ಗಜಲ್
ದೇವರಾಜ್ ಹುಣಸಿಕಟ್ಟಿ
ನೋವು ಮಾತನಾಡಿದಷ್ಟು ಸಂತಸ ಮಾತನಾಡಲೇ ಇಲ್ಲಾ….!
ವಿರಹ ಕೊಟ್ಟಷ್ಟು ಹಿತಾನುಭವ ಪ್ರೀತಿ ಕೊಡಲೇ ಇಲ್ಲಾ…..!!
ಜಗದೊಳಗೆ ಸುಖ ದುಃಖವನ್ನಳಿಯುವ ಮಾಪನವುಂಟೆ..?
ಹೃದಯ ಬಿಕ್ಕಿದಷ್ಟು ಕಂಗಳು ಕಂಬನಿ ಸುರಿಸಲೇ ಇಲ್ಲಾ
ನಿಜ ಹೇಳಲಾ ಅತ್ತು ಹಗುರಾಗುವುದೆಲ್ಲ ಜಗದ ಸುಳ್ಳಿನ ಒಪ್ಪಂದ..ಗೆಳೆಯ
ಮನ ರೋಧಿಸಿದರೆಷ್ಟು ಎದೆಯ ಭಾರ ಇಳಿಯಲೇ ಇಲ್ಲಾ
ತೆರೆದ ಒಲವ ಬಾಗಿಲುಗಳಿಗೆ ಅದೆಷ್ಟು ಬೀಗ ಜಡಿಯಬಹುದು ಹೇಳಿ..?
ಅದೆಷ್ಟು ದೂರ ಸರಿದರೂ ನೀನು ನೆನಪಿನ ಅಂಗಳದಿಂದ ಜಾರಲೇ ಇಲ್ಲಾ
ಹೃದಯದ ಬಯಕೆಯ ಬಳ್ಳಿ ಬಯಸಿ ಮುಡಿದು ಉದುರಿದ ಹೂವಲ್ಲವೇ
ನಿನ್ನ ಹೊರೆತು ಅದೆಷ್ಟೇ ದೀಪ ಉರಿದರೂ ದೇವ ನಗರಿಯ ಕತ್ತಲೆ ಕಳೆಯಲೇ ಇಲ್ಲಾ
About The Author
