ಡಾ ಅನ್ನಪೂರ್ಣ ಹಿರೇಮಠ ಅವರ ಗಜಲ್ -

ಕಾವ್ಯ ಸಂಗಾತಿ

ಡಾ ಅನ್ನಪೂರ್ಣ ಹಿರೇಮಠ

ಗಜಲ್

ಒಲವಿನ ಬಲೆ ಬೀಸಿ ಮನವ ಕಲಕಿ ಹಾಸಿಬಿಟ್ಟೆ ಪ್ಯಾರ್
ಪ್ರೇಮದ ಪಾಶ ಬಿಗಿದು ಎದೆಯ ಹಿಸುಕಿ ಹಾಸೆಬಿಟ್ಟೆ ಪ್ಯಾರ್

ಯಾರೋ ನೀನು ಯಾರೋ ನಾನು ಹನಿಯೊಡೆಯಿತು
ಮಾಯದ ಮದವೇರಿಸಿ ಕೈ ಸೋಕಿ ಹಾಸಿಬಿಟ್ಟೆ ಪ್ಯಾರ್

ನೋಟ ಕೊಡಿ ನವಿರಾದ ಭಾವ ಮೂಡಿ ಬಸಿರಾಯಿತು
ಸ್ಪರ್ಶ ಸುಖದ ನಶೆಯೇರಿಸಿ ಕೆದಕಿ ಹಾಸಿಬಿಟ್ಟೆ ಪ್ಯಾರ್

ಯಾವ ಜನ್ಮದ ನಂಟು ಈ ಜನ್ಮದಲ್ಲಿ ಬಂದು ಬೆಸೆಯಿತು
ಹಿತ ಮಾತಿನ ಲಾಲಿಹಾಡಿ ಕಾಡಿ ಬೆದಕಿ ಹಾಸಿಬಿಟ್ಟೆ ಪ್ಯಾರ್

ಜೀವ ಜೀವಗಳ ಸಂಬಂಧದ ಕುಡಿಯೊಡೆದು ಚಿಗುರಿತು
ಒಡನಾಟದ ತಾಪದ ತಂಪೆರೆದು ತದಿಕಿ ಹಾಸಿಬಿಟ್ಟೆ ಪ್ಯಾರ್

ಮಾಯದ ಗಾಳಿ ಸೂಸಿ ದೇಹವನಾವರಿಸಿ ಮಂಪರಿಸಿತು
ಸಲ್ಲಾಪದ ಸುಖ ನೀಡಿ ನೆಮ್ಮದಿ ಹೊಸಕಿ ಹಾಸಿಬಿಟ್ಟೆ ಪ್ಯಾರ್

ಅನುವಿನಂತರಾಳದಲಿ ಇಲ್ಲದ ಗುಲ್ಲೆಬ್ಬಿಸಿ ಶಾಂತಿ ಕದಡಿದೆ
ಮುತ್ತುಮಳೆಗರೆದು ಬಿಗಿದಪ್ಪಿ ಮಿಟುಕಿ ಹಾಸಿಬಿಟ್ಟೆ ಪ್ಯಾರ್