ಕಾವ್ಯ ಸಂಗಾತಿ
ಡಾ ಅನ್ನಪೂರ್ಣ ಹಿರೇಮಠ ಅವರ
ಗಜಲ್
ಕಾಮದಾಹ ತೀರಿಸಿಕೊಳ್ಳಲು ಹಸುಳೆಗಳನ್ನೂ ಬಿಡದ ಕಚ್ಚೆಹರಕ ಪ್ರೇತಗಳ ಅಟ್ಟಹಾಸ
ಹಸಿದ ಅಧಿಕಾರದ ಅಮಲಿನಲ್ಲಿ ಸಗಣಿ ಸಾಲದ ಹೊಟ್ಟೆಬಾಕ ದೆವ್ವಗಳ ಅಟ್ಟಹಾಸ
ಹೆತ್ತ ತಾಯಿಯ ಒಡಲ ಬಡವರ ರಕ್ತ ಬಗೆ ಬಗೆದು ತಿಂದು ತೇಗುತಿಹ ರಕ್ಕಸರು
ಚಟ ವ್ಯಸನಗಳ ದಾಸರಾಗಿ ದರಿದ್ರವ ಎಲ್ಲೆಂದರಲ್ಲಿ ಉಗುಳುವ ಮಿಕಗಳ ಅಟ್ಟಹಾಸ
ಅರಿವು ಆಚಾರ ಅರಿಯದ ವಿಚಾರ ಶೂನ್ಯರ ದಂಡು ದಾಂಡಿಗರ ಹಿಂಡೇ ಕಾಣುತಿದೆ
ಹೇಯ ಕೃತ್ಯಗಳ ಹೇಸದೆ ಮಾಡುತ ಮೆರೆಯುತಿಹ ನರಹಂತಕ ಭೂತಗಳ ಅಟ್ಟಹಾಸ
ಸ್ವತಂತ್ರವೆಂಬುದು ಏತಕ್ಕಾದರೂ ಬಂತೊ ದೇವರೇ ಎನ್ನುವ ಸ್ಥಿತಿ ಇಂದು ಬಂದೊಗಿದೆ
ನಿಯತ್ತು ನಿಷ್ಠೆಯಿರದ ಸುಳ್ಳು ಕಪಟ ನೀಚ ವಂಚಕ ಕಾವಿ ಕಾದಿ ಕಾಕಿಗಳ ಅಟ್ಟಹಾಸ
ಎಲ್ಲೆಲ್ಲೂ ಕೊಲೆ ಸುಲಿಗೆ ಅತ್ಯಾಚಾರಗಳ ಬರ್ಬರ ದೃಶ್ಯಗಳು ನೋಡಲಾಗದು ಅಕಟಕಟ
ಭ್ರಷ್ಟತೆಯ ಗಾವುಲರು ಹದ್ದಿನಂತೆ ಹರಿದು ತಿನ್ನುವ ತಿರುಕ ತಾಟಕಿಗಳ ಅಟ್ಟಹಾಸ
ತೃಪ್ತಿ ಇರದ ಅತೃಪ್ತ ಆತ್ಮಗಳ ಗುರಿಯಿಲ್ಲದ ಹುಚ್ಚು ಅಲೆದಾಟದ ಅಬ್ಬರದ ಸಾಗರ
ಜೊಲ್ಲು ಸುರಿಸುವ ಆಸೆ ಬುರುಕ ಮೋಸದಾಟದ ನರಿಗಳ ಅಟ್ಟಹಾಸ
ವ್ಯವಹಾರದ ವಿಚಾರದಲ್ಲಿ ಕೈಚಳಕ ಕುಶಲತೆ ಚಾಣಾಕ್ಷತೆ ಚತುರತೆ ಏನಿವರ ಖದರ
ನ್ಯಾಯ ದೇವತೆಯ ಕಣ್ಣಿಗೆ ಬಟ್ಟೆ ಕಟ್ಟಿ ಅನ್ಯಾಯ ಗೆಲ್ಲಿಸುವ ಕೋಟುಗಳ ಅಟ್ಟಹಾಸ
ಡಾ ಅನ್ನಪೂರ್ಣ ಹಿರೇಮಠ
About The Author
