ಕಾವ್ಯ ಸಂಗಾತಿ
ಡಾ ಅನ್ನಪೂರ್ಣ ಹಿರೇಮಠ-
ಗಜಲ್
:ನಿಜದ ಪ್ರೀತಿಯ ಹುಡುಕುತ ಕಂಗಾಲಾಗಿದೆಯೋ ಈ ದಿಲ್
ಸತ್ಯದ ಪ್ರೇಮವ ತಡಕಾಡುತ ಬೆಂಡಾಗಿದೆಯೋ ಈ ದಿಲ್
ಜಗದ ಹುಚ್ಚಾಟಗಳಿಗೆ ಬಳಲಿ ಬಳಲಿ ಬೆಚ್ಚಿ ಬಿದ್ದಿರುವೆನು
ನಂಬಿದ ಸ್ನೇಹವ ಕರೆಯುತ ತುಂಡಾಗಿದೆಯೋ ಈ ದಿಲ್
ಆಡೋ ಮಾತುಗಳ ನಲಿವೆಂದು ತಿಳಿದು ನೊಂದಿರುವೆ
ಜೀವದ ಒಲವ ಬಯಸುತ ನಂಜಾಗಿದೆಯೋ ಈ ದಿಲ್
ಕಣ್ಣೋಟದ ಹೂಬಾನವೆಂದು ಮರುಳಾಗಿ ಹೋಗಿರುವೆ
ಜಿನುಗುವ ಜೇನ ಅರಸುತ ತಪ್ತವಾಗಿದೆಯೋ ಈ ದಿಲ್
ಅಂತರಾತ್ಮದಂಕುರಿಸಿದ ಬಂಧ ದೇವರು ಕರುಣೆಯೆಂದೆ
ಮಾಸದ ತಿಳಿಗೊಳವ ನೀರಿಕ್ಷಿಸುತ ಬೇಸತ್ತಿದೆಯೋ ಈ ದಿಲ್
ಫಲಾಪೇಕ್ಷೆ ಬಯಸದೆ ಸತ್ಯ ಸಾಕ್ಷಾತ್ಕಾರವೆಂದು ಒಪ್ಪಿದೆ
ಕುಂದದ ಬಯಕೆಯ ಹರಡುತ ಕರಗುತಿದೆಯೋ ಈ ದಿಲ್
ಸಂಬಂಧವೆಂದರೆ ಆತ್ಮದನುಸಂಧಾನವೆಂದವಳು ಈ ಅನು
ಮೋಸದ ಸಂಚಲ್ಲಿ ಸಿಕ್ಕಿಕೊಳ್ಳುತ ಸುಕ್ಕುಗಟ್ಟಿದೆಯೋ ಈ ದಿಲ್
ಡಾ ಅನ್ನಪೂರ್ಣ ಹಿರೇಮಠ.
About The Author
