ಕಾವ್ಯ ಸಂಗಾತಿ
ವಾಣಿ ಯಡಹಳ್ಳಿಮಠ
“ತರಹಿ ಗಝಲ್”
ತರಹಿ ಗಝಲ್
(ಊಲಾ ಮಿಸ್ರ ಶ್ರೀಮತಿ ಅರುಣಾ ನರೇಂದ್ರ ಮೇಡಂ ಅವರದ್ದು )
ನೀ ಕೈಯೊಡ್ಡಿ ಬೇಡಿದರೂ ಚಿಟಿಕೆ ಪ್ರೀತಿ
ದಕ್ಕದಿರಲಿ ಈ ಲೋಕದಲ್ಲಿ
ನೀ ಅತ್ತರೂ ಕಣ್ಣೊರೆಸಲು ಯಾವ ಕೈಯೂ
ಬರದಿರಲಿ ಈ ಲೋಕದಲ್ಲಿ
ಹಗಲು ಇರುಳೆನ್ನದೇ ನನ್ನೊಲವ
ಧಾರೆ ಎರೆದೆ ನಿನಗೆ
ಒಲವ ತೃಷೆ ತೀರಲು ಒಂದ್ ಹನಿಯ
ಪ್ರೇಮವೂ ಸಿಗದಿರಲಿ ಈ ಲೋಕದಲ್ಲಿ
ನಾ ಗುನುಗಿದ ಯಾವ ಮಧುರ ಗೀತೆಯನೂ
ನಿನ್ನ ಕಿವಿಯು ಆಲಿಸಲಿಲ್ಲ
ನೀ ಉಸುರುವ ಪ್ರೀತಿಯ ಪದಗಳು
ಯಾರ ಮನಸಿಗೂ ತಾಕದಿರಲಿ ಈ ಲೋಕದಲ್ಲಿ
ನಿನ್ನೊಲವಿಗಾಗಿ ಹೂವ ಹಾಸಿ ಕಾಯುವಾ ದಿನಗಳುಳಿದಿಲ್ಲ ಈಗ
ನನ್ನಂತೆ ಮೋಹಿಸುವ ಯಾವ ಮನಸೂ
ನಿನ್ನೂರ ಹಾದಿಯಲಿ ಸಾಗದಿರಲಿ ಈ ಲೋಕದಲ್ಲಿ
ವಾಣಿಯ ಭಾವನೆಗಳು ಬಸಿದು ಬಸಿದು
ಬರಿದಾದವು ನೀ ನೋಡಲೇ ಇಲ್ಲ
ನಿನ್ನೊಲವಿನ ಭುವಿಯಲಿ ಅರಳಿದ
ಹೂವು ಯಾರನೂ ಸೆಳೆಯದಿರಲಿ ಈ ಲೋಕದಲ್ಲಿ
———————————-
ವಾಣಿ ಯಡಹಳ್ಳಿಮಠ
