ಶಾಲಿನಿ ಕೆಮ್ಮಣ್ಣು ಬದುಕೊಂದು ಭರವಸೆಯ ಲೆಕ್ಕಾಚಾರ

ಕಾವ್ಯ ಸಂಗಾತಿ

ಶಾಲಿನಿ ಕೆಮ್ಮಣ್ಣು

ಬದುಕೊಂದು ಭರವಸೆಯ ಲೆಕ್ಕಾಚಾರ

ಈ ಜೀವನ ನಾಳೆಗಳ ಗುಣಿತಾಕ್ಷರ
ಕಳೆದ ನಿನ್ನೆಗಳ ನೆನಪುಗಳ ಹಂದರ
ಸುಖ ದುಃಖಗಳ ಸಂಕಲನ ವ್ಯವಕಲನ
ಬೇಕು ಬೇಡಗಳ ಗುಣಾಕಾರ ಭಾಗಾಕಾರದ ಜತನ

ಹೆತ್ತವರು ಸಲಹುವರೆಂಬ ಭರವಸೆಯ ಋಣ ಭಾರ
ಒಡಹುಟ್ಟಿದವರು ಹೆಗಲು ಕೊಡುವರೆಂಬ ಭ್ರಾತೃತ್ವ ಸುಂದರ
ಕೈಹಿಡಿದವರು ಜೊತೆ ಇರುವರೆಂಬ ಬಯಕೆಯ ಮಹಾಪೂರ
ಮಕ್ಕಳು ನೆರಳಾಗುವವರೆಂಬ ಆಸೆಯ ಮಂದ ಮಮಕಾರ

ನೆಂಟರಿಷ್ಟರು ನೆರವಾಗುವರೆಂಬ ಅಂಧ ಆಶೋದ್ಗಾರ
ಗೆಳೆಯರು ಕೈ ಬಿಡರೆಂಬ ವಿಶ್ವಾಸ ಗಗನದೆತ್ತರ
ಎಲ್ಲರಿಗೂ ಬದುಕು ಕಲಿಸುವುದು ನಿತ್ಯದ ಪಾಠ ಪ್ರಕಾರ
ಸೋಲು ಗೆಲುವುಗಳ ಜಿದ್ದಾಜಿದ್ದಿ ಥರಥರ

ಇಲ್ಲಿ ಸಿಗುವುದು ಪ್ರತಿ ಅವಕಾಶವು ನಿಯಮಾನುಸಾರ
ಇರುವುದನು ಪ್ರೀತಿಸಿ ಗೆಲುವಾಗಿಸಬೇಕು ನಿರಂತರ
ಕಳೆದ ದಿನಗಳು ಬಾಳಿಗೆ ಅನುಭವದ ಹಾರ
ನಾಳೆಯೂ ಬಂದರೆ ಅದುವೇ ದೈವದ ವರ

---

ಶಾಲಿನಿ ಕೆಮ್ಮಣ್ಣು