ಕಾವ್ಯ ಸಂಗಾತಿ
ಮಂಡಲಗಿರಿ ಪ್ರಸನ್ನ
ತರಹೀ ಗಜಲ್
ನಾಗೇಶ್ ನಾಯಕ ಅವರ ಮೂಲ ಗಜಲ್ ನನ್ನನ್ನು ಎರಡು ಕಾರಣಗಳಿಗೆ ಕಾಡಿದೆ. ಒಂದು, ಈ ಗಜಲ್ ನಿರೂಪಿಸುವ ಬದುಕಿನ ಕಠಿಣವೆನಿಸುವ ಸರಳತೆ ಹಾಗೂ ಎರಡನೆಯದು, ನಾವು ಕೆಲವೊಮ್ಮೆ ಅರ್ಥೈಸಿಕೊಂಡ ಎಷ್ಟೋ ಸಂಗತಿ ಅತಾರ್ಕಿಕವಾಗಿದ್ದು ದಾರಿ ತಪ್ಪಿಸುತ್ತವೆ. ಹಾಗಾಗಿ, ನನ್ನನು ಈ ಗಜಲ್ ತರಹೀ ಬರೆಯಲು ಪ್ರೇರೇಪಿಸಿತು. ನಾಗೇಶ್ ಜೆ ನಾಯಕ ಅವರಿಗೆ ಈ ಕವಿ ಋಣಿ.
…..
ಮಿಸ್ರಾ: ಕಳೆದುಕೊಂಡ ಮೇಲೆ ಹುಡುಕುತ್ತಾರೆ…
ಕವಿ: ನಾಗೇಶ್ ಜೆ. ನಾಯಕ
…..
ಕಳೆದುಕೊಂಡ ಮೇಲೆ ಹುಡುಕುತ್ತಾರೆ ಎಲ್ಲರೂ
ಹೊತ್ತು ಸರಿದ ನಂತರ ಮರುಗುತ್ತಾರೆ ಎಲ್ಲರೂ
ಇರುವಾಗ ಪ್ರೀತಿ ಕೈಗೆಟುಕದ ಸಾಧನವೇನಲ್ಲ
ದೂರವಾದಾಗ ಸುಮ್ಮಗೆ ಅಳುತ್ತಾರೆ ಎಲ್ಲರೂ
ಕಾಲಚಕ್ರ ಯಾರಿಗೆ ನಿಲ್ಲುವುದೋ ತಿಳಿಯದು
ನಾವಷ್ಟೇ ಪ್ರಬುದ್ಧರು ತಿಳಿಯುತ್ತಾರೆ ಎಲ್ಲರೂ
ಕಣ್ಣೀರಿನ ಬೆಲೆ ಅರಿತವರಿಗಷ್ಟೇ ಗೊತ್ತು ಗೆಳೆಯ ಅದೇಕೋ ವ್ಯರ್ಥವಾಗಿ ಕರಗುತ್ತಾರೆ ಎಲ್ಲರೂ
ಅಂತರಂಗ ತೆರೆದಿಟ್ಟರೆ ಎಲ್ಲವು ಅರ್ಥವಾದೀತು ಶಬ್ದಶಬ್ದಕೂ ತಾತ್ಪರ್ಯ ಹುಡುಕುತ್ತಾರೆ ಎಲ್ಲರೂ
ನುಡಿಯೆಲ್ಲವೂ ಬೆಡಗಿನ ವಚನದಂತಿದ್ದರೆ ಚೆನ್ನ
ಮೃದುವಾದ ಮಾತಿಗೂ ಚುಚ್ಚುತ್ತಾರೆ ಎಲ್ಲರೂ
ತಿಳಿದು ಬದುಕುವುದೇ ಜಗದ ವಿಸ್ಮಯ ‘ಗಿರಿ’
ತನ್ನ ತಾನು ತಿಳಿದು ಬಯಲಾಗುತ್ತಾರೆ ಎಲ್ಲರೂ
- ಮಂಡಲಗಿರಿ ಪ್ರಸನ್ನ
