ಎ.ಎನ್.ರಮೇಶ್. ಗುಬ್ಬಿ ಅವರ ಹನಿಗಳು - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಾವ್ಯ ಸಂಗಾತಿ

ಎ.ಎನ್.ರಮೇಶ್. ಗುಬ್ಬಿ

ಹನಿಗಳು

ಕಣ್ಣಲ್ಲೇ ನಗುವುದು
ಅವಳಿಗಷ್ಟೇ ಗೊತ್ತು
ಅಧರ ಬಿರಿದರಂತು
ಸುರಿದಂತೆ ಮುತ್ತು.!

ಜಿದ್ದಿಗೆ ಬಿದ್ದಂತೆ ಕವಿಗಳೆಲ್ಲ
ಹುಡುಕುತಿಹರು ಪ್ರತಿನಿತ್ಯ
ಹೊಸ ಉಪಮಾನ ಉಪಮೇಯ
ವರ್ಣಿಸಲು ಅವಳ ಮುಗುಳ್ನಗೆಯ.!

ಹಗಲಲ್ಲೂ ಹೊಳೆವ ಬೆಳದಿಂಗಳು
ಅವಳ ಅಧರಗಳಿಂದ ಸ್ಫುರಿವ
ಮನಮೋಹಕ ನಗೆಮುಗುಳು.!

ಅವಳ ನಗೆ ಹೊಂಬೆಳಕು ನೋಡಲು
ಮುಗಿಲಲ್ಲು ನಕ್ಷತ್ರಗಳ ನೂಕುನುಗ್ಗಲು
ಹುಣ್ಣಿಮೆಚಂದ್ರನು ಮೋಡಗಳೊಳಗವಿತು
ಒಪ್ಪಿಕೊಂಡಿಹನು ಅವಳೆದುರು ಸೋಲು.!

ಶಾಕು ಹೊಡೆಯಲು ಮುಟ್ಟಲೇಬೇಕೆಂದಿಲ್ಲ
ವಿದ್ಯುತ್ ಹರಿಯುತ್ತಿರುವ ಕಂಬದ ತಂತಿ
ಕಣ್ಣರಳಿಸಿ ಕುಣಿಸುತ ಹುಬ್ಬುಗಳ ಮೆಲ್ಲ
ಅವಳು ನಗೆ ಚೆಲ್ಲಿದರೆ ಸಾಕೊಂದು ಸರತಿ.!

ಆ ಮುಗಿಲಂಚಿನ ಕಾಮನಬಿಲ್ಲಿನಲಿ
ಸಪ್ತವರ್ಣಗಳ ಸುಂದರ ತೋರಣ.!
ಅವಳಧರದ ಮುಗುಳು ಮಳೆಬಿಲ್ಲಿನಲಿ
ಸಹಸ್ರವರ್ಣಗಳ ಮಧುರ ಹೂರಣ.!

ಆ ಹುಬ್ಬುಗಳ ಬಿಲ್ಲನು ಬಾಗಿಸಿ
ತುಂಟನೋಟದ ದಾರವೆಳೆದು
ಮೋಹಕ ನಗೆಬಾಣ ಬಿಟ್ಟೊಡನೆ
ಉರಿಬಿಸಿಲು ಬೆಳದಿಂಗಳಾದಂತೆ

ಎ.ಎನ್.ರಮೇಶ್. ಗುಬ್ಬಿ.