ಕಾವ್ಯ ಸಂಗಾತಿ
ಡಾ ಅನ್ನಪೂರ್ಣ ಹಿರೇಮಠ
ಗಜಲ್
ಭೃಂಗದೊಲವಿನ ಮಧುರ ಗಾನ ಕೇಳುತ ಅರಳಿದೆ ಈ ಜೀವ ಕುಸುಮ
ನವಿಲಿನ ಮೋಹಕ ಗರಿಗೆದರಿದ ನಾಟ್ಯಕ್ಕೆ ಕುಣಿದಿದೆ ಈ ಜೀವ ಕುಸುಮ
ತಂಪು ತಂಗಾಳಿಯು ಸೋಕುತಿಹ ತಂಬೆಲರಿನ ಹಸಿರು ಹಾಸದು ಕೆಣಕುತಿದೆ
ಕಾಮನ ಮೋಹಕತೆಗೆ ತಾಳದೆ ಹುಚ್ಚೆದ್ದು ನಲಿದಿದೆ ಈ ಜೀವ ಕುಸುಮ
ಬೀದಿ ದೀಪಗಳು ಕರೆ ಕರೆದು ಪ್ರೀತಿ ಮಾತುಗಳ ಪಿಸುಗುಟ್ಟು ಸೆಳೆಯುತಿವೆ
ಮಾಮರದ ಕೋಗಿಲೆಯ ಮಾಧುರ್ಯಕೆ ಮರುಳಾಗಿದೆ ಈ ಜೀವ ಕುಸುಮ
ಚುಕ್ಕಿ ತಾರೆಗಳು ಹೊಳೆ ಹೊಳೆದು ಆಸೆ ಕಂಗಳ ಕುಕ್ಕಿ ಕೆಣಕುತ ಮಿರುಗುತಿವೆ
ಹುಣ್ಣಿಮೆ ಚಂದ್ರನ ತಂಪ ಬೆಳಕಿನ ಮೋಹಕತೆಗೆ ಮಂಕಾಗಿದೆ ಈ ಜೀವ ಕಸುಮ
ಹೂ ದಳಗಳ ಕೋಮಲ ಕುಸುರಿನ ಮೆತ್ತನೆಯ ಹಾಸಿಗೆಯದು ಕರೆಯುತಿದೆ
ಮೋಹಕತೆಯ ಝರಿ ತೊರೆಗಳ ಸೆಳೆತಕೆ ಕಂಗಾಲಾಗಿದೆ ಈ ಜೀವ ಕುಸುಮ
ನಡು ರಾತ್ರಿಯಲಿ ಉರಿಯುತಿಹ ಕಿರು ದೀಪಗಳ ಸಾಲು ಬೆಳಕು ಮಂಪರಿಸುತಿದೆ
ದೇವ ಮಂದಿರದೆ ಬಾರಿಸುವ ಗಂಟನಾದಕೆ ಮೂಕವಾಗಿದೆ ಈ ಜೀವ ಕುಸುಮ
ಅನುಳ ತನುವಿನ ತಲ್ಲನದೊಳಗಿನ ವೇದನೆಯ ನೋವು ಸಂಕಟ ತಾಳದಂತಿದೆ
ಅಂತರಾಳದ ಅಮರ ಪ್ರೇಮ ಮೇಳಕೆ ದನಿಗೂಡಿದೆ ಈ ಜೀವ ಕುಸುಮ
ಡಾ ಅನ್ನಪೂರ್ಣ ಹಿರೇಮಠ
