ಮಹಾನುಭಾವಿ ಶ್ರೀ ಕಡಕೋಳ ಮಡಿವಾಳಪ್ಪರ ತತ್ತ್ವದಗಳ ವಿಶ್ಲೇಷಣೆ-ಡಾ.ಯಲ್ಲಮ್ಮ ಕೆ ಅವರಿಂದ

ತತ್ವ ಸಂಗಾತಿ

ಡಾ.ಯಲ್ಲಮ್ಮ ಕೆ

ಮಹಾನುಭಾವಿ

ಶ್ರೀ ಕಡಕೋಳ ಮಡಿವಾಳಪ್ಪರ

ತತ್ತ್ವದಗಳ ವಿಶ್ಲೇಷಣೆ-

ಮಹಾನುಭಾವಿ ಶ್ರೀ ಕಡಕೋಳ ಮಡಿವಾಳಪ್ಪರ ತತ್ತ್ವದಗಳ ವಿಶ್ಲೇಷಣೆ

ಮಹಾನುಭಾವಿ ಶ್ರೀ ಕಡಕೋಳ ಮಡಿವಾಳಪ್ಪರ ತತ್ತ್ವದಗಳ ವಿಶ್ಲೇಷಣೆ.
ಈ ದೇಹವು ರೋಗ-ರುಜಿನುಗಳಿಗೆ ತುತ್ತಾದಾಗ ನಮ್ಮ ಕೈ ನಾಡಿಮಿಡಿತ ಅರಿತು ಮದ್ದು ನೀಡುವ ಅನುಭವಿ ವೈದ್ಯನಂತೆ. ಬದಲಾದ ಕಾಲಮಾನಗಳಲ್ಲಿ ಪ್ರಾಚೀನ ಕಾಲದಿಂದಲೂ ಈ ಭಾರತೀಯ ಸಮಾಜದಲ್ಲಿ ತಲೆದೋರಿರಬಹುದಾದ ಅಸ್ವಾಸ್ಥತೆಯನ್ನು ನಿವಾರಿಸಲು ಹಲವು ಸಾಧು – ಸಂತರು, ದಾರ್ಶನಿಕರುಗಳು, ಮಹಾಮೇಧಾವಿಗಳು ಈ ನಾಡಲ್ಲಿ ಹುಟ್ಟಿ-ಬೆಳೆದು ಹೊಳೆಯಾಗಿ ಹರಿದು , ಮಿಂಚಾಗಿ ಹೊಳೆದು, ಮರೆಯಾಗಿ ಹೋಗಿದ್ದಾರೆ. ಅಂಥ ಪ್ರಮುಖರಲ್ಲಿ ಪ್ರಥಮತಃ ಹನ್ನೆರಡನೆಯ ಶತಮಾನದಲ್ಲಿ ಕಲ್ಯಾಣದಲ್ಲಿ ಒಂದು ಹೊಸ ಕ್ರಾಂತಿಯನ್ನು ಹುಟ್ಟುಹಾಕಿದ ಶಿವಶರಣರು  ಸಮತಾವಾದ, ವಿಶ್ವಪ್ರೇಮವನ್ನು ತಮ್ಮ ವಚನ ವಾಙ್ಮಯದ ಮೂಲಕ ಜಗತ್ತಿಗೆ ಸಾರಿ ಕನ್ನಡ ವಚನ ಸಾಹಿತ್ಯಕ್ಕೆ ಜಾಗತಿಕ ಮನ್ನಣೆಯನ್ನು ದೊರೆಯುವಂತೆ ಮಾಡಿದರು. ತದನಂತರದಲ್ಲಿ ಈ ಹಾದಿಯಲ್ಲೇ ಮುನ್ನಡೆದವರೆಂದರೆ..? ಹರಿದಾಸರಾದ ವ್ಯಾಸರಾಯರು, ವಾದಿರಾಜರು, ಪುರಂದರ ದಾಸರು, ಸಂತ ಕನಕದಾಸರು, ರಾಘವೇಂದ್ರ ತೀರ್ಥರು, ವಿಜಯದಾಸರು, ಗೋಪಾಲದಾಸರು, ಜಗನ್ನಾಥ ದಾಸರು, ಗಲಗಲಿ ಅವ್ವನವರು, ಹೆಳವನಕಟ್ಟೆ ಗಿರಿಯಮ್ಮ ಮುಂತಾದವರು ದಾಸ ಪರಂಪರೆಯನ್ನು ಹುಟ್ಟುಹಾಕಿ, ಕೀರ್ತನೆಗಳು, ಸುಳಾದಿಗಳು, ಉಗಾಭೋಗಗಳು, ತತ್ತ್ವಪದಗಳನ್ನು ರಚಿಸಿ ತಂಬೂರಿ ಹಿಡಿದು ಊರೂರು, ಬೀದಿ-ಬೀದಿ ಅಲೆದು ಭಕ್ತಿ-ವೈರಾಗ್ಯದ ಜೀವನಾನುಭವಗಳನ್ನು ಹಾಡುತ್ತ-ಕುಣಿಯುತ್ತ ನೀತಿಬೋಧೆಯನ್ನು ಸಾರಿದರು.  
ಇಂಥ ಪ್ರಮುಖ ತತ್ತ್ವಪದಕಾರರೆಂದರೆ..? ನಿಜಗುಣ ಶಿವಯೋಗಿಗಳು, ಚಿದಾನಂದಾವಧೂತರು, ಸಂತ ಶಿಶುನಾಳ ಶರೀಫ್ ಸಾಹೇಬರು, ನಾಗಲಿಂಗ ಅಜ್ಜನವರು, ಹೇರೂರು ವಿರುಪನಗೌಡರು, ಕಡಕೋಳ ಮಡಿವಾಳಪ್ಪ, ಬಿದನೂರಿನ ಗಂಗಮ್ಮ, ಕಲ್ಲೂರಿನ ತಾಯಮ್ಮ ಮುಂತಾದವರು.

 ಮಹಾನುಭಾವಿ ಶ್ರೀ ಕಡಕೋಳ ಮಡಿವಾಳಪ್ಪ

ಕರ್ನಾಟಕದ ಅಧ್ಯಾತ್ಮಿಕ ಸಂತರ ಪರಂಪರೆಯಲ್ಲಿ ಜ್ಞಾನರತ್ನ, ಅನುಭಾವ ಚಿಂತಾಮಣಿ, ಶಿವಯೋಗಿ ಶ್ರೀ ಕಡಕೋಳ ಮಡಿವಾಳಪ್ಪನವರ ಹೆಸರು ಚಿರಸ್ಥಾಯಿಯಾದುದು. ಸಂತ ಶಿಶುನಾಳ ಶರೀಫ್ ಸಾಹೇಬರ ಪ್ರಭಾವಲಯದಲ್ಲಿದ್ದ ಅವರಂತೆಯೇ ವಿಶಿಷ್ಟ ಅಧ್ಯಾತ್ಮಿಕ ವ್ಯಕ್ತಿತ್ವವನ್ನು ಪಡೆದಿದ್ದರು. ಇವರ ಕಾಲ ಸುಮಾರು ೧೭೮೦ ರಿಂದ ೧೮೫೫ ಎಂದು ವಿದ್ವಾಂಸರ ಅಭಿಪ್ರಾಯದಂತೆ ಅನುಸಿರಿಸಿದೆ. ತನ್ನ ಅಸಾಧಾರಣ ಬುದ್ಧಿಮತ್ತೆ ಯನ್ನು ಮನಗಂಡ ಮಲ್ಲಿಕಾರ್ಜುನಗೌಡ ಎಂಬುವವರ ಕಾಳಜಿಯಿಂದಾಗಿ ಗಬ್ಬೂರಿನ ಸದಾಶಿವ ಸ್ವಾಮಿಗಳಲ್ಲಿ ವಿದ್ಯಾಭ್ಯಾಸ ಪೂರೈಸಿದರು. ಉನ್ನತ ಮಟ್ಟದ ಜ್ಞಾನಾರ್ಜನೆಯನ್ನು ಗುಡ್ಡದ ಗುರುಬಸವ ದೇವರಲ್ಲಿ ಪಡೆದು, ಗುರುಕಾರುಣ್ಯದಿಂದ ಅಧ್ಯಾತ್ಮದಲ್ಲಿ ವಿಶೇಷ ಸಾಧನೆಗೈದರು. ಜಂಗಮ ಮಠಗಳಲ್ಲಿ ಒಂದಾದ ಬಿದನೂರು ಮಠಕ್ಕೆ ಉತ್ತರಾಧಿಕಾರಿಯನ್ನಾಗಿ ಮಾಡಬೇಕೆನ್ನುವ ಆಸೆಗೆ ಜಾತಿ-ಹುಟ್ಟಿನ ಮೂಲ ಕಾರಣವಾಗಿ ಜಂಗಮರು ತಣ್ಣೀರೆರೆಚಿದರು. ಮನೆತನದ ಗುರುಗಳಾದ ಮರುಳಾರಾಧ್ಯರಿಂದ ದೀಕ್ಷೆಕೊಡಿಸಲು ಮುಂದಾದಾಗ ಅದನ್ನು ವಿರೋಧಿಸಿದರು. ಇದೆಲ್ಲವನ್ನು ಕಂಡು ಬೇಸರಿಸಿ ದೇಶಾಂತರ ಹೊರಟು- ಶ್ರೀಶೈಲದವರೆಗೆ ಸಾಗಿದರು. ಅಲ್ಲಿನ ಸಾಧುಗಳಲ್ಲಿ ಹಾಗೂ ನಾಥಪಂಥದ ಸಾಧಕರಲ್ಲಿ ಮಂತ್ರ-ತಂತ್ರವಿದ್ಯೆಗಳನ್ನು ಕಲಿತು, ಅನುಭಾವಿ ಮಾರ್ಗಗಳ ಒಳಹೊಕ್ಕು ಬಂದರು. ತದನಂತರದಲ್ಲಿ ಅರಳುಗುಂಡಿಯ ಮಹಾಮನೆಯಲ್ಲಿ ಜನತೆಗೆ ಪಾರಮಾರ್ಥದ ನೆಲೆ-ಬೆಲೆಯನ್ನು ತಿಳಿಸಿದರು.
ಅರಳಗುಂಡಿಯ ಮಲ್ಲಣ್ಣಗೌಡನ ತಂಗಿ ಭಾಗಮ್ಮ ಕುಷ್ಠರೋಗದಿಂದ ಬಳಲುತಿದ್ದು, ಊರ ಹೊರಗಿನ ಗುಡಿಸಲಲ್ಲಿ ಇಟ್ಟಿದ್ದರು. ಇದನ್ನು ಕಂಡು ಮಡಿವಾಳಪ್ಪನವರು ರೋಗವನ್ನು ಗುಣಪಡಿಸಿದರು. ಇದರಿಂದ ಅವಳು ಅವರಲ್ಲಿಯೇ ದೀಕ್ಷೆ ಪಡೆದು ಶಿಷ್ಯೆಯಾದಳು. ಇದು ಊರಿನ ಜನಗಳ ಕೆಂಗಣ್ಣಿಗೆ ಗುರಿಯಾಗಿ ಕೊಲೆ -ಬೆದರಿಕೆ ಯತ್ನ ನಡೆಯಿತು. ಶಿಷ್ಯರ ಮಾತಿನ ಮೇರೆಗೆ ಜಂಬೇರಾಳಗೆ ಬಂದು ನೆಲೆಸಿ ನಂತರದಲ್ಲಿ ಜೇರ್ವಗಿ ತಾಲ್ಲೂಕಿನ ಕಡಕೋಳಕ್ಕೆ ಬಂದು ನೆಲೆಯೂರಿದರು. ಆ ಊರಿನ ಹಿರೇಬಸ್ಸಪ್ಪ ದೊರೆ ಮತ್ತು ಗೌಡರ ಆಶ್ರಯ ದೊಂದಿಗೆ – ಬೇಡರ, ಕಬ್ಬಲಿಗರ, ದಲಿತರ, ಮುಸ್ಲಿಂರ ಪ್ರೀತಿಗೆ ಪಾತ್ರನಾಗಿದ್ದರಿಂದ ಕಡಕೋಳವನ್ನೇ ತನ್ನ ಕಾರ್ಯ ಕ್ಷೇತ್ರವನ್ನಾಗಿಸಿಕೊಂಡು ಅನುಭಾವಿ ಶರಣನೆನಿಸಿಕೊಂಡನು.

 ಕಡಕೋಳ ಮಡಿವಾಳಪ್ಪರ ಶಿಷ್ಯಬಳಗ :
ಖೈನೂರು ಕೃಷ್ಣಪ್ಪ, ತೆಲಗಬಾಳದ ರೇವಪ್ಪ, ಕಡ್ಲೆವಾಡ ಸಿದ್ದಪ್ಪ, ಚೆನ್ನೂರು ಜಲಾಲ ಸಾಹೆಬ ಸೂಫಿ ಸಂತ, ಅರಳಗುಂಡಿಯ ಭಾಗಮ್ಮ, ಬಸವಲಿಂಗಮ್ಮ, ಮಲ್ಲಣ್ಣಗೌಡ ಮುಂತಾದವರುಗಳು ಕಡಕೋಳ ಮಡಿವಾಳಪ್ಪರ ಶಿಷ್ಯಬಳಗದಲ್ಲಿ ಪ್ರಮುಖರಾಗಿದ್ದಾರೆ. ಈತನ ಮಠವು ತತ್ತ್ವಪದಗಳ ಟಂಕಸಾಲೆಯಾಯಿತು. ಮಡಿವಾಳಪ್ಪ ಹಾಡುತ್ತ ಹಾಡುತ್ತ ಇರಲಾಗಿ ಶಿಷ್ಯಂದಿರು ಬರೆದಿಟ್ಟುಕೊಳ್ಳುತ್ತಿದ್ದರು. ಜಾತಿ-ಮತ-ಧರ್ಮದ ಭೇದವನ್ನೆಣಿಸದೆ ಎಲ್ಲರೊಂದಾಗಿ ಸಮಾಜದ ಉದ್ಧಾರಕ್ಕಾಗಿ ಗುರುವಿನೊಂದಿಗೆ-ಶಿಷ್ಯರು ಕೈಜೋಡಿಸಿದರು. ತತ್ತ್ವಪದಗಳು ಜೀವನಾನುಭವದ ಜೊತೆಗೆ ಸತ್ವಗುಣದ ತತ್ಪರಿಣಾಮವಾಗಿ ಬದುಕಿನ ಬವಣೆಯನ್ನು ನೀಗುವ ಅನ್ವೇಷಣಾ ಪ್ರವೃತ್ತಿಯನ್ನು ತೋರಿದರು.  
ಇವರ ತತ್ಪದಗಳಲ್ಲಿ ಮಂತ್ರ-ತಂತ್ರ, ಶಾಕ್ತ, ನಾಥ, ಅವಧೂತ, ಆರೂಢ, ಹಠಯೋಗ, ಲಯ ಯೋಗ, ಶಿವ ಯೋಗ, ಪುರಾಣ, ಶಿವಾಗಮನದಂಥ ಜ್ಞಾನ ಶಾಖೆಗಳ ಅಂತರಾಳವನ್ನು ಕಾಣಬಹುದಾಗಿದೆ. ತತ್ತ್ವಪದಗಳಲ್ಲಿ ಲೋಕಪ್ರಜ್ಞೆ ಮತ್ತು ಅನುಭಾವಿಕ ಅನನ್ಯತೆಯನ್ನು ಜನರು ಒಪ್ಪಿ ಅಪ್ಪಿಕೊಂಡರು. ಮಾಯೆ ಎಂದರೆ..? ‘ಕಾಯ ದಂಡಿಸಿ ಕಾಯಕ ಮಾಡುವುದನ್ನು ಮಾಯೆ’ ಎಂದು ಮಡಿವಾಳಪ್ಪನವರು ವ್ಯಾಖ್ಯಾನಿಸಿದ್ದಾರೆ. ಶಿಷ್ಯನಾದ ಸೂಫಿ ಸಂತ ಜಲಾಲ್ ಸಾಹೇಬನ ‘ಜಂಗಮ ನಾಗಬೇಕಾದರೆ ಮನ ಲಿಂಗ ಮಾಡಿ ಕೊಂಡಿರಬೇಕು’ ಎಂಬ ಮಾತಿಗೆ ‘ಫಕೀರನಾಗಬೇಖಾದರೆ ಮನದ ವಿಕಾರವನ್ನೆಲ್ಲ ತೊರೆದಿರಬೇಕೋ’ ಮಡಿವಾಳಪ್ಪ ತತ್ತ್ವಪದದ ಮೂಲಕವೇ ಉತ್ತರಿಸುತ್ತಾರೆ. ಗುರು-ಶಿಷ್ಯರ ಜುಗಲಬಂದಿಯನ್ನು ಕೇಳಲು ಸೊಗಸು. ಮತ್ತೊಬ್ಬ ಶಿಷ್ಯನಾದ ಕೃಷ್ಣಪ್ಪನು ‘ನಾ ಕಡಕೋಳದ ಗುಲಾಮ, ನನ್ನ ಹೆಸರ ತಗೆಯಬ್ಯಾಡರಿ ಇನ್ನೊಮ್ಮೆ’ ಎಂದು ಹಾಡಿದಾಗ ಮಗದೊಬ್ಬ ಶಿಷ್ಯನಾದ ಸಿದ್ದಪ್ಪ ‘ನಾನು ಏನು ಬಲ್ಲೇನಪ್ಪ ನಿಮ್ಮ ಕೂಸ, ಅಂದಿಗಿಂದಿಗಿ ನಿಮ್ಮ ದಾಸ’ ಎಂದು ಹಾಡಿದನು. ಇದನ್ನು ಚಿತ್ತವಿಟ್ಟು ಆಲಿಸಿದ ಮಡಿವಾಳಪ್ಪ ಶಿಷ್ಯೋತ್ತಮರ ತತ್ತ್ವಪದಗಳಲ್ಲಿ ಅಹಂಕಾರವಿಲ್ಲದಿರುವುದನ್ನು ಗಮನಿಸಿ, ಅಂದಿನಿಂದ ಶಿಷ್ಯನ ಹೆಸರನ್ನೇ (ಸಿದ್ದಪ್ಪ) ಅಂಕಿತನಾಮವನ್ನಾಗಿಸಿಕೊಂಡು ಶಿಷ್ಯನ ಹೆಸರನ್ನು ಅಜರಾವiರಗೊಳಿಸಿದನು.
ಹೀಗೆ ನೂರಾರು ಶಿಷ್ಯೋತ್ತಮರಿಗೆ ಪಾರಮಾರ್ಥಿಕ ಮಾರ್ಗವನ್ನು ತೋರಿ, ಲೌಕಿಕ ಮತ್ತು ಅಲೌಕಿಕ ಗಳನ್ನೆರೆಡು ಸಮನ್ವಯಗೊಳಿಸಿದ ಮಹಾಸಂತ, ಬಿಡಿಯಿಂದ ಇಡಿ ಎಡೆಗೆ ಸಾಗಿ ತತ್ತ್ವಪದಗಳಿಗೆ ಹೊಸ ಭಾಷ್ಯವನ್ನು ಬರೆದ ಅನುಭಾವಿಕ ಸಂತ.  
 ಮಡಿವಾಳಪ್ಪರ ತತ್ತ್ವಪದ ಸಾಹಿತ್ಯ: ಅಂತರಂಗ ಬಹಿರಂಗ, ರಾಗ : ಬೈರಾಗ ಭೈರವ. ತಾಳ : ದೀಪಚಂದಿ

೧ .ಬಾಯಿಲೊಂದು ಆಡ್ತೀರಿ ಮನಸಿನೊಳಗೊಂದು ಮಾಡ್ತೀರಿ
ಬರೆದಿಟ್ಟದ್ದು ಓದಿಕೊಂಡು ಭ್ರಾಂತಿಗೆಟ್ಟು ಹೋಗ್ತೀರಿ (ಪಲ್ಲವಿ )

ಶೀಲವಂತರಂತೀರಿ ಸುಳ್ಳೆ ಶೀಲ ಮಾಡ್ತೀರಿ
ಸತಿಲಿಂಗ ಕಟ್ಟಿಕೊಂಡು
ಸತ್ಯಾನಾಸ ಆಗಿ ಹೋಗ್ತೀರಿ

ಮುಸಲ್ಮಾನರಂತೀರಿ ತುರ್ತು ಸಂತಿ ಮಾಡ್ತೀರಿ
ಉಸುಲ ಬಿಟ್ಟು ಫಾತ್ಯಾಕೊಟ್ಟು
ಬಿಸಿಮಿಲ್ಲಾಂತ ಅಂತೀರಿ

೨ .ಬ್ರಾಹ್ಮಣರಂತ ಹೇಳತೀರಿ ನೀರಾಗ ಮುಣು
ಮುಣಗಿ ಹೇಳ್ತೀರಿ ಪಾಪದಿಂದ ಸುಟ್ಟುಕೊಂಡು
ದೀಪ ಬಡಕೊಂಡು ಹೋಗ್ತೀರಿ

 ೩ .ಸಾಧುರಂತ ಹೇಳ್ತೀರಿ ಸೋಹಂ ಭಜನ ಮಾಡ್ತೀರಿ
ಅಡ್ಡದುಡ್ಡಿಗೆ ಆಸೆ ಮಾಡಿ ದಡ್ಡರಾಗಿ ಹೋಗತೀರಿ
ವಟ್ಟ ಚರಮೂರ್ತಿ ಅಂತೀರಿ ಪಾರಮಾರ್ಥ ನೆನಿತೀರಿ
ಪರನಾರಿ ಸ್ನೇಹ ಮಾಡಿ ಗುಡ್ಡದ ಮಹಾಂತಗ ಹಾಕ್ತೀರಿ
೪ .ಶರಣರ ನಡೆ-ನುಡಿ ಸಿದ್ಧಾಂತದಂತೆ ;

ನಮ್ಮ ಮಾತು ಬರಿ ಮಾತಾಗದೇ ಅದು ಕೃತಿಯಲ್ಲಿ ಒಡಮೂಡಿಬರಬೇಕು ಎಂಬುದು ತತ್ತ್ವಪದಕಾರರ ದೃಷ್ಟಿಧೋರಣೆಯಾಗಿದೆ. ಮಾತಿನೊಳಗೊಂದು ಮನಸ್ಸಿನೊಳಗೊಂದು ಇಬ್ಬದಿತನ ಪ್ರದರ್ಶನವನ್ನು ಟೀಕಿಸುತ್ತ, ಬರೆದಿಟ್ಟಿದ್ದನ್ನು ನೀವು  ವೇದೋಪನಿಷತ್ತು, ಆರು ಶಾಸ್ತ್ರ, ಹದಿನೆಂಟು ಪುರಾಣಗಳನ್ನು ಸಂಪ್ರದಾಯ ಶರಣರಾಗಿ ಓದಿ ಓದಿ ಭ್ರಾಂತಿಗೆಟ್ಟು-ಹುಚ್ಚರಾಗಿ ಹೋಗ್ತೀರಿ. ಶೀಲವಂತರೆಂದು ಬಾಹ್ಯಾಡಂಭರದಲ್ಲಿ ಸುಳ್ಳೆ ಶೀಲವನ್ನು ಮಾಡ್ತೀರಿ, ‘ಶರಣ ಸತಿ, ಲಿಂಗ ಪತಿ’ ಶಿವ ಶರಣರ ಅನುಭಾವದ ನುಡಿಯಂತೆ, ಸತಿಲಿಂಗ ಕಟ್ಟಿಕೊಂಡು ಅಪಚಾರವೆಸಗಿದರೆ ಸತ್ಯನಾಸ ಆಗಿ ಹೋಗ್ತೀರಿ ಎಂದು ಎಚ್ಚರಿಸುತ್ತಾನೆ.
ಒಬ್ಬ ನಿಜವಾದ ಮಸಲ್ಮಾನನು ಹೇಗಿರಬೇಕೆಂದರೆ..? ಆತನ ಮನೆಯ ಎಡ-ಬಲದಲ್ಲಿ ಯಾರೊಬ್ಬರೂ ಹಸಿವೆಯಿಂದ ಬಳಲುತ್ತಿರುವವರ ನರಳಿಕೆಯನ್ನು ಕಂಡು ಅಂಥ ದೀನ-ದಲಿತ, ದಟ್ಟದರಿದ್ರರನ್ನು ಕರೆದು ಇದ್ದುದರಲ್ಲಿ ಸ್ವಲ್ಪ ಅನ್ನವನ್ನು ದಾನ ನೀಡಿ ತಾನುಣಬೇಕು. ಹಾಗೆ ಮಾಡದೇ ತುರ್ತು ಸಂತಿ ಮಾಡಿ ಅಂದರೆ..? ಒಂದೊತ್ತಿನ ಊಟಕ್ಕೆ ಬೇಕಾದ ಆಹಾರ ಪಡಿ-ಪದಾರ್ಥಗಳನ್ನು ಸಂತೆಯಿಂದ ಕೊಂಡು ತಂದು ಅಡುಗೆ ಮಾಡಿಕೊಂಡು ತಿಂದುಂಡು ಡೇಗಿ, ಕೈತೊಳೆದುಕೊಂಡರೆ ಹಸಿದು ಬಂದ ನಿರ್ಗತಿಕರಿಗೆ ಏನನ್ನು ನೀಡುವಿರಿ..? ಎಂದು ಪ್ರಶ್ನಿಸುತ್ತ. ಉಸುಲಾ (ಮಂತ್ರ, ಕಲ್ಮಾ ಓದುವದನ್ನು) ಬಿಟ್ಟು, ಫಾತ್ಯಾಕೊಟ್ಟು (ಧೂಪ ಅಥವ ಲೋಬಾನ ಹೊಗೆ ಸಮರ್ಪಿಸಿ) ಬಿಸಿಮಿಲ್ಲಾಂತ ಅಂತೀರಿ ಇದು ವ್ಯರ್ಥವೆಂದು. ಆಚಾರ-ವಿಚಾರ ತಿಳಿದು ಪರಿಪಾಲಿಸ ಬೇಕೆಂದು ಹೇಳುತ್ತಾನೆ.
ಬ್ರಾಹ್ಮಣರಂತ ಹೇಳಿ ನೀರಿನಲ್ಲಿ ಮುಣು ಮುಣಗಿ ಎದ್ದರೆ ದುರಿತ ಕರ್ಮಗಳು ತೊಳೆದುಕೊಂಡು ಹೋಗದೇ ಪಾಪದ ದೆಸೆಯಿಂದ ಒಂದು ದಿನ ಸತ್ತು ಚಿತೆಯಲ್ಲಿ ಸುಟ್ಟುಕೊಂಡು ದೀಪ ಬಡಕೊಂಡು ಹೋಗ್ತೀರಿ ಎಂದು ಹೇಳಿದ್ದಾನೆ. ಸಾಧು ಸಂತರಂತ ಹೇಳಿಕೊಂಡು, ಸೋಹಂ ಭಜನೆ ಮಾಡಿಕೊಂಡು  ಅಡ್ಡದುಡ್ಡಿಗೆ ಆಸೆ ಮಾಡಿ ದಡ್ಡರಾಗಿ ಹೋಗತೀರಿ, ವಟ್ಟ, ಹರ-ಗುರು-ಚರಮೂರ್ತಿ ಅಂತೀರಿ ಇಹವನ್ನು ಮರೆತು ಪರವನ್ನು / ಪಾರಮಾರ್ಥ ನೆನಿತೀರಿ ಪರನಾರಿ ಸಂಗ-ಸ್ನೇಹ ಮಾಡಿ ಎಲ್ಲ ತಪ್ಪು-ಒಪ್ಪುಗಳನ್ನು ಗುಡ್ಡದ ಮಹಾಂತನ ಮೇಲೆ ಭಾರ ಹಾಕ್ತೀರಿ. ಹೀಗೆ ಎಲ್ಲ ಮತ-ಧರ್ಮಗಳ ಡಾಂಭಿಕ ಆಚಾರ-ವಿಚಾರಗಳನ್ನು ಕಟುವಾಗಿ ವಿಡಂಬನೆ ಮಾಡಿದ್ದಾರೆ.

—————————————————-

ಡಾ.ಯಲ್ಲಮ್ಮ ಕೆ
.