ಕಾವ್ಯ ಸಂಗಾತಿ
ಗಜಲ್ ಜುಗಲ್ ಬಂದಿ
ನಯನ. ಜಿ. ಎಸ್,
ವಿಜಯಪ್ರಕಾಶ್ ಕಣಕ್ಕೂರು
ಹುಸಿ ಹಾಸದ ಹಸಿ ಭಾರವನು ತೊರೆದು ಮನವೀಗ ಹಗುರಾಗಿದೆ
ಮುಗಿಲ ಮಲ್ಲೆಯ ಸೌಗಂಧವನು ಮರೆತು ಕನಸೀಗ ಸಿಹಿಯಾಗಿದೆ
ಬೆಂಬಿಡದ ಭ್ರಾಂತಿಗೆ ನೆಚ್ಚಿ ಮನವು ಬಂಧಿಯಾಗಿತ್ತು ಮೋಹದಲಿ
ಶೂನ್ಯ ಭಾವದ ನೆಂಪುಗಳ ಬಿಸುಟುತ ಬಿಕ್ಕಳಿಕೆಯೀಗ ಬರಿದಾಗಿದೆ
ಸ್ವಪ್ನ ಬಂಡಿಗೆ ಸಾರಥಿ ನೀನೆನುತ ಆದರಿಸಿದುದಕೆ ಮರ್ಮವಿಲ್ಲ ಇನ್ನು
ಸೆಳೆತ ಹೀನ ಬಾಂಧವ್ಯಕೆ ಬೆನ್ನು ತೋರುತ ಬದುಕೀಗ ನೀಳವಾಗಿದೆ
ನಿಡುಸೊಯ್ವ ಒಡಲ ಬೇಗೆಗೆ ತಂಬೆಲರ ಮುತ್ತುಣಿಸಿದ್ದು ಸಟೆಯಷ್ಟೇ
ಕಾಪಟ್ಯದ ಪೊರೆಗೆ ಹೆಣೆದ ನಿಚ್ಚಣಿಕೆಯಲಿ ದಿಟವೀಗ ಬಯಲಾಗಿದೆ
ಹಾವ ಭಾವಗಳ ಮೇಳದಿ ಕುಣಿಯುವ ತೆವಲಿಗೆ ಬದ್ಧಳಲ್ಲ ‘ನಯನ’
ಶೋಧಿಸಿ ರುಜುವಾದ ಕಟು ತಥ್ಯದಲಿ ಕ್ಷಣವೀಗ ವಿಶದವಾಗಿದೆ.
ನಯನ. ಜಿ. ಎಸ್
=====
ವಿಷಣ್ಣತೆಯ ಸರಪಳಿಯನು ಕಳಚಿ ಮುಂದಡಿಯಿಡಲು ಆತ್ಮವೀಗ ಗೆಲುವಾಗಿದೆ
ವಿಷಾದದ ಕಲ್ಪಮೇಘವು ಕರಗಿ ಸ್ಥೈರ್ಯದ ಬೆಳಕಲ್ಲಿ ಗಮ್ಯವೀಗ ಉಜ್ವಲವಾಗಿದೆ
ಮರುಧರೆಯಲಿ ನೆರಳಿನ ಆಸರೆಯನು ಅರಸುತ ಬಳಲಿ ಬೆಂಡಾಗಿದ್ದೆ ಬಾಳಿನಲಿ
ಸುಳ್ಳು ಭರವಸೆಯ ಮೃಗಜಲದ ಭ್ರಮೆಯನ್ನು ತ್ಯಜಿಸಿ ಬದುಕೀಗ ನಿರಾಳವಾಗಿದೆ
ಅರಿವಾಗಿದೆಯಿಂದು ಆನಂದವೆನ್ನುವುದು ಅಂತರಂಗದ ಅನುಭೂತಿಯೆಂದು
ತಪ್ಪಳೆಯ ಸಪ್ಪಳವಿಲ್ಲದೆ ಬದುಕನು ರೂಪಿಸಿ ಆತ್ಮಪ್ರತ್ಯಯವೀಗ ಬಲಿಷ್ಠವಾಗಿದೆ
ಸುಡುವ ಎದೆಯು ಬಡಿಯುವುದನು ಬಿಡಲಿಲ್ಲ ಸಾಂತ್ವನ ಹೇಳುವವರಿಲ್ಲವೆಂದು
ತೊಡಕಿನಲಿ ತೊರೆದವರ ಮನ್ನಿಸಿ ಮುನ್ನಡೆಯೆ ಜನುಮದರ್ಥವೀಗ ವ್ಯಕ್ತವಾಗಿದೆ
ಬಣ್ಣದ ಮಾತಿಗೆ ಮರುಳಾಗುತ ವಿಜಯ ಪಥದಿಂದ ವಿಚಲಿತನಾಗಲಾರೆ ನಾನು
ಸಣ್ಣದಾದರೂ ಪರರ ನಲಿವಲ್ಲಿ ಸಂಭ್ರಮಿಸುತಿರಲು ಹರುಷವೀಗ ವೃದ್ಧಿಯಾಗಿದೆ.
ವಿಜಯಪ್ರಕಾಶ್ ಕಣಕ್ಕೂರು
About The Author
