ಕಾವ್ಯ ಸಂಗಾತಿ
ಎ.ಎನ್.ರಮೇಶ್. ಗುಬ್ಬಿ
ಹನಿಗಳು
- ಮುತ್ತು.!
ಕಣ್ಣಲ್ಲೇ ನಗುವುದು
ಅವಳಿಗಷ್ಟೇ ಗೊತ್ತು
ಅಧರ ಬಿರಿದರಂತು
ಸುರಿದಂತೆ ಮುತ್ತು.!
- ಅನ್ವೇಷಣೆ.!
ಜಿದ್ದಿಗೆ ಬಿದ್ದಂತೆ ಕವಿಗಳೆಲ್ಲ
ಹುಡುಕುತಿಹರು ಪ್ರತಿನಿತ್ಯ
ಹೊಸ ಉಪಮಾನ ಉಪಮೇಯ
ವರ್ಣಿಸಲು ಅವಳ ಮುಗುಳ್ನಗೆಯ.!
- ಮೋಡಿ.!
ಹಗಲಲ್ಲೂ ಹೊಳೆವ ಬೆಳದಿಂಗಳು
ಅವಳ ಅಧರಗಳಿಂದ ಸ್ಫುರಿವ
ಮನಮೋಹಕ ನಗೆಮುಗುಳು.!
**
- ಪೈಪೋಟಿ.!
ಅವಳ ನಗೆ ಹೊಂಬೆಳಕು ನೋಡಲು
ಮುಗಿಲಲ್ಲು ನಕ್ಷತ್ರಗಳ ನೂಕುನುಗ್ಗಲು
ಹುಣ್ಣಿಮೆಚಂದ್ರನು ಮೋಡಗಳೊಳಗವಿತು
ಒಪ್ಪಿಕೊಂಡಿಹನು ಅವಳೆದುರು ಸೋಲು.!
- ಶಾಕು..!
ಶಾಕು ಹೊಡೆಯಲು ಮುಟ್ಟಲೇಬೇಕೆಂದಿಲ್ಲ
ವಿದ್ಯುತ್ ಹರಿಯುತ್ತಿರುವ ಕಂಬದ ತಂತಿ
ಕಣ್ಣರಳಿಸಿ ಕುಣಿಸುತ ಹುಬ್ಬುಗಳ ಮೆಲ್ಲ
ಅವಳು ನಗೆ ಚೆಲ್ಲಿದರೆ ಸಾಕೊಂದು ಸರತಿ.!
- ಗಾರುಡಿ.!
ಆ ಮುಗಿಲಂಚಿನ ಕಾಮನಬಿಲ್ಲಿನಲಿ
ಸಪ್ತವರ್ಣಗಳ ಸುಂದರ ತೋರಣ.!
ಅವಳಧರದ ಮುಗುಳು ಮಳೆಬಿಲ್ಲಿನಲಿ
ಸಹಸ್ರವರ್ಣಗಳ ಮಧುರ ಹೂರಣ.!
- ಸಮ್ಮೋಹನ.!
ಆ ಹುಬ್ಬುಗಳ ಬಿಲ್ಲನು ಬಾಗಿಸಿ
ತುಂಟನೋಟದ ದಾರವೆಳೆದು
ಮೋಹಕ ನಗೆಬಾಣ ಬಿಟ್ಟೊಡನೆ
ಉರಿಬಿಸಿಲು ಬೆಳದಿಂಗಳಾದಂತೆ
ಜೀವಭಾವ ಸೋತು ಶರಣಾದಂತೆ.!
ಎ.ಎನ್.ರಮೇಶ್. ಗುಬ್ಬಿ.
