ಡಾ.ಬಸಮ್ಮ ಗಂಗನಳ್ಳಿ-ತಾಯಿ ಪ್ರೀತಿ -

ಕಾವ್ಯ ಸಂಗಾತಿ

ಡಾ.ಬಸಮ್ಮ ಗಂಗನಳ್ಳಿ

ತಾಯಿ ಪ್ರೀತಿ

ತಾಯಿ ಪ್ರೀತಿ
ಇನ್ನೆಲ್ಲಿ ಹುಡುಕಲು
ಸಾಧ್ಯ ?
ಮತ್ತೆಲ್ಲಿ ಕಾಣುವುದು
ಈ ಜಗದಲಿ ..?
ಆ ಪ್ರೀತಿಗೆ
ಸರಿಸಾಟಿ ಇಲ್ಲ
ಯಾವುದೂ..
ತೀರಿಸಲಾಗದ
ಋಣವು..

ಅಳಿಸಲಾಗದ
ತಾಯ್ತನದ ಮಮತೆ
ಜಗದ ಎಲ್ಲ
ಸಾಗರಗಳ ನೀರನು
ಶಾಯಿ ಮಾಡಿ
ಭೂಮಂಡಲವೆಂಬ
ಕಾಗದದಲಿ
ಬರೆದರೂ ತೀರದ
ತಾಯೊಲುಮೆಯ
ಬಣ್ಣನೆ..

ಎಷ್ಟು ಜನ್ಮವೆತ್ತಿದರೂ
ಮತ್ತಷ್ಟು ಬಯಸುವ
ತಾಯಿ ಪ್ರೀತಿಗೆ
ಸೋಲದವರಾರು ?
ದೇವರೇ ಸೋತಿದ್ದಾನೆ
ಅದು ಕಾರಣ
ತಾಯಿಗಿಂತ ದೇವರಿಲ್ಲ
ದೇವಗಿಂತ ದೊಡ್ಡವಳು
ನಮ್ಮೆಲ್ಲರ ಅವ್ವ
ದಿವ್ಯ ಬಾಂಧವ್ಯ..

ಪ್ರಕೃತಿಮಾತೆ, ಭೂದೇವಿ,
ತಾಯಿ – ಸರಿಸಮರು..
ಸಹನೆ ತ್ಯಾಗ ಸಹಾಯ
ಸಹಕಾರಗಳ ಪ್ರತಿರೂಪವು
ಅವಳು ಜಗದ ಎಲ್ಲ
ಜ್ಞಾನ,ತಿಳಿವು,ಅರಿವು
ಮಹಾ ಅನುಭವಿ,
ಅಹಂ ಇರದ
ದಿವ್ಯ ಮೌನಿಯು
ಯಾವ ಯೋಗಿಯ
ತಪಕೂ ಹೋಲಿಕೆಯಿರದು..

ಅವ್ವನಿಗೆ ನಾವು
ಏನು ಕೊಡಲು ಸಾಧ್ಯ ?
ಅವಳಿಗೆ ನೀಡುವುದು
ಮಾತ್ರ ಧರ್ಮ
ಮರಳಿಸಬೇಕೆನುವ
ಫಲಾಪೇಕ್ಷೆ ಇಲ್ಲವೇ ಇಲ್ಲ
ಒಂದಿಷ್ಟು ಸಂತೋಷ
ಎಂಥದು ? ಎಂದರೆ
ಧನ ಕನಕಾದಿ ಅಸ್ತಿ
ಅಂತಸ್ತು ಐಶ್ವರ್ಯವಲ್ಲ ..

ಅವಳ ಬಯಕೆ ಹಂಬಲ
ಸುಸಂಸ್ಕೃತತೆ, ಸನ್ನಡತೆ
ಸೌಹಾರ್ದತೆ, ಸಹಬಾಳ್ವೆ
ಅಂತಃಕರಣೆ,ಮಾನವತೆ..
ಅವಳ ಅಂತರಾಳವ
ಅರಿಯುವುದೇ ಮನುಷ್ಯತ್ವ
ಅವಳ ಉದರದಿ ಜನಿಸಿ
ಅವಳಂತಾಗದೆ ಇರುವುದೇ
ವಿಪರ್ಯಾಸ, ವೈರುಧ್ಯತೆ