ಕೈ ಕೈ ಹಿಡಿದದ್ದು ಮನಸೆರಡು ಕೂಡಿ
ಮಿಡಿದದ್ದಂತೂ ನಿಜವಲ್ಲವೆ
ಸತ್ಯವ ನೇಪಥ್ಯಕ್ಕೆ ಸರಿಸಿ ಮಿಥ್ಯವನೇಕೆ
ಮಥಿಸುವೆ ಹೇಳಿ ಬಿಡುವೆಯಾ?

ಬೆರಳು-ಬೆರಳು,ಬೆನ್ನು-ಬೆನ್ನು ಸೋ(ತಾ)ಕಿಸಿದ
ಘಳಿಗೆಗಳದು ಲೆಕ್ಕವುಂಟೆ
ಬಾರಿ ಬಾರಿ ಬಳಿ ಬಂದಣಕಿಸಿದಷ್ಟು ದೂರವೇಕೆ
ಸರಿಯುವೆ ಹೇಳಿ ಬಿಡುವೆಯಾ?

ನನ್ನ ಅಗಲಿರಲಾರೆಂದು ಮುಗಿಲಿಗೂ
ಕೇಳುವಂತೆ ಕೂಗಿದ್ದೆ ಅಂದು
ಆ ಗಗನ ಮೌನ ಮುರಿದರೂ ನೀನೇಕೆ
ಸುಮ್ಮನಿರುವೆ ಹೇಳಿ ಬಿಡುವೆಯಾ

ಹೊಳೆವ ನಕ್ಷತ್ರಗಳ ಎಣಿಸಿ ಎದೆಗಿಳಿಸಿ-
-ಕೊಳ್ಳಬೇಕೆಂಬ ಬಯಕೆಯುಂಟು
ಎದೆ(ಬೇ)ಗುದಿಯ ತಣಿಸದೆ ನೀನೇಕಿಂದು
ನಿಲುಕದಿರುವೆ ಹೇಳಿ ಬಿಡುವೆಯಾ?