ಕಾವ್ಯ ಸಂಗಾತಿ
ಎ.ಎನ್.ರಮೇಶ್.ಗುಬ್ಬಿ
ಹನಿಗಳು
- ನಿವೃತ್ತ..?
ಕಡೆಗಣಿಸಬೇಡಿರಿ ನಿವೃತ್ತನೆಂದು
ವೃತ್ತಿ ಸಮಯಕ್ಕಿಂತಲೂ ಇಂದು
ಅವನೀಗ ಹೆಚ್ಚು ಕಾರ್ಯಪ್ರವೃತ್ತ
ಮನೆಕೆಲಸದಲ್ಲೀಗವನು ನಿಷ್ಣಾತ.!
- ವೃತ್ತಿ-ಪ್ರವೃತ್ತಿ.!
ವೃತ್ತಿಗಿಹುದು ನಿವೃತ್ತಿ
ಪ್ರವೃತ್ತಿಗೆಲ್ಲಿಹುದು ನಿವೃತ್ತಿ?
ಉಸಿರಿರುವವರೆಗೂ ನಿತ್ಯ
ನಡೆಸಬಹುದು ದಿನಂಪ್ರತಿ.!
- ಸಿಂಹಸ್ವಪ್ನ.!
ಅಂದು ಅವನು ವೃತ್ತಿಯಲ್ಲಿದ್ದಾಗ
ಎಲ್ಲರಿಗೂ ಅಕ್ಷರಶಃ ಸಿಂಹಸ್ವಪ್ನ.!
ನಿವೃತ್ತಿಯಾದ ಮೇಲೆ ಇಂದೀಗ
ಹೆಂಡತಿಯೇ ಅವನಿಗೆ ಸಿಂಹಸ್ವಪ್ನ.!
ಇರುಳಲ್ಲು ಬೀಳುತಿಲ್ಲ ಸಿಹಿಸ್ವಪ್ನ.!!
- ಕಾಲ.!
ವೃತ್ತಿಯಲ್ಲಿರುವಾಗ ಅಧಿಕಾರವಿರುವಾಗ
ಕಾಲು ಕಾಲಿಗೂ ಎಲ್ಲಕ್ಕು ಆಳು-ಕಾಳು.!
ನಿವೃತ್ತಿಯಾಗಿ ವಿಶ್ರಾಂತನಾದ ಮೇಲೀಗ
ನಾನೆ ಹೋಗಬೇಕು ತರಲು ಬೇಳೆಕಾಳು.!
- ಅನಾವರಣ.!
ವೃತ್ತಿ ಪದವಿಗಳಿರುವಾಗ ಬಹುಪಾಲು
ಕಾಣುವುದೆಲ್ಲ ಮಿಥ್ಯ ಮಾಯ ನರ್ತನ
ಭ್ರಮೆ ಭ್ರಾಂತಿ ಭಟ್ಟಂಗಿಗಳ ಸಂಕೀರ್ತನ
ನಿವೃತ್ತರಾದ ಮೇಲೆಯೇ ಸಾಲು-ಸಾಲು
ಸಾಕಾರವಾಗುವುದು ವಾಸ್ತವ ನಗ್ನದರ್ಶನ
ಸುತ್ತ-ಮುತ್ತಲಿನವರ ನಿತ್ಯ ಸತ್ಯದರ್ಶನ.!
- ಅಜಗಜಾಂತರ.!
ವೃತ್ತಿಯಲ್ಲಿದ್ದಾಗ ನಿತ್ಯ ಅವನಿಗಂದು
ಎರಡು ಪಂಚು ಒಂದು ಲಂಚು
ಬದುಕು ಸುಖಸೌಖ್ಯದ ಮಿಂಚು.!
ನಿವೃತ್ತಿಯಾದ ಮೇಲೀಗ ಇಂದು
ಮನೆಗುಡಿಸಿ ಒರೆಸಬೇಕು ಇಂಚಿಂಚು
ತೊಳೆಯಬೇಕು ಪಾತ್ರೆಯ ಅಂಚಂಚು
ನಿಲ್ಲಬೇಕು ಅಮ್ಮಾವ್ರೆದುರು ಕೈಚಾಚುತ್ತ
ಒಂದುಲೋಟ ಚಹಾಕ್ಕು ಅಂಗಲಾಚುತ್ತ.!
ಎ.ಎನ್.ರಮೇಶ್.ಗುಬ್ಬಿ.
About The Author
