ಕಾವ್ಯ ಸಂಗಾತಿ
ಡಾ ಅನ್ನಪೂರ್ಣ ಹಿರೇಮಠ-
ಗಜಲ್
ಮೋಸ ಮಾಡೋ ಖಯಾಲಿಯದಲ್ಲ ಈ ಮೊಹಬ್ಬತ್
ಮೋಜ ನೋಡೋ ಮಸಲತ್ತಿನದಲ್ಲ ಈ ಮೊಹಬ್ಬತ್
ಹಾತೊರೆವ ಹಂಬಲಗಳ ಬಳ್ಳಿ ಹರಡಿ ನಿಂತಿದೆಲ್ಲೆಡೆ
ಸೊಕ್ಕು ತೋರೋ ಖದರಿನದಲ್ಲ ಈ ಮೊಹಬ್ಬತ್
ತುಳುಕೊ ಭಾವದಲೆಗಳ ತುಂಬಿ ನಿಂತಿದೆ ಭಾವಕೊಳ
ಹೊಂಚು ಹಾಕೋ ಸಂಚಿನದಲ್ಲ ಈ ಮೊಹಬ್ಬತ್
ಉಕ್ಕಿ ಹರಿವ ಆಸೆಗಳ ಬಿಂದಿಗೆ ಮನಭಾರವಾಗಿದೆ
ಮಿಂಚಿ ಮಾಯವಾಗೊ ಕ್ಷಣಿಕದಲ್ಲ ಈ ಮೊಹಬ್ಬತ್
ಮೌನದ ಬುತ್ತಿಯಲ್ಲಿ ನೋವಿನ ತುತ್ತುಗಳೆ ತುಂಬಿವೆ
ಸುರಿಸಿ ಹಗುರಾಗೋ ಮೋಡದಂತಲ್ಲ ಈ ಮೊಹಬ್ಬತ್
ಜೀವದ ಜತನದಲಿ ಕಥೆ ಹೇಳುವ ಕನಸುಗಳು ತುಂಬಿವೆ
ವ್ಯಥೆಯನೇ ಹಾಡೋ ಗಾಥೆಯಲ್ಲ ಈ ಮೊಹಬ್ಬತ್
ಕೂಗಿ ಕೂಗಿ ಅನುಳ ಕೊರಳ ಧ್ವನಿ ಕುಗ್ಗಿ ಕಂಗಾಲಾಗಿದೆ
ತಾಳದ ಬೇಗೆ ನೀಡೋ ಉರಿಯಂತಲ್ಲ ಈ ಮೊಹಬ್ಬತ್
ಡಾ ಅನ್ನಪೂರ್ಣ ಹಿರೇಮಠ
ತುಂಬ ಚೆನ್ನಾಗಿದೆ