ಶಾಲಿನಿ ಕೆಮ್ಮಣ್ಣು ಕವಿತೆ-ಜೀವ ಸೆಲೆ

ಕಾವ್ಯ ಸಂಗಾತಿ

ಶಾಲಿನಿ ಕೆಮ್ಮಣ್ಣು

ಜೀವ ಸೆಲೆ

ಉದಯನ ಒಡ್ಡೋಲಗಕ್ಕೆ ಬಿತ್ತೀಗ ತೆರೆ
ಆಗಸದ ತುಂಬೆಲ್ಲ ಮೋಡಗಳ ಗೆರೆ
ಮಿಂಚಿನ ಚಕಮಕಿಗೆ ಸಿಡಿಲ ಅಬ್ಬರದ ಮೊರೆ
ಗಾಳಿಯ ವೇಗಕೆ ಗಿಡ ಮರಗಳು ನೃತ್ಯದಿ ಸೆರೆ

ಬಾನೊಳು ಚಿಮ್ಮಿತು ಸೋನೆಯ ಮಳೆ
ಧರೆಯೊಡಲಲಿ ಪಸರಿತು ವೈಭವದ ಕಳೆ
ಜೀವನಾಡಿಗಿದು ಸಂಭ್ರಮದ ವೇಳೆ
ಎಲ್ಲೆಲ್ಲೂ ವರ್ಷದ ಹರ್ಷದ ಹೊಳೆ

ಹರಿಯಿತು ನೀರಿನ ಸೊಬಗಿನ ತೇರು
ಉಸಿರಿಗೆ ಹಸಿರಿನ ನಲ್ಮೆಯ ಬಸಿರು
ಪ್ರಕೃತಿಗೆ ಸೌಂದರ್ಯದ ಹೆಮ್ಮೆಯ ಮೇರು
ಬದುಕಲಿ ಉಕ್ಕಿತು ಉತ್ಸಾಹದ ಹೊಸ ಚಿಗುರು

ಮರಗಿಡಗಳಲಿ ತುಂಬಿದ ಜೀವನ ಸೆಲೆ
ಮ್ರಗಪಕ್ಷಿಗಳಲಿ ಹಿಗ್ಗಿದ ಭರವಸೆಯ ಅಲೆ
ಹೂಗಳು ಕರೆದಿವೆ ಬೀರುತ ಕಂಪಿನ ಮಳೆ
ಹಣ್ಣು ಹಂಪಲು ತಾಜಾ ರಸದ ಸ್ವಾದದ ಸೊಳೆ

ಮಳೆ ತಂದಿದೆ ಇಳೆಗೆ ಭರವಸೆಯ ಕವಿತೆ
ಹನಿ ಹನಿಯಲ್ಲೂ ಹೊಸ ಹಂಬಲದ ಒರತೆ
ಅವಘಡ ಅವಾಂತರದ ಆಘಾತಗಳ ಜೊತೆ
ಅವಿತಿದೆ ಬದುಕಿನ ಉತ್ಕಟ ಉತ್ಕರ್ಷದ ಚರಿತೆ

---

ಶಾಲಿನಿ ಕೆಮ್ಮಣ್ಣು