ಕಾವ್ಯ ಸಂಗಾತಿ
ಮುತ್ತು ಬಳ್ಳಾ ಕಮತಪುರ
ಗಜಲ್
ಮನದೊಳಗಿನ ಆಳದಲಿ ಅಳಿಯದೆ ಉಳಿದ ಪುಟಗಳೆ ದೊಡ್ಡದು |
ಕಳೆದ ನೋವಿಗೆ ಬೆನ್ನ ಹಿಂದೆಯೆ ಹಗೆ ಸಾಧಿಸದ ನಾಳೆಗಳೆ ದೊಡ್ಡದು ||
ಸಡಗರದ ಇತಿಹಾಸ ಪುಟಗಳಲಿ ಕಣ್ಣೀರ ಕಥೆಗೆ ಮರು ನಾಮಕರಣ |
ಸಕಾಲದಲಿ ಬದುಕಿನ ಬಂಡಿಗೆ ಸದಾಚಾರದ ಮಾತುಗಳೆ ದೊಡ್ಡದು ||
ಸಾಧ್ಯವಾದರೆ ಸೇತುವೆಯ ಕಟ್ಟು ಉರಳಿಸುವ ದಾಳ ನೀನಾಗಬೇಡ |
ಕೇಡಿಲ್ಲದ ಸಂತೆಯೊಳಗೆ ಇಲ್ಲಗಳ ನಡುವಿನ ಕ್ಷಣಗಳೆ ದೊಡ್ಡದು ||
ದೇವನೊಲುಮೆ ಹುಡುಕುವ ಭರದಲಿ ಕೂಡಿ ಹಚ್ಚಿಟ್ಟ ದೀಪ ಬೆಳಗು |
ಇರುವಿಕೆಯ ಬಗೆಗಿನ ಬೆರಗು ಚಿಗುರಿದ ಹೂವಿನ ದಳಗಳೆ ದೊಡ್ಡದು ||
ಮಣ್ಣಿನಲಿ ಮಣ್ಣಾದ ಮುತ್ತುವಿನ ಕಳೆಬರ ನೆಲದ ಋಣವನು ತೀರಿಸೀತು |
ಮತ್ತೇಕೆ ಕೆದಕುವೆ ದಮನಿತರ ಉಸಿರನಾದ ಅರಿತ ಧ್ವನಿಗಳೆ ದೊಡ್ಡದು||
ಮುತ್ತು ಬಳ್ಳಾ ಕಮತಪುರ
