ಕಾವ್ಯ ಸಂಗಾತಿ

ಖಾಲಿ ಮನೆ

.

ಪ್ರೊ ರಾಜನಂದಾ ಘಾರ್ಗಿ

ನನ್ನ ನಿನ್ನ ಮಿಲನಕೆ
ಸಾಕ್ಷಿಯಾದ ಮನೆ
ನಿಂತಿದೆ ಒಂಟಿಯಾಗಿ
ನನ್ನ ಖಾಲಿ ಹೃದಯದಂತೆ

ನೆನಪುಗಳ ಸುಡು ಬಿಸಿಲಲಿ
ಸುಟ್ಟು ಸುಡುಗಾಡಿನಂತೆ
ಪ್ರೀತಿಯ ಗೋರಿ ಹೊತ್ತು
ನಿಂತಿದೆ ತಾಜಮಹಲಿನಂತೆ

ಪ್ರೀತಿ ಹೊತ್ತಿಸಿಟ್ಟಿದ್ದ
ಪಣತಿಗಳೆಲ್ಲ ಆರಿ ಹೊಗಿ
ಅಂಧಕಾರ ಆವರಿಸಿದೆ
ಮನದ ಹತಾಶೆಯಂತೆ

ಭಾವಗಳು ಜೊತಾಡುತ್ತಿವೆ
ಜೇಡರ ಬಲೆಯಾಗಿ ಮೂಲೆಯಲಿ
ಗೋಡೆಗಳಲ್ಲಿ ಬಿರುಕುಗಳು
ಮನದ ಒಡೆದ ಕನ್ನಡಿಯಂತೆ

ಸತ್ತ ಕನಸುಗಳೆಲ್ಲ ಎಚ್ಚೆತ್ತು
ಇಣುಕುತ್ತವೆ ಕಿಡಕಿಯಿಂದ.
ಅತ್ತಿತ್ತ ಸುಳಿಯುವಾಗ ಕೆಣಕಿ
ಕಾಡುತಿವೆ ಭೂತಗಳಂತೆ

ಮನೆಯೊಂದು ಸ್ಮಶಾನವಾಗಿ
ನಿಂತಿದೆ ನೀರವತೆಯಲ್ಲಿ
ಕಾಯುತಿದೆ ವಿಮೋಚನೆಗೆ
ಶಾಪಗ್ರಸ್ಥ ದೇವತೆಯಂತೆ

About The Author

admin

See author's posts