ವಾರದ ಕವಿತೆ

ನೀಲಿಯಾಕಾಶದ ಹೆಸರು

ಆಶಾ ಜಗದೀಶ್

ಅವನೊಂದು ಅನಂತ ವಿಶ್ವ
ಅದರ ಸರಹದ್ದು ಗುಂಟೆ
ಗುಳೆ ಹೊರಟು ಅಲೆಯಬೇಕೆನಿಸುತ್ತದೆ
ಹದಿನೈದನೆ ದಿನದ
ಕತ್ತಲ ರಾತ್ರಿಯಲ್ಲಿ

ಅವನ ಭಾವಗಳಿಗೆ ಮುಖವಿಲ್ಲ
ಅವನ ಆಸೆಗಳಿಗೆ ಕಣ್ಣಿಲ್ಲ
ಅವನ ಬಯಕೆ ಚಳಿಗಾಲದ ಬಿಸುಪು
ಬೇಸಿಗೆಯ ತಂಪು

ಮುಗಿಯದ ಮಲ್ಲಿಗೆ ದಂಡೆಯ ಸುತ್ತು
ಹೂವಿನಾಳದ ಕಸುರಿನ ನತ್ತು
ಇಳಿದಿರುಷ್ಟೇ ಅವನ ನೆನಪು
ಆಳ ಮತ್ತು ಆರ್ದ್ರ

ಕತ್ತಲ ಸೆರಗಿಗಂಟಿದ ನಕ್ಷತ್ರದ ಕುಚ್ಚು
ತಿರುಗುವ ಬಣ್ಣ ಬಣ್ಣದ ಚೆಂಡುಗಳ
ಒಳಗೊಂದು ಪುಟಿವ ಚೆಂಡು
ಚೆಂಡಿನೊಳಗೊಂದು ಮಿಡಿವ ನಾಡಿ
ಅವನ ನರನಾಡಿ
ಯೊಳಗೊಂದು ಪುಟ್ಟ ವಿಶ್ವ
ಅಗಾಧ ಅಳೆಯಲಾಗದ ಒಲವು

ಅಭಾವವಿಲ್ಲದ ತಾವು
ಅವಿನಾಭಾವ ಬಂಧ
ಅನುಭಾವದ ಅನುಭವ

ಸ್ವಚ್ಛಂದ
ನೀಲಿಯಾಕಾಶದ ಹೆಸರು
ಅವ
ಉಸಿರು

***************************

About The Author