ಕಾವ್ಯ ಸಂಗಾತಿ
ಅನ್ನಪೂರ್ಣ ಸಕ್ರೋಜಿ ಪುಣೆ-
ಗುರುವಂದನೆ
ಅಧ್ಯಾತ್ಮಿಕ ಅನ್ವೇಷಣೆಯ
ಅಂತರಂಗದ ಆಚರಣೆಗೆ
ಜೀವಶಕ್ತಿ ನೀಡುವ ಗುರುವಿಗೆ ವಂದನೆ
ಅನವರತವೂ ಅಮ್ಮನಂತೆ
ಅನುಪಮ ಪ್ರೀತಿತೋರಿಸುತ
ಜ್ಞಾನಶಕ್ತಿ ನೀಡುವ ಗುರುವಿಗೆ ವಂದನೆ
ಅಹಂಕಾರ ಮಮಕಾರಗಳ
ಅಳಿಸುತ ಅರಿವಿನರಮನೆಗೆ
ಕರೆದೊಯ್ಯುವ ಗುರುವಿಗೆ ವಂದನೆ
ಅಜ್ಞಾನಂಧಕಾರ ಪರದೆ ಸರಿಸಿ
ಅಮೃತಸುಧೆಯನುಣಿಸುವ
ಅನುಪಮೇಯ ಗುರುವಿಗೆ ವಂದನೆ
ಅಂತರಂಗದ ಪಯಣದಲಿ
ಅನುಭವದ ಆನಂದದಲಿ
ಮುಳುಗೇಳಿಸುವ ಗುರುವಿಗೆ ವಂದನೆ
ಆಷಾಢ ವ್ಯಾಸ ಪೂರ್ಣಿಮೆ
ಗುರು ಪೂರ್ಣಿಮೆ ಚಂದ್ರನ
ಪ್ರಕಾಶ ನೀಡುವ ಗುರುವಿಗೆ ವಂದನೆ
ಗುರು ಹಿಂದೆ ಗುರಿ ಮುಂದೆ
ಇರಲು ಭಯವೇ ಇರದು
ಅಭಯದಾತ ಗುರುವಿಗೆ ವಂದನೆಗಳು
ಗುರುದೇವ ಸುಪ್ತ ಪ್ರಜ್ಞೆಯಲಿ
ಶಿವನ ಗುಪ್ತ ರೂಪ ತೋರಿಸಿ
ಮುಕ್ತನನ್ನಾಗಿ ಮಾಡುವ ಮೋಕ್ಷದಾತನು
ಸರ್ವಧರ್ಮ ಸಂಪ್ರದಾಯದ
ಸಾರ್ವಕಾಲಿಕ ಗುರುತತ್ವಕೆ
ಕೃತಜ್ಞತಾಪೂರ್ವಕ ನನ್ನ ವಂದನೆಗಳು
ಅನ್ನಪೂರ್ಣ ಸಕ್ರೋಜಿ ಪುಣೆ
