ಕಾವ್ಯ ಸಂಗಾತಿ
ರಾಜು ಪವಾರ್
ಭಾಗ್ಯವಿಧಾತಾ
ಆನು-ತಾನು, ನಾನು-ನೀನು ಯಾರು ಭಾಗ್ಯ ವಿಧಾತಾ !?
ಮಣ್ಣಿನ ವಾಸನೆ ಮೂಗಿಗೆ ತಾಗಿದೊಡೆ
ಮಣ್ಣು ಹದಗೊಳಿಸಿ ಭೂಮಿ ಬಿತ್ತನೆಗೆ ಅಣಿ ಯಾಗುವಾತ !
ಅಲ್ಲಿ-ಇಲ್ಲಿ, ಮೇಲೆ-ಕೆಳಗೆ
ಯಾರು ಭಾಗ್ಯ ವಿಧಾತಾ!?
ಬರಡು ನೆಲ ನಂಬಿ ಭವಿಷ್ಯ ಕಂಡುಕೊಳ್ಳುವಾತ !
ಒಳಗೆ-ಹೊರಗೆ, ಸಂದಿ-ಗೊಂದಿಯಲ್ಲಿ
ಯಾರು ಭಾಗ್ಯ ವಿಧಾತಾ!?
ಬರಿ ಮುಗಿಲಿಗೆ ಮುಖಮಾಡಿ ದಾಹ ಇಂಗಿಸಿಕೊಂಡು
ಭುವಿಯ ಹಸಿರು ಕನಸು ಕಾಣುವಾತ!
ನೌಕರ-ಚಾಕರ, ಸಾಹೇಬ-ಸಾಹುಕಾರ
ಯಾರು ಭಾಗ್ಯ ವಿಧಾತಾ!?
ಜಗದ ಜನರಿಗೆ ಸಿರಿತನ ಸುರಿಯುವಾತ!
ಋಷಿ-ಮುನಿ, ಜ್ಞಾನಿ-ವಿಜ್ಞಾನಿ
ಯಾರು ಭಾಗ್ಯ ವಿಧಾತಾ!?
ಮುಖ-ಹಸ್ತ ನೋಡದೆ ಜಗದ ಜಾತಕ ಬರೆಯುವ ರೈತ!
ಆ ದೇಶ, ಈ ದೇಶ
ಆ ಖಂಡ-ಈ ಖಂಡ,
ಯಾರು ಭಾಗ್ಯ ವಿಧಾತಾ!?
ಖಂಡ, ಖಂಡಗಳನ್ನು ಅಖಂಡ ಮಾಡುವಾತ!
ಆತ-ಈತ, ಸುತ್ತ-ಮುತ್ತ
ಯಾರು ಭಾಗ್ಯ ವಿಧಾತಾ!?
ಅರೆ ಹೊಟ್ಟೆಯಲ್ಲಿದ್ದು ಜಗದ ಹಸಿವು ನೀಗಿಸುವ ರೈತ ! ಜಗದ ಭಾಗ್ಯ ವಿಧಾತ!!
ರಾಜು ಪವಾರ್
