ಕಾವ್ಯ ಸಂಗಾತಿ
ಗಜಲ್
ಮಾಜಾನ್ ಮಸ್ಕಿ
ನನ್ನೊಡಲ ಚಿಗುರು ಲತೆ ನನ್ನ ಮಗಳು
ಎದೆ ಗೂಡಲ್ಲಿ ಬಚ್ಚಿಟ್ಟ ಮಮತೆ ನನ್ನ ಮಗಳು
ಸಾಧನೆಯ ಉತ್ತುಂಗ ಶಿಖರ ಇವಳದು
ಹೆತ್ತವರ ಗೌರವ ಘನತೆ ನನ್ನ ಮಗಳು
ಪ್ರೀತಿ ಸ್ನೇಹ ತಾಳ್ಮೆಯ ಪ್ರತಿರೂಪದ ಕಣ್ಮಣಿ
ಸಂಬಂಧಗಳು ಬೆಸೆಯುವ ವಾತ್ಸಲ್ಯತೆ ನನ್ನ ಮಗಳು
ಮನೆ ಮನಗಳ ಬೆಳದಿಂಗಳು ಚಂದ್ರಮುಖಿ
ರಮಿಸು ಮುನಿಸಿನ ತುಂಟತೆ ನನ್ನ ಮಗಳು
ಅಪೂರ್ವ ಸೌಂದರ್ಯದ ಬಂಗಾರದ ಖನಿ
ಮನಃಸ್ಫೂರ್ತಿ ನೀಡುವ ಚಾರುಲತೆ ನನ್ನ ಮಗಳು
About The Author
