ಕಾವ್ಯ ಸಂಗಾತಿ
ಡಾ. ಮೀನಾಕ್ಷಿ ಪಾಟೀಲ್
“ಮಾತಿಗೆ ಸಿಕ್ಕಾಗ …”
ದೂರದೂರಿನವನು
ಮನದಿ ಮನೆ ಮಾಡಿದವನು
ಮಾತಿಗೆ ಮಾತು
ಅದು ಇದು ಮತ್ತೊಂದನ್ನಾಡುವುದು
ಕಥೆ ಕವನ ಸಾಹಿತ್ಯ
ಹಾಸ್ಯ ಹರಟೆ
ಕಾವ್ಯಕ್ಕೆ ಸ್ಪೂರ್ತಿ
ಕಾವ್ಯಕನ್ನಿಕೆ
ಬೆಳದಿಂಗಳ ಚೆಲುವೆ
ಹಾಡಾಗಿ ಕಾಡಿದ್ದು
ಮೀನ ಕಂಗಳಲ್ಲಿ
ನೂರು ಕನಸು ತೊಟ್ಟವಳು
ನವಿಲಿನ ಚಿತ್ತಾರವ
ಮೈಯಲ್ಲ ಮೂಡಿಸಿಕೊಂಡವಳು
ಸಾಗರದ ಮುತ್ತಿನ
ತೊಡುಗೆ ಇಟ್ಟವಳು
ಆಡಾಡಿ ಬರುವ ತೆರೆಗಳ
ಉಡುಗೆ ತೊಟ್ಟವಳು
ಮುಡಿಯಲಿ ಜಲರಾಶಿಯ
ಮುಂಗುರುಳ ಮುಡಿದವಳು
ಮಾಗಿಯ ಚಳಿಯ
ಮರೆಮಾಚಿ ನಿಂತವಳು
ತಣ್ಣನೆಯ ಉಸಿರಿಗೆ
ಬಿಸಿ ಉಸಿರ ಬೆರಸಿದವಳು
ಎಳೆ ನೇಸರಿನ ಹೊಂಬಿಸಿಲಲಿ
ಹೊಂಬಣ್ಣದಿ
ಮಿಂಚಿ ಮಾಯವಾದವಳು
ಮಾತು ಕತೆ
ಹೀಗೆ ಮಾತಿಗೆ ಸಿಕ್ಕಾಗ…..
ಡಾ. ಮೀನಾಕ್ಷಿ ಪಾಟೀಲ್
