ಗಾಳಿಗಂಧದಲಿ ಪ್ರೇಮ ಸಂದೇಶಗಳು ಸುಳಿಸುಳಿದು ಬಂದವು
ಕೊರಗಿದ ಮನದಂಗಳದಿ ರಂಗೋಲಿ ಬಿಡಿಸಿದವನು ನೀನು

ಉಸಿರುಸಿರಲಿ ಒಲವ ಸರಿಗಮನ ನುಡಿಸಿ ಹದಮಾಡಿದೆ
ಕರಗಿದ ಕನಸನೆಲ್ಲ ಕೆದಕಿ ಚಿಗುರಿಸಿ ಹಸಿರಾಗಿಸಿದವನು ನೀನು

ನೆನಪಿನಾಳದಲ್ಲುದುಗಿದ ಬಯಕೆಗಳಿಗೆ ನೀರೆರೆದು ಹಸಿಮಾಡಿದೆ
ಅಳಿಸಿಹಾಕಿದ ಚಿತ್ರಗಳಿಗೆ ಬಣ್ಣ ಬಳಿದು ಹೊಳೆಸಿದವನು ನೀನು

ಒಡಲಾಳದಲಿ ಬಚ್ಚಿಟ್ಟಿದ್ದ ಹಂಬಲಗಳ ನವಿರಾಗಿ ಹದಮಾಡಿದೆ
ಮಂಪರಿಸಿ ಮುತ್ತಮಳೆಗರೆದು ಬಿಗಿದಪ್ಪಿ ಮುದ್ದಾಡಿದವನು ನೀನು

ಸೊರಗಿದ ಸರಸ ಸಲ್ಲಾಪ ಸಂತೈಸಿ ನಾನಿರುವೆ ಎಂದು ಸಾರಿದೆ
ಹೊತ್ತು ಗೊತ್ತಿಲ್ಲದೆ ಬಳಿಬಂದು ಮರುಳಾಗಿಸಿದವನು ನೀನು

ಮಳೆ ಮೋಡದಂತೆ ತಂಗಾಳಿ ಸೂಸುತ ಬೀಸುತ ತಂಪೆರೆದೆ
ಸಾಕುಬಿಡು ಚಿಂತೆ ಮೈಮರೆತು ಒಂದಾಗೋಣ ಎಂದವನು ನೀನು

ಅನುಳ ಗೋಳು ಕೇಳಿ ಮರುಕಪಟ್ಟು ತಲೆಸವರಿ ಸಮಾಧಾನಿಸಿದೆ
ಗೊಂದಲಗಳ ಸರಿಸಿ ಬಾನ ಹಕ್ಕಿಯಂತಿರೋಣ ಎಂದವನು ನೀನು