ಕಾವ್ಯ ಸಂಗಾತಿ
ನಶೆಯೆಂದರೆ….
ಶಿವಲೀಲಾ ಹುಣಸಗಿ
ನಶೆಯೆಂದರೆ ಇದೆ ಇರಬೇಕು
ಮರಿಚೀಕೆಯ ಬೆವರಿಗೆ
ಹುಸಿಮುನಿಸ ಕರುಳಿಗೆ
ಕಣ್ಣಾಮುಚ್ಚಾಲೆಯ ಆಟಕೆ
ಮತ್ತಿನಲಿ ಮೈಮರೆತದ್ದೆ ಬಂತು
ನೀರಿಗೆಯ ತೊಡರಿನಲೆಲ್ಲ
ಬಿಗಿಯಾದ ಕುಪ್ಪಸದ ಕಂಪಿಗೆ
ಹೊತ್ತು ಸರಿದದ್ದು ಅರಿವಾಗಿಲ್ಲ
ಎಲ್ಲವೂ ನಿನ್ನ ಲೀಲೆಯೇ
ನಾಚಿನೀರಾಗುವ ಮನ್ವಂತರಕೆ
ಯುಗಗಳು ನಾಚಿದ್ದು ಮರೆತಿಲ್ಲ
ರುಚಿಸದ ಕಂಗಳು ಅರಸುತ್ತಿದೆ
ನಿನ್ನ ಎದೆಯ ಗೂಡನು
ಬೆಚ್ಚನೆಯ ಮರಿಗುಬ್ಬಿಯಂತೆ
ಆಲಿಂಗನದಿ ತಬ್ಬಲಾತುರವೆನಗೆ
ಕಂಕುಳಲಿ ಕಚಗುಳಿಯಿಟ್ಟು
ಬರಸೆಳೆದ ಒರಸೆಗೆ ನಡುಕ ಹುಟ್ಟಿ
ಎದೆಯ ಹದ ತಪ್ಪಿದ ಹಳಿಯಂತೆ
ಹಳದಿ ಜಲಧಾರೆಗೆ ಕಳವಳಗೊಂಡು
ಕಣ್ಮನ ಸೆಳೆವ ನಿನ್ನೆದೆಯ ಹರಿವು
ಮಲ್ಲಿಗೆಯ ಮೆಲ್ ಹೊದಿಕೆಯಾಗಿ
ಮೌನದಿ ರೋಧಿಸುತ್ತಿದೆ ಮನಸು
ಬತ್ತಿಯಂತೆ ಹೊಸೆದವನು
ಮುತ್ತಿನ ಮಳೆ ಸುರಿಸಿದವನು
ಅದರದಂಗಳಕೆ ಲಗ್ಗೆಯಿಟ್ಟವನು
ನಿದ್ದೆಗೆಡಿಸಿ ಮರೆಯಾದೆಯೆತ್ತ?
ಬರಿ ಕನವರಿಕೆಗಳೆ ಕಾಡಿದಷ್ಟು
ಕಂಗಳ ಹಣತೆಯಲ್ಲಿ ನಕ್ಷತ್ರಗಳು
ವಿರಹದಾಗ್ನಿಯಲಿ ಬೆಂದು ನರಳಿ
ಉರಿದುರಿದು ನೆಲಕುರುಳುತ್ತ
ಎದೆಯಂಗಳ ಬರಿದಾಗಿದೆ
ಶಶಿಯಾಗಮನದ ನಿರೀಕ್ಷೆಯಲಿ
ಮುಂಗುರುಳ ಮುಂಗಾರಿಗೆ
ಪ್ರೀತಿಯ ಮಿಂಚ ಸಿಡಿಸಿರುವೆ
ಬರಡಾದ ಪ್ರೇಮವ ಕೊನರಿಸಲು
ನಶೆಯ ನತ್ತ ಮುಡಿಸುಬಾರಾ
——————————-
ತುಂಬ ಅರ್ಥಗರ್ಭಿತ ಕವನ…ನಶೆಯ ಆಯಾಮಗಳು ಮನತಟ್ಟಿದವು..ನೈಸ್
ನಶೆಯ ಕಂಪು ತಂಪಾದ ಪದ ಬಳಕೆ ಗಟ್ಟಿಯಾದ ಬಿಗುವಿನ ಒಡನಾಟ ಕಾವ್ಯದಲಿ ಮನೋಹರವಾಗಿದೆ
ಪ್ರೇಮದ ಅಂತರ್ ಬಾಹ್ಯ ದ ಸುಂದರ ತಲ್ಲಣಗಳು ಮನೋಲ್ಲಾಸ ನೀಡುತ್ತದೆ.ತಮ್ಮ ಬರವಣಿಗೆ ಕೌಶಲ್ಯ ಕ್ಕ ಶರಣು ಶರಣು
ವಿಶೇಷವಾದ ಭಾವಲಹರಿಯೊಳು ಹೊರಹೊಮ್ಮುವ ತಮ್ಮ ಬರೆವಣಿಗೆಯೇ ವಿಭಿನ್ನ ಪ್ರತಿಮಾತ್ಮಕತೆಯಲ್ಲಿ ಓದುಗರ ಸೆಳೆಯುವುದು ಮೇಡಂ….
ಸೂಪರ್ ….
ಹೌದು ಎಲ್ಲರಿಂದ ಇದು ಸಾಧ್ಯವಿಲ್ಲ ಇದಕ್ಕೆ ಗಂಡೆದೆಯೇ ಬೇಕು.ನಿಮ್ಮ ಕವನಗಳಿಗೆ ಮೆಚ್ಚುಗೆ ಸೂಚಿಸಲು ನಮಗೆ ಶಬ್ದಗಳ ಬರಗಾಲ.
ತುಂಬಾ ಸೊಗಸಾದ ಭಾವಪೂರಿತ ಕವನ ಶಿವಲೀಲಾ ಮೇಡಂ
Nice super
ಅನುರಾಗದ ಮಿಡಿತವನ್ನು ಪದಗಳಲ್ಲಿ ಹಿಡಿದಿಟ್ಟ ಪರಿ ಬಹಳ ಸುಂದರವಾಗಿದೆ ಅಕ್ಕಾ
ವಿಭಿನ್ನವಾದ ಕವನ, ವಿಶಿಷ್ಟ ಭಾವ ಲೋಕವನ್ನು ತೆರೆಸಿತು..ಸೂಪರ್ ಮೇಡಂ
ನಶೆ ಕವನ ನಶೆಯೆರಿಸಿದೆ. ಭಾವ ಲೋಕದಲ್ಲಿ ವಿಹರಿಸುವಂತೆ ಮಾಡಿದೆ. ಅಭಿನಂದನೆಗಳು
ನಶೆ ಎಂದರೆ ಹೀಗೂ ಇರುತ್ತೆ ಅಂತಾ ಮನಸ್ಸಿಗೆ ಒರೆ ಹಚ್ಚುವಂತಾ ಸಾಲುಗಳು….ತುಂಬಾ ಚೆನ್ನಾಗಿದೆ
Nice