ಕಾವ್ಯ ಸಂಗಾತಿ
ಮಧು ಕಾರಗಿ
ಪ್ರೇಮ ತೀರುವುದಿಲ್ಲ !
ನಿನ್ನ ಕಾಣುವ ದಿನ
ತುಟಿಗಳಿಗೆ ಅದೇನೋ ಸಡಗರ
ರಂಗು ಬಳಿದು ಸಜ್ಜಾಗಿರುತ್ತವೆ
ಏನು ಮಾತಾಡಲಿ?
ಹೇಗೆ ಮಾತಾಡಲಿ?
ಪದಗಳಿಗೆ ಹುಡುಕಾಡಿ ತಡಕಾಡಿ
ಆನಂದದ ಕಡಲಿನಲ್ಲಿ ಏನೇನೂ
ಸಿಗದಾದ ಮೇಲೆ
ಸೋತು ಶರಣಾಗುತ್ತವೆ!
ನನ್ನಲ್ಲಿ ಇರುವ
ಒಂದೇ ಧೈರ್ಯವೆಂದರೆ!?
ಸೋಲುವುದಿಲ್ಲ ಈ ಕಣ್ಣುಗಳು
ನೋಡುವುದಿಲ್ಲ ನೆಲ
ನೀ ಎದುರಲ್ಲೇ ಇರಲು!
ನೀ ನೆಟ್ಟ ದೃಷ್ಟಿಗೆ
ನೀ ಹಾಕಿದ ಪ್ರಶ್ನೆಗೆ
ಎಷ್ಟೊಂದು ದಿಟ್ಟ ಸ್ಪಷ್ಟ ಉತ್ತರ
ಜಗದೆಲ್ಲ ಸಮಾಚಾರಗಳ
ಅರುಹಿ ತಿಳಿಯುವವು
ಈ ಮುಗಿಯದ ಮಾತುಗಳ ನಡುವೆ
ಕಾಲ ಜಾರಬಹುದಷ್ಟೇ ಹುಡುಗ ;
ಪ್ರೇಮ ತೀರುವುದಿಲ್ಲ !
ಮಧು ಕಾರಗಿ
