ಡಾ ಸುರೇಶ ನೆಗಳಗುಳಿ-ಅತಿ ಸಣ್ಣ ಕತೆಗಳು - ಸಾರ್ಥಕ ಬದುಕಿಗೆ ಸಾಹಿತ್ಯ ಸಂಗಾತಿ

ಕಥಾ ಸಂಗಾತಿ

ಡಾ ಸುರೇಶ ನೆಗಳಗುಳಿ

ಅತಿ ಸಣ್ಣ ಕತೆಗಳು

(ಅ) ಭಾವ

ಯಾವುದೂ ಬೇಡವೆಂಬ ಭಾವ ಮೂಡಿತು ಆಕೆ ಕೈ ಕೊಟ್ಟಾಗ.ಎಲ್ಲಾ ಮಾಯವಾಯಿತು ಈಕೆ ಕೈ ಹಿಡಿದಾಗ

೨
ವಿಪರ್ಯಾಸ

ಆತ ಗುರಿಯೆಡೆಗೆ ಸಾಗುತ್ತಿದ್ದ.ಈತ ಗುರಿಯಿಲ್ಲದೆ ತಿರುಗುತ್ತಿದ್ದ.ಇಬ್ಬರೂ ಸಂಧಿಸಿದರು. ಆತ ಕಟಕಟೆಯನೇರಿದ್ದ.ಈತ ಗಹಗಹಿಸಿ ನಗುತ್ತಿದ್ದ.

೩
ಗುರುವ ಗೆದ್ದ ಶಿಷ್ಯ

ಶಿಷ್ಯೋತ್ತಮ ಆತ. ತರಗತಿಯಲ್ಲಿ ಇದ್ದ ದಿನ ವಾರಕ್ಕೊಂದಕ್ಕೂ ಕಡಿಮೆಯಾಗಿ ಪ್ರಾಚಾರ್ಯರಿಗೆ ತಲೆ ನೋವುಂಟು ಮಾಡಿದ್ದ ಆ ವಿದ್ಯಾರ್ಥಿ ಮಗದೊಂದು ದಿನ ದುಬೈ ಅರಸನ ವೈದ್ಯನಾದ.ಪ್ರಾಚಾರ್ಯರು ಹಾಸಿಗೆ ಹಿಡಿದಿದ್ದರು.

೪
ಮಹಾದಾನ

ಮತದಾನದ ಮರುದಿನ‌ ಮಗಳ ಮದುವೆ.ಅದೂ ದೂರದ ಊರಿನಲ್ಲಿ. ಯಾವ ದಾನ ಮಾಡಲಿ ಎಂದಾತ ಹಪಹಪಿಕೆಗೊಳಗಾದ.

೫
ಬೇಸ್ತು

ಆಕೆ ಅತಿ ಬೇಗ ಆತ್ಮೀಯಳಾದಳು ಜಾಲತಾಣದಲ್ಲಿ. ನಿಜ ಸಂಗತಿ ಅರಿವಾದುದು ಆಕೆ ಸಾಲದ ಕಂತು ತೀರಿಸಲು ಸಾಲದ ನೆಪವೊಡ್ಡಿ ಹಣ ಕೇಳಿದಾಗಲೇ

೬
ಬಿಸಿ

ವಿದ್ಯುತ್ ಬಿಲ್ ಗಗನಕೇರಿದ ರಸೀತಿ ಬಂತು.‌ಆತ ಭಾಸ್ಕರನಿಗೆ ಶಾಪ ಹಾಕುತ್ತಾ ಎ.ಸಿ.‌ಯಾಕಾದರೂ ಹಾಕಿಸಿದೆ ಎಂದು ಕೊಂಡ

೭
ಸಾತ್ಮ್ಯ

ಒಂದು ದಿನ ಟಿ.ವಿ. ಇಲ್ಲದಿದ್ದರೆ ಕೇಬಲ್ ನವನ ಮೇಲೆ ಬರುವ ಸಿಟ್ಟಿಗೆ ದೂರ್ವಾಸ ನಾಚ ಬೇಕು

೮
ಸದುಪಯೋಗ

ಎಲ್ಲಾ ದೈನಿಕ‌ ತರಿಸುವ ಖಯಾಲಿ ಆತನಿಗೆ.ಓದುವುದು ಮಾತ್ರ ಅವನ ಹೆಂಡತಿ ಎ ಟು ಝೆಡ್.

೯
ಈ ಕಾಲ

ರಸ್ತೆಯಲ್ಲಿ ವಾಹನ ಚಲಾಯಿಸುವಾಗ ಹೆಚ್ಚು ಜಾಗರೂಕನಾಗಿದ್ದ ಕಾರಣದಿಂದ ಆತ ಹಲವಾರು ಬಾರಿ ಹಲವರಿಂದ ಬೈಸಿಕೊಳ್ಳುತ್ತಿದ್ದ.