ಕಾವ್ಯಸಂಗಾತಿ

ಮಹಿಳಾ ದಿನದ ವಿಶೇಷ

ಎಂ. ಆರ್. ಅನಸೂಯ

ಗಟ್ಟಿಗಿತ್ತಿಯರು

ಅರಿವಿಲ್ಲದೆಯೇ
ಬಿಟ್ಟು ಕೊಡುತ್ತಾ
ಬದುಕ ಕಟ್ಟಿಕೊಳ್ಳುತ್ತಾ ಬಂದವರು
ಇದ್ದರೂ ಸಂಕಟದ
ಗೋಳು ಗೊಣಗಾಟ
ಕಷ್ಟವನ್ನೇ ಇಷ್ಟವನ್ನಾಗಿಸಿದ ಪರಿಪಾಠದವರು
ಅಲ್ಲಿದೆ ಒಲಮೆಯ ಬಲವು
ತೀರದ ಛಲದ ಕಸುವು
ಕುಗ್ಗಿ ದಣಿದರೂ ಅಪರಾಜಿತೆಯರಾದವರು

ಬಸಿದು ತನುವ ಜೀವರಕ್ತೆಯಾದವರು
ಬೆಸೆದು ಮನವ ಅರಿವ ಬೆಳಕಾದವರು
ದುಡಿದು ಧನವ ಬೆವರಿನಲ್ಲು ತಂಪಾದವರು
ಕಂಡಿಲ್ಲ ಇನಿತಾದರೂ ದಣಿವು
ಬೇರಾರಿಗೂ ದಕ್ಕದ ಪ್ರಕೃತಿಯಿತ್ತ ವರವು !

ಸಕಲವೂ ಸಾಧ್ಯವೆಂದ ಸಶಕ್ತ ಸಬಲೆಯರು
ಕೊಟ್ಟ ಹತ್ತರಷ್ಟು ಮೊಗೆವ ಗಟ್ಟಿಗಿತ್ತಿಯರು
ಜೀವ ಸೃಷ್ಟಿಯ ಪ್ರಕೃತಿಗೆ ಸಾಟಿಯಾದವರು
ಆತ್ಮವಿಶ್ವಾಸಕೆ ಮತ್ತೊಂದು ಹೆಸರೇ ಸ್ತ್ರೀ
ಇದನರಿಯದವರು ಕೇವಲ ಗಾವಿಲರು

---