ಕಾವ್ಯ ಸಂಗಾತಿ
ಶಂಕರಾನಂದ ಹೆಬ್ಬಾಳ
ಈ ಮನಕೆ ನೀನೊಂದು ಉಸಿರಾಗಿದ್ದೆ
ಅರಳುವ ಹೂಗಳಲಿ ದುಂಬಿಯಾಗಿದ್ದೆ
ನೀಲಿಯ ಆಗಸದಲಿ ಬೆಳ್ಮೋಡವಾಗಿದ್ದೆ
ಹೊನ್ನಿನುಂಗುರಕೆ ವಜ್ರದ ಹರಳಾಗಿದ್ದೆ
ಈ ಮನಕೆ ನೀನೊಂದು ಪದಕವಾಗಿದ್ದೆ…
ಗಿರಿಯ ಶೃಂಗದಲಿ ಗಂಧದ ತರುವಾಗಿದ್ದೆ
ಪ್ರೇಮದ ತಲ್ಪದಲಿ ಬೀಳುವ ಸ್ವಪ್ನವಾಗಿದ್ದೆ
ಒಲವವೀಣೆಯಲಿ ನುಡಿವ ಗಾನವಾಗಿದ್ದೆ
ಈ ಮನಕೆ ನೀನೊಂದು ಪದವಾಗಿದ್ದೆ…!
ಹೃದಯದಲಿ ಉರಿವ ನಂದಾದೀಪವಾಗಿದ್ದೆ
ಅನಾಥಳಿಗೊಂದು ಜೋಡಿ ಜೀವವಾಗಿದ್ದೆ
ಜನುಮವಿದು ಮರೆಯದ ಸಿಹಿಸ್ವಪ್ನವಾಗಿದ್ದೆ
ಈ ಮನಕೆ ನೀನೊಂದು ಪ್ರಪಂಚವಾಗಿದ್ದೆ….!
ಗಗನದಲಿ ಮೂಡುವ ಇಂದ್ರಚಾಪವಾಗಿದ್ದೆ
ರಾತ್ರಿಯಲಿ ಹೊಳೆಯುವ ನಕ್ಷತ್ರವಾಗಿದ್ದೆ
ಹಾಡಿಗೆ ಜೀವತುಂಬುವ ದನಿಯಾಗಿದ್ದೆ
ಈ ಮನಕೆ ನೀನೊಂದು ಉಸಿರಾಗಿದ್ದೆ
ಶಂಕರಾನಂದ ಹೆಬ್ಬಾಳ
