿಸಬಹುದು. ಆದರೆ ಅಂತರ್ಜಾಲದ ಪತ್ರಿಕೆಗಳಲ್ಲೂ ಇವರ ತಲೆ ಬರಹ ಇಲ್ಲದೆಯೂ ಆ ಪದ್ಯಗಳ ಝಳದಲ್ಲಿ ತಲೆದೂಗಿಸುವಂತೆ ಮಾಡಬಲ್ಲ ಹಲವು ಪದ್ಯಗಳು ಇವೆ.
ಅಪರೂಪಕ್ಕೆಂಬಂತೆ “ಮರದ ತುದಿಗೆ ಸಿಕ್ಕಿಬಿದ್ದ ಗಾಳಿಪಟ” ಶೀರ್ಷಿಕೆಯ ಕವಿತೆಯಲ್ಲಿ ವಾಸ್ತವವಾಗಿ ಗಾಳಿಪಟದ ಚಿತ್ರ ಬರುವುದೇ ಇಲ್ಲ! ಬರಿಯ ಶೀರ್ಷಿಕೆಯಲ್ಲೇ ಬದುಕನ್ನೇ ಮರದ ತುದಿಗೆ ಸಿಕ್ಕಿಬಿದ್ದ ಗಾಳಿಪಟವನ್ನಾಗಿಸಿರುವ ಕವಿತೆ ಹೇಳುತ್ತಿರುವುದು ದುರಂತಗಳ ಸರಮಾಲೆಯಲ್ಲಿ ಸಿಕ್ಕೂ ಮತ್ತೆ ಮೇಲೇರಬಯಸುವ ಗಾಳಿಪಟದ ಆಶೆಯಂಥ ಬದುಕನ್ನು!! ಪದ್ಯದ ಕಡೆಯ ಸಾಲು ಹೀಗಿದೆ;
ಹೀಗಂತ ಗೊತ್ತಿದ್ದೂ
ನಾನೇನೂ ಮಾಡಲಾರೆ
ನಾಲ್ಕು ಹನಿ ಕಂಬನಿ ಹೊರತು
ಮತ್ತೇನೂ ಕೊಡಲಾರೆ
ಕೊಸರಷ್ಟು ಹಸಿಪ್ರೀತಿ
ಉಳಿಸಿಟ್ಟಿರುವೆ ಸ್ವೀಕರಿಸು.
ಬರಿಯ ಇಂಥ ಹತಾಶೆಗಳ ಚಿತ್ರಣದಲ್ಲಿ ವಾಸ್ತವವನ್ನು ಮರೆಮಾಚುತ್ತ ರಮ್ಯತೆಯನ್ನು ಬಯಸುವ ರೀತಿ ಕೆ ಎಸ್ ನ ಅವರಲ್ಲದೇ ಈ ನಾಗಶ್ರೀಗೂ ಒಲಿದಿರುವುದು ಅಪ್ಪಟ ಸತ್ಯ.
ಬಹಳ ಗೊತ್ತೆಂಬ ಹಮ್ಮಿನಲಿ
ಹೊಸ ಬಣ್ಣಗಳ ಹುಡುಕುವೆವು
ಸೃಜಿಸಿದ ಮತ್ತಾವ ಬಣ್ಣಕ್ಕೂ
ಸ್ವತಂತ್ರ ಅಸ್ತಿತ್ವವಿಲ್ಲ
ಇದರ ಹೆಸರಿಗೆ ಅದರ ಉಲ್ಲೇಖ
ಅದರ ಚಿತ್ತಾರಕ್ಕೆ ಇದರ ಸಹಯೋಗ
ಹೊಸತು-ಹಳತು ಹೆಸರಿಗಷ್ಟೇ ವಿರುದ್ಧ
ನನ್ನ ತಿಳುವಳಿಕೆಗದು ಜೋಡಿಪದ
ಎಂದು ಮುಂದುವರೆಯುವ ಪದ್ಯ ಸಾಮಾನ್ಯ ಪ್ರತಿಮೆಗಳ ಅನಾವರಣದಲ್ಲೇ ಅಸಾಮಾನ್ಯ ರೂಪಕವೊಂದನ್ನು ಸೃಷ್ಟಿಸಿ ಭಲ ಭಲಾ ಎನ್ನಿಸುತ್ತದೆ. ಪದ್ಯ ಮುಗಿಯುವುದು ಹೀಗೆ;
ಹಾಗಲ್ಲ ಹೀಗೆಂದರೂ
ಹೀಗಲ್ಲ ಹಾಗೆಂದರೂ
ಒಪ್ಪುವದು ಬಿಡುವುದು
ಅವರವರ ಇಷ್ಟ
ಇದ್ದ ಬಣ್ಣಗಳಲೆ ಹೊಸ ಕನಸು
ಕಾಣುವುದು
ಇರುವ ಭಾವಗಳಲೆ ಹೊಸ ಸಾಲು
ಬರೆಯುವುದು
ನನಗಿಷ್ಟ ಎಂದೆಂದೂ
ಇಂಥ ಸಹಜ ಆಸೆಗಳನ್ನು ಮಾತ್ರ ತನ್ನ ಕವಿತೆಗಳ ಮುಖ್ಯ ಶೃತಿಯನ್ನಾಗಿರಿಸಿಕೊಂಡಿರುವ ಈ ಕವಿತೆಗಳು ಮತ್ತೆ ಮತ್ತೆ ಓದಿದರೆ ಹಳಹಳಿಕೆಯಂತೆ, ತನ್ನ ಕೈಗೆಟುಕದ ಸಂತಸದ ಬಗೆಗಿನ ತಿರಸ್ಕಾರದಂತೆ ಅಥವ ಶ್ರೇಣೀಕೃತ ಸಮಾಜದ ಶ್ರೇಣೀಕರಣದ ಉತ್ತುಂಗದಲ್ಲಿದ್ದೂ ಒಳಗೇ ಟೊಳ್ಳಾಗಿರುವ ಆ ಸಮಾಜದ ಕಿರೀಟದ ಹೊಳಪು ಕಳೆದ ಮಣಿಯಂತೆ ಕಾಣುತ್ತದೆ. ಆದರೆ ಬರಿಯ ಇಂಥ ಹಳಹಳಿಕೆಗಳು ಸದಾ ಸರ್ವದಾ ಯಾವುದೇ ಕವಿಯ ನಿತ್ಯ ಮಂತ್ರವಾಗಬಾರದು. ಹಾಗಾದಲ್ಲಿ ಅಳುಬುರುಕ ಕವಿ ಎಂಬ ಅಭಿದಾನಕ್ಕೆ ಸಿಕ್ಕು ತಾನೇ ತೋಡಿಕೊಂಡ ಹೊಂಡದಲ್ಲಿ ಕವಿ ಬೀಳುತ್ತಾನೆ. ಹಾಗಾಗದೇ ಇರಲು ಮೊದಲು ಈ ಕವಿ ತಾನಿರಿಸಿಕೊಂಡು ಬಂದಿರುವ ಕ್ಷೋಬೆಯಿಂದ ಹೊರಗೆ ಬರಬೇಕು ಮತ್ತು ನಿಜಕ್ಕೂ ಈ ಹಳವಂಡದಿಂದ ಮೇಲೆದ್ದು ಬರುವ ಮಾರ್ಗವನ್ನು ಹುಡುಕಬೇಕು.
ಬಿದ್ದಮೇಲೂ ತಿರುಗುತ್ತಲೇ ಇರುವ ಗಾಲಿ
ಸತ್ತಮೇಲೂ ಸುತ್ತುತ್ತಲೇ ಇರುವ ಆತ್ಮ
ಏನೋ ಹೇಳ ಹೊರಟು ಮತ್ತೇನೋ
ಆಗುವಾಗ
ಒಂದು ಮನಸ್ಸು ಒಡೆಯಬಹುದು
ಮತ್ತೆ ಸೇರಲೆಂದು ಶತಪ್ರಯತ್ನ ಏಕೆ?
ಸಿಕ್ಕಿದ್ದು ದಕ್ಕಿದ್ದು ಋಣವಿದ್ದಷ್ಟೇ
ಈ ಪದ್ಯ ಕಾವ್ಯದ ಪ್ರಯೋಗದಲ್ಲಿ ನಿಷ್ಕ್ರಮಣದ ಹಾದಿಯಲ್ಲಿದ್ದ ಅಧ್ಯಾತ್ಮದ ಪುನರ್ಪ್ರವೇಶ ಎಂದೇ ಅನ್ನಿಸುತ್ತಿದೆ. ಬದುಕಿನಾಚೆಗೆ ಏನಿದೆ, ಸತ್ತವರು ನಂತರ ಎಲ್ಲಿಗೆ ಹೋಗುತ್ತಾರೆ, ಪೂರ್ವಾಪರದ ಸಂಗತಿಗಳು ಏನಿವೆ ಎನ್ನುವುದನ್ನೆಲ್ಲ ಪದ್ಯದ ವಸ್ತುವನ್ನಾಗಿಸುವುದಕ್ಕೆ ಸಾಕಷ್ಟು ಅಧ್ಯಯನ ಮತ್ತು ಅಧ್ಯಾಪನಗಳ ಅನುಕ್ರಮಣಿಕೆಯ ಅವಶ್ಯಕತೆ ಅನಿವಾರ್ಯ. ನಾಗಶ್ರೀ ಈ ವಿಚಾರದಲ್ಲಿ ಸಾಕಷ್ಟು ದೂರ ಕ್ರಮಿಸಿರುವುದು ಅವರ ಪದ್ಯಗಳ ರೀತಿಯಲ್ಲೇ ಶೃತವಾಗುತ್ತದೆ.
ನಡೆದು ಬಿಡಬೇಕು ಆಚೆ
ಹಚ್ಚಹಸುರಿನ ಬಯಲಿನೆಡೆಗೆ
ವಿಶಾಲ ಸಮುದ್ರದ ಏಕಾಂತಕೆ
ಕಡೇಪಕ್ಷ ರಾತ್ರಿಯಾಗುವುದನೆ ಕಾದಿದ್ದು
ನಕ್ಷತ್ರಲೋಕದ ವಿಹಂಗಮ ದರ್ಶನಕೆ
ಇವೆಲ್ಲಾ ದುರ್ಲಭದ ನಗರಜಾತ್ರೆಯಲಿ
ಮಗುವೊಂದರ ಕಣ್ಣಬೆಳಕೊಳಗೆ
ಹಣ್ಣುಮುದುಕರ ಮನೆಯಂಗಳಕೆ
ನಡೆದುಬಿಡಬೇಕು ದೂರ ದೂರ
ಮತ್ತೆ ಸಣ್ಣತನಗಳು
ನಂಬಿಕೆಯ ನೆಲೆಯ ಕುರೂಪಗೊಳಿಸದಂತೆ
ಈ ಇಂಥ ಆಶಯ ಸದಾ ಉನ್ಮತ್ತತೆ ಮತ್ತು ಸ್ವಪ್ರತಿಷ್ಠೆಯನ್ನು ಮುಂದು ಮಾಡುವ ಲೋಕಾಂತದ ನಾಯಕ ಮಣಿಗಳಲ್ಲಿ ಅಸಾಧ್ಯದ ಧಾತು. ಲೋಕಾಂತದ ದಂದುಗಗಳಲ್ಲಿದ್ದೂ ಏಕಾಂತದ ಸಂಗತಕ್ಕಷ್ಟೇ ಹಾತೊರೆಯುವ ಮೃದು ಮನಸ್ಸಿನ ಅಸ್ತಿವಾರ.
ಇಂಥ ಲೌಕಿಕದಾಚೆಗಿನ ಸಂಗತಿಗಳಲ್ಲೇ ಇರುವ ಈ ಕವಿ ಒಮ್ಮೊಮ್ಮೆ ಹೀಗೂ ಹೇಳಬಲ್ಲರು;
ಉದ್ದು-ಕಡಲೆ-ಹೆಸರು ಗುರುತಿಸಲೂ
ಇಪ್ಪತ್ತು ವರ್ಷ ತೆಗೆದುಕೊಂಡ ಜಾಣರಲ್ಲವೆ ನೀವು
ಗಂಡು ಹೆಣ್ಣುಗಳ ನಡುವಿನ ಗುದ್ದಾಟ ನಿನ್ನೆ ಮೊನ್ನೆಯ ಪ್ರಶ್ನೆ ಏನಲ್ಲ. ಗಂಡು ಹೆಚ್ಚೆಂಬ ವಾದದ ಜೊತೆಯೇ ಹೆಣ್ಣು ಕೀಳಲ್ಲವೆಂಬ ಸಮದರ್ಶತ್ವವೂ ಇದ್ದೇ ಇದೆ. ಆದರೆ ಬದುಕನ್ನು ಅರಿಯುವುದಕ್ಕೆ ಅನುಭವಗಳೇ ಮುಖ್ಯ. ಅದು ಗಂಡೋ ಹೆಣ್ಣೋ ಲಿಂಗಾಧಾರಿತ ಅಲ್ಲದ ಆದರೆ ಬದುಕಿನ ನಿಜ ದರ್ಶನದಿಂದ ಹುಟ್ಟುವ ದರುಶನ. ಅದನ್ನು ಕಾಂಬುವ ಪರಿ ಬೇರೆ ಬೇರೆ ಅಷ್ಟೆ.
ನಾಗಶ್ರೀ ಕವಿತೆಗಳಲ್ಲಿ ಪುರಾಣ ಪಾತ್ರಗಳು ನೇರವಾಗಿ ಪ್ರಸ್ತಾಪ ಆಗುವುದಿಲ್ಲ. ಆ ಅಂಥ ಕಾವ್ಯ ನಾಯಕರ ಒಣ ಉಪದೇಶಗಳೂ, ಹುಚ್ಚು ಆವೇಶಗಳೂ ಮೈ ತಳೆಯದೇ ಆ ಅಂಥ ಕಾವ್ಯ ನಾಯಕರು ಈ ಒಣ ನೆಲದಲ್ಲಿ ಉದುರಿಸಿ ಹೋದ ಆದರ್ಶಗಳು ಮಾತ್ರ ಸ್ಥಾಯಿ ಶೃತಿಯಾಗಿ ಈ ಕವಿಯ ಹಾಡಿಗೆ ಹಾದಿಯ ಸಾಥಿಯಾಗಿವೆ ಮತ್ತು ಆ ಅದೇ ಕಾರಣಕ್ಕೇ ಸದ್ಯ ಬರೆಯುತ್ತಿರುವವರಿಗಿಂತ ಭಿನ್ನವಾಗಿ ಅವರ ಕವಿತೆಗಳ ಆಪ್ತ ಓದಿಗೆ ಅನುಗೊಳಿಸುತ್ತವೆ.
ಸಹೃದಯರ ಸಾಧಾರಕ್ಕಾಗಿ ನಾಗಶ್ರೀ ಅಜಯ ಅವರ ಆಯ್ದ ಆರು ಪದ್ಯಗಳು;
೧.
ಹಚ್ಚಿಕೊಂಡರೆ ಹೇಗೆಂದು
ಒಮ್ಮೆ ನನ್ನ ಜತೆಗಿದ್ದು ನೋಡು
ಉಬ್ಬಸದ ಕಡೆ ಉಸಿರಿನಲೂ
ನಿನ್ನದೇ ಹೆಸರು ಉಸುರುವ
ಹುಚ್ಚುಚ್ಚು ಹುಡುಗಿ ನಾನು
ಥಂಡಿ ಹವೆಯಲಿ ಎದ್ದ
ಎದೆನಡುಕ ವಿರಹ
ಬೆಚ್ಚನೆಯ ಉಣ್ಣೆಯಂಗಿ
ಸುಡುವ ಚಹಾ
ಬಿಸಿಯಾಗಿಸದು ಎಂದು
ನಿನ್ನ ನೆವದಿಂದ ಜೋಮು
ಬಿಡಿಸಿ
ಕುಣಿಕುಣಿದು ಓಡುವ
ಮರಿಜಿಂಕೆ ಪಾದಗಳು
ಸಿಟ್ಟಿನ ಸಟ್ಟುಗದಲಿ
ಒಂದೇಟು ಮುಟ್ಟಿಸಿ
ಟೂ ಬಿಟ್ಟು ಮೂತಿಯುಬ್ಬಿಸಿ
ಕೊನೆಯ ಸಂದೇಶ
ಕೊನೆಯ ಮಾತು
ಗಟ್ಟಿ ತೀರ್ಮಾನಗಳ
ಮಾರಕಾಸ್ತ್ರ ಪ್ರಯೋಗಗಳು
ಇನ್ನೂ ಹೊಸ್ತಿಲು ದಾಟುವಂತಿಲ್ಲ
ಆಗಲೇ ಮೊದಮೊದಲ
ಪ್ರೇಮಸಲ್ಲಾಪ ನೆನಪಾಗುವುದು
ನಸುನಾಚಿಕೆಯಲಿ ತುಸುಬಿರಿವುದು ತುಟಿ
ಗದ್ದೆಯಂಚಿನ ಬದು ಒಡೆದಂತೆ
ಕೊಚ್ಚಿ ಹೋಗುವುದು ಮುನಿಸು
ಅಷ್ಟೇಕೆ ವಿವರಿಸಲಿ?
ಹಚ್ಚಿಕೊಂಡವರಿಗಷ್ಟೇ ಗೊತ್ತು
ಮೆಚ್ಚಿಕೊಂಡವರ ಸುಖ-ದುಃಖ
ಇಚ್ಚೆಯಿದ್ದವರ ಆಳು ಈ ಸ್ವರ್ಗ- ನರಕ
೨.
ಮರದ ತುದಿಗೆ ಸಿಕ್ಕಿಬಿದ್ದ ಗಾಳಿಪಟ
ನೀನು ದೂರದ ಬೆಟ್ಟದಲಿ
ಮರದ ತುದಿಗೆ ಸಿಕ್ಕಿಬಿದ್ದ ಗಾಳಿಪಟ
ಬೇಸಿಗೆಯ ಸುಡು ಮಧ್ಯಾಹ್ನ
ಮೊಸರಲಿ ಅದ್ದಿ, ಉಪ್ಪು ಹಚ್ಚಿ
ಒಣಗಲೆಂದೇ ಇಟ್ಟ ಮೆಣಸಿನಕಾಯಿ
ಮಳೆಗಾಲದ ಸಂಜೆ ಜಡಿಯಲಿ
ತೊಯ್ದು ತೊಪ್ಪೆಯಾದ ಒದ್ದೆ ಬಟ್ಟೆ
ಬಹಳ ದೂರದೂರಿಗೆ ಯಾತನೆಯಲಿ
ಕಡಿಮೆ ಕಾಸಿನೊಂದಿಗೆ ಹೊರಟ ಯಾತ್ರಿಕ
ಎಲ್ಲ ಕಲಿತು, ಪರೀಕ್ಷೆ ಕೋಣೆ ನಿರ್ವಾತದಲಿ
ಪ್ರತಿಶಬ್ಧ ಮರೆತ ಯಡವಟ್ಟು ವಿದ್ಯಾರ್ಥಿ
ಮತ್ತೆ ಬರಲಾರೆನೆಂದು ಗೊತ್ತಿದ್ದೂ
ಸಿಕ್ಕ ಅವಕಾಶ ತಪ್ಪಿಸಿ ನೊಂದು ಬೆಂದ ಪ್ರೇಮಿ
ಜೊತೆಗೆ ಯಾರಿಲ್ಲದ ಒಂಟಿ ಜೀವ
ನೋವಿನೆಣ್ಣೆಯಲಿ ಬೆಳಗೊ ದೀಪ
ಯಾರೂ ಸೋಕಲಿಚ್ಚಿಸದ ಅಸ್ಪೃಶ್ಯ
ತಿಳಿದೂ ಸೋತ ಕರ್ಣ
ತಪ್ಪಿಲ್ಲದೆ ಜೈಲು ಸೇರಿದ ಕೈದಿ
ಹೀಗಂತ ಗೊತ್ತಿದ್ದೂ
ನಾನೇನೂ ಮಾಡಲಾರೆ
ನಾಲ್ಕು ಹನಿ ಕಂಬನಿ ಹೊರತು
ಮತ್ತೇನೂ ಕೊಡಲಾರೆ
ಕೊಸರಷ್ಟು ಹಸಿಪ್ರೀತಿ
ಉಳಿಸಿಟ್ಟಿರುವೆ ಸ್ವೀಕರಿಸು.
೩.
ಪರಿಸರದ ಬಣ್ಣಗಳು
ಇದ್ದ ಹಾಗೇ ಹೊಂದಿಕೆಯಾಗುವುದು
ನೀಲಿಯಾಕಾಶಕ್ಕೆ ಬಿಳಿ/ಕರಿ ಮೋಡ
ಕಡಲಿಗೆ ದಡದ ಮಾಸಲು ಉಸುಕು
ನೇರಳೆ ಬದನೆಗೆ ಹಸಿರು ಟೋಪಿ
ಬಿಳಿಯ ಮಲ್ಲಿಗೆಗೆ ಹಸಿರು ದೇಟು
ಹಸುರು ಮಾವಿನೆಲೆಯ ಮಧ್ಯೆ ಹಳದಿ ಹಣ್ಣು
ಕಪ್ಪು ಮಣ್ಣಲ್ಲೇ ಬೆಳೆವ ಬಿಳಿಯ ಹತ್ತಿ
ನೆಲದ ಹಸಿರು, ಬಾನ ಕೆಂಪು
ಒಳ್ಳೆ ಜೋಡಿ
ಬಹಳ ಗೊತ್ತೆಂಬ ಹಮ್ಮಿನಲಿ
ಹೊಸ ಬಣ್ಣಗಳ ಹುಡುಕುವೆವು
ಸೃಜಿಸಿದ ಮತ್ತಾವ ಬಣ್ಣಕ್ಕೂ
ಸ್ವತಂತ್ರ ಅಸ್ತಿತ್ವವಿಲ್ಲ
ಇದರ ಹೆಸರಿಗೆ ಅದರ ಉಲ್ಲೇಖ
ಅದರ ಚಿತ್ತಾರಕ್ಕೆ ಇದರ ಸಹಯೋಗ
ಹೊಸತು-ಹಳತು ಹೆಸರಿಗಷ್ಟೇ ವಿರುದ್ಧ
ನನ್ನ ತಿಳುವಳಿಕೆಗದು ಜೋಡಿಪದ
ಹಾಗಲ್ಲ ಹೀಗೆಂದರೂ
ಹೀಗಲ್ಲ ಹಾಗೆಂದರೂ
ಒಪ್ಪುವದು ಬಿಡುವುದು
ಅವರವರ ಇಷ್ಟ
ಇದ್ದ ಬಣ್ಣಗಳಲೆ ಹೊಸ ಕನಸು
ಕಾಣುವುದು
ಇರುವ ಭಾವಗಳಲೆ ಹೊಸ ಸಾಲು
ಬರೆಯುವುದು
ನನಗಿಷ್ಟ ಎಂದೆಂದೂ
೪.
ಬಿಟ್ಟ ಸ್ಥಳಗಳನ್ನು ತುಂಬುವುದು
ಎಷ್ಟು ಸುಲಭವಿತ್ತು ಬಾಲ್ಯಕ್ಕೆ
ಇರುವ ಐದು ಆಯ್ಕೆಯಲ್ಲಿ
ಒಂದನ್ನು ಹೆಕ್ಕುವುದು
ಹೊಂದಿಸಿ ಬರೆದು ಮುಗಿಸುವುದು
ಮುರಿದ ಆಟಿಕೆ, ಗಾಜು, ಬೆಂಡು
ರಸ್ತೆಯಲ್ಲಿ ಹೊಳೆಯುತ್ತಿದ್ದ ಕಾಗೆಬಂಗಾರ
ಮರಳಿನ ದೊಡ್ಡ ರಾಶಿಯಲ್ಲಿ
ಕೆದಕುತ್ತಿದ್ದ ಶಂಖ, ಕಪ್ಪೆಚಿಪ್ಪು
ಅಮೂಲ್ಯವೆಂಬಂತೆ ಆರಿಸಿತಂದು
ಕೋಟೆಗಳ ಕಟ್ಟಿ, ಒಡೆಯುವುದಲ್ಲೆಷ್ಟು ಮಜವಿತ್ತು!
ಇನ್ನೂ ಬೆಳಗಿನ ಕನಸಿನಂತಿದೆ
ಅದಾಗಲೇ, ಬಾಲ್ಯದ ಗೆಳತಿಯರ
ಮಡಿಲ ಮಕ್ಕಳಿಗೀಗ ಬಾಲ್ಯ
ಮುವ್ವತ್ತಕ್ಕೆ ಬದುಕೆಷ್ಟು ನಿಗೂಢ?
ಕಣ್ಣ ಕೆಳಗೆ ಕಪ್ಪು ಉಂಗುರ
ನಡುಸುತ್ತ ಒಂದು ಪುಟ್ಟ ಟೈರು
ಮನೆ, ಕಛೇರಿ, ಮಗುವೆಂದು
ಅನುದಿನದ ಧಾವಂತ
ಸುಮ್ಮಗೆ ಕಾಲುಚಾಚಿ ಕೂರಲು,
ಬೆಳದಿಂಗಳ ರಾತ್ರಿ ನಿದ್ದೆಗೆಡಲು
ಕೇಸರಿ ಪೆಪ್ಪರಮೆಂಟು
ಬಾಯಲ್ಲಿ ಕರಗಿ ಬಣ್ಣಬಿಡುವುದ ಕಾಣಲು,
ಅಪ್ಪನೊಂದಿಗೆ ಕೈಹಿಡಿದು ಊರುಸುತ್ತಲು
ಪುರುಸೊತ್ತಿಲ್ಲದ ಅವರು
ಈಗಲೇ ಹಳೇ ಅಜ್ಜಿಯಂತೆ
ನೆನಪುಗಳ ಮಡಿಕೆಯ ಮೇಲೆ
ಕೈಯಾಡಿಸುವ ನಾನು
ಮತ್ತೆ ತುಂಬಬೇಕಿದೆ
ಬಿಟ್ಟ ಕಂದಕಗಳನು
ಆಯ್ಕೆಗೆ ಅವಕಾಶವೀಯದೆ
ಅಪ್ಪಬೇಕಿದೆ
ಹೊಂದಿಸಬೇಕಿದೆ
ಚೆಲ್ಲಾಪಿಲ್ಲಿಯಾದ ಹೃದಯಗಳನ್ನು.
ಮತ್ತೊಮ್ಮೆ
ಹಾಡಬೇಕಿದೆ ಬಾಲ್ಯಗೀತೆ
ಮೀರಬೇಕಿದೆ ಅಹಮ್ಮಿನ ಮೇರೆ
ಮತ್ತು
ಈ ವಯಸ್ಸಿಗೆ ಗೊತ್ತು
ಒಂದು ಅಂಕದ ಪ್ರಶ್ನೆಯಷ್ಟು
ಸುಲಭವಲ್ಲ ಇವು.
೫.
ಉಳಿಕೆ.
ಮಾತು ಉಳಿಸುವುದು
ರಾತ್ರಿಯಲ್ಲಿ ಬರಬಹುದಾದ
ಶ್ರೀಕೃಷ್ಣನಿಗೆ ಅನ್ನ ಉಳಿಸಿದಂತಲ್ಲ
ಎಂದಿನದೋ ಪ್ರತಿಜ್ಞೆಗಳಿಗೆ
ಮಣಿಕಟ್ಟು ಕತ್ತರಿಸಿ ರಕ್ತ ಬಸಿಯುವುದೂ ಅಲ್ಲ
ಅದೊಂದು ಮಾತಿಗೆ
ನೇಣುಬಿದ್ದು ಜತೆಗಿದ್ದವರ
ಜೀವಹಿಂಡುವುದು
ಕೊರಗಿ ಸೊರಗಿ
ಹಿಡಿತಕ್ಕೆ ಸಿಗದ
ಸೀಮೆಸುಣ್ಣ ಆಗುಳಿವುದು
ಎಲ್ಲೋ ಜಿನುಗುವ
ಮಿಲಿ ಲೆಕ್ಕದ ಕರುಣಹನಿಗೆ
ಬಾಯ್ಬಿಟ್ಟು ಕಾಯುವುದು
ಉಹೂಂ
ಇದಾವುದೂ ಅಲ್ಲ
ಮಾತು ಎದೆಯೊಳಗಿಷ್ಟು
ಉಳಿದಿರುವಾಗಲೇ
ಹೂಗಿಡದಂತೆ ಜೋಪಾನ
ಮಾಡಿ
ಎದೆನೆಲದ ಹಸಿ ಆರದಂತೆ
ಪೊರೆಯುವುದು
ಹಸುಗೂಸೊಂದು ಜೋಲಿಯಲಿ
ನಿದ್ದೆಜೊಂಪಿನಲಿ
ಮೆಲುನಗುವಾಗ
ಎಚ್ಚರದಲಿ ಹೆಜ್ಜೆಯೂರಿದಂತೆ
ಗೆಜ್ಜೆಯೂ ಸದ್ದು ಮಾಡದಂತೆ
ನಡೆಯುವುದು
ಮಾತು ಉಳಿಸುವುದೆಂದರೆ
ಮೌನದಲಿ ಗೀತೆ ಮಿಡಿದಂತೆ
ಒಲುಮೆಯಲಿ ಒಂದಾದಂತೆ
೬..
ನಾವು ಹೀಗೇ
ಈ ಅಡುಗೆಮನೆಯಲ್ಲಿ
ಬೇಯುವುದೊಂದು
ನಿತ್ಯನರಕ ಎನ್ನುತ್ತಲೇ
ಪಾತ್ರೆ, ದಿನಸಿ, ತರಕಾರಿ
ಹಾಲು ಮೊಸರು
ಉಪ್ಪಿನಕಾಯಿ ಲೋಕದಲಿ
ಸಹನೆ, ಸಿಟ್ಟು, ಯಾತನೆ, ಬಿಕ್ಕುಗಳನು ರುಬ್ಬಿ
ಬದುಕ ಕಾವಲಿಯ ಮೇಲೆ
ತೆಳುದೋಸೆಯಂತೆ ಹುಯ್ಯುತ್ತಾ
ಕೆಂಪಾಗುವ ಕಮಲಗಳು
ಮಸಿಯಿಲ್ಲದ ಪಾತ್ರೆ
ಕನ್ನಡಿಯಂತಹ ಕಟ್ಟೆ
ಖಾಲಿ ಸಿಂಕು
ಕಲೆಯಿಲ್ಲದ ಒರಸುವ ಬಟ್ಟೆಗಳಿಗೆ
ಅನವರತ ತುಡಿದು
ಬದುಕು ಸುಂದರವೆಂದು
ಕಂಬನಿ, ಸೊರಸೊರಗಳ
ಮಧ್ಯೆ ಸಾರು ಹುಳಿ ಕುದಿಸಿ
ಕೊತ್ತಂಬರಿಯ ಘಮದಲ್ಲಿ
ಋಜುವಾತು ಮಾಡುವೆವು
ಹಿತಶತ್ರುಗಳ
ಸಾಲಕ್ಕೂ ಶ್ಯೂರಿಟಿ ಹಾಕಿ
ರಾತ್ರಿನಿದ್ದೆಯ ಕೆನ್ನೆ ಗಿಂಡಿ
ಹೂವಿನಗಿಡದ ಅಂಬು ನೀಡಿ
ಸ್ನೇಹ ವಿಸ್ತರಿಸಿದರೂ
ಅಡುಗೆಮನೆಗೆ ಅಡಿಯಿಡಲು
ಮಾತ್ರ ಅಂತರಂಗದ ಖಜಾನೆಯೆಂಬಂತೆ
ಹುಷಾರಾಗುವ ನಮ್ಮನ್ನು
ಗೆಲ್ಲಲಾರಿರಿ
ಉದ್ದು-ಕಡಲೆ-ಹೆಸರು ಗುರುತಿಸಲೂ
ಇಪ್ಪತ್ತು ವರ್ಷ ತೆಗೆದುಕೊಂಡ ಜಾಣರಲ್ಲವೆ ನೀವು
88888888888888888888888888888
ತರೀಕೆರೆ ಮೂಲದವರಾದ ಡಿ.ಎಸ್.ರಾಮಸ್ವಾಮಿಯವರು ಜೀವವಿಮಾ ನಿಗಮದ ಅಧಿಕಾರಿಯಾಗಿ ಅರಸೀಕೆರೆಯಲ್ಲಿ ನೆಲೆಸಿದ್ದಾರೆ.ಇವರ ‘ಉಳಿದ ಪ್ರತಿಮೆಗಳು’ ಕವನಸಂಕಲನಕ್ಕೆಮುದ್ದಣ ಕಾವ್ಯ ಪ್ರಶಸ್ತಿದೊರೆತಿದೆ.
ಅಭಿನಂದನೆಗಳು ನಾಗಶ್ರೀ..
ರಾಮಸ್ವಾಮಿ ಯವರ ಮಾತುಗಳು ಅತಿಶಯೋಕ್ತಿ ಅಲ್ಲ.
ಶುಭವಾಗಲಿ.
ಧನ್ಯವಾದಗಳು ಮೇಡಂ
ನಾಗಶ್ರೀ ಯವರ ಕವಿತೆಗಳು, ಬರಹಗಳು,ನಿರೂಪಣೆ ಎಲ್ಲವೂ ಚೆಂದ.ಅವರ ಕವಿತೆಯ ಕುರಿತು ಚೆಂದಕ್ಕೆ ಬರೆದಿರುವಿರಿ.ನಾಗಶ್ರೀ ಮತ್ತು ರಾಮಸ್ವಾಮಿ ಸರ್ ಇಬ್ಬರಿಗೂ ಅಭಿನಂದನೆಗಳು.
ನಿಮ್ಮ ಪ್ರೀತಿಯ ಮಾತಿಗೆ ಧನ್ಯವಾದಗಳು ಸ್ಮಿತಾ
ನಾಗಶ್ರೀ ಎಸ್ ಅಜಯ್ ಗದ್ಯಕ್ಕೂ ಸೈ, ಪದ್ಯಕ್ಕೂ ಸೈ. ವೇದಿಕೆ ಮೇಲಿನ ಲವಲವಿಕೆಯ ನಿರೂಪಣೆಗೂ ಸೈ, ಮೈಕಿನ ಹಿಂದಿನ ಕಚಗುಳಿಯ ಆಪ್ತ ಮಾತಿಗೂ ಸೈ. ಆದಷ್ಟು ಬೇಗ ನಿಮ್ಮ ಕವನ ಸಂಕಲನದ ಬಿಡುಗಡೆಗಾಗಿ ಕಾಯುತ್ತಿರುವೆ. ಶುಭವಾಗಲಿ.
ಧನ್ಯವಾದಗಳು ಅಮೂಲ್ಯ… ನಿಮ್ಮ ಹಾರೈಕೆ ನಿಜವಾಗಲಿ.